Dabi@Day98 - 驚心動魄幾小時

作為亞爸亞媽，最擔心莫過於兒女生病。
若佢地生病時，就只會祈求佢地快快好番。寧願有病既係我。


我試左兩日奶粉，見佢都有便便，就不以為意。
點知佢尋晚亞囝無啦啦肚痾。
可能因為係奶粉屎，所以我分得比較清楚。
我都好肯定，個一pat一定係肚痾。
(因為如果你係餵人奶，你就會明我講咩；我之前成日災難小姐上身，覺得佢人奶屎水少少都係肚痾)

見佢痾左兩次又無咩，仲識得對住我地笑，咪諗住睇定d先囉。
點知今朝，我幫佢換片片既時候，我見到佢片片既姑姑位有血水。
我唔識講比你地聽個刻我有幾驚，但有血水真係已經令我六神無主。
好啦，諗住即刻餵完奶就帶佢去睇醫生。
點知佢....又係點都唔肯飲。
我已經好驚架啦，又餵唔到奶，又唔知點算。
打比媽媽佢竟然係好日都無咁岩既無帶電話，老公又做緊野。
嘩，我可以話比大家知...個一刻...我淨係識得喊。
亞仔食唔到奶，但又肚餓，佢都一齊喊。
結果就係兩母子響到喊喊喊


咁六神無主，我真係唔知點算，唯有急call老公返黎！
點知call完佢，亞仔又肯飲奶啦喎！
都唔緊要，即刻食完奶就帶佢去大埔睇胡兆雲醫生。

三點多去到，排第七，點知...等到五點幾先有得睇。
我連lunch都未食，應該話個一刻，我無野落過肚。
我老公見我無曬主意咁，佢又憫，總之就係大家都好唔開心。

睇醫生，醫生話唔駛咁擔心，仲話好多人咁樣攞曬小便去驗，最終都係無事。
而見到Dabi B又訓得玩得，叫我地唔駛咁擔心。
可能只係wee-wee間唔時有少少唔同既色。
佢咁講，果然令我放心左好多～
不過佢就話Dabi既屎屎明顯係肚痾，開左少少好似寶礦力咁樣既粉比佢沖水飲。
希望佢快快無事啦！

另外，醫生仲睇埋我既yeast infection，同埋Dabi個口。
果然係睇醫生就會無事，醫生只係話唔見有好大問題，仲話有既都只係少少損。
唔係咩真菌感染，可能之前真係有既，但呢家就唔係好覺。
我一路同佢講，佢就叫我唔駛咁擔心。
仲支持我埋身繼續比Dabi B食添～

好囉，有安樂茶飯啦！繼續埋身既日子，又再次開始啦....