無聊之作@magmypic

見人地玩得咁開心，我自己又玩下先～

都真係幾搞笑！！

http://www.magmypic.com

未來62生日@Lawry's The Prime Rib

今日係未來62既生日，嘉慧地好有心，訂左一間跛跛話好好味既扒食 - Lawry's The Prime Rib，佢係一間響利園既餐廳，淨聽地點已經知勁！

由於爹爹同哥哥出發，我於是放工先響銅鑼灣大戰，結果當然滿載而歸啦！

一去到，已經見到d人好professional。

今晚參與既仲有至搞鬼既妹豬...

您睇佢表情多多，點可以唔笑呢？

第一道菜係呢個肥姐姐整既沙律，係放響個冰盤入面轉下轉下咁架喎，好好笑，連我唔食個d紫洋蔥都食左一條咁大把！

至於佢既扒，就係講明唔係煎，係燒既，每一塊都係個廚師響呢個鐵籠入面切出黎，好好食。由於哥哥唔食得太多牛，我就叫左一set medium rare，而哥哥就食羊。
嘩，唔好睇佢好似好紅咁，食落去係一D血紅味都無，勁好食！

唔少得既當然係呢度包既生日Rum蛋糕一個，最搞笑係妹豬見有蠟燭吹，9秒9跑左去爹爹度，開心屎。

desert仲有呢個火焰雪山，雖然我唔食，但聽佢地講好似rum好重。

今日未來62生日，有新衫著啦，希望佢繼續健健康康，開開心心啦！

學哥哥話齋，有個妹妹真係幾好～（嘉慧，您真好）

倒數９個月＋結婚進度表第一回

仲有九個月就到我地兩個既大日子，既然係咁，點都要update下自己既進度表，等自己有個checklist跟下：

------------------------------------------------------------

婚禮日期: 2009年12月18日 (星期五)

婚宴地點: 九龍灣國際展貿中心13樓煌府酒家(圍數>35圍，菜單未confirm)

註冊地點: 基督教信義會天恩堂 (未confirm)

婚禮攝影/錄影: Jack Creation

婚紗相: (1) 九寨溝 -- 上年11月已影
                 (2) 法國婚紗攝影 -- 4月18日影

簽名布及謝咭: 簽名布 (Jack Creation + 法國婚紗 + 酒樓包[應該有])

化妝師: Hana @ Hana Studio (已試妝，1 take ok)

新娘婚紗晚裝 (2件wg + 3件eg): 應該響法國入面揀4件(1件wg+3件eg) + 顯卓1件wg

新娘裙褂: 未租 (有好介紹嗎?)

新娘鞋: 1對銀色婚紗鞋+1對晚裝鞋(未買)

新郎禮服(2套): 法國婚紗

媽咪，伴娘及奶奶衫: 顯卓 (應該4月first fitting，未約)

爸爸: 自己準備西裝

花仔花女: 首選係妹豬同埋Kobe，諗下諗下，不如加埋陳BB+Siby都好 (未買衫仔)

結婚戒指: 未買

戒指枕: 未買

簽名筆及結婚證書套: 嘉慧去台灣買左靚靚原子筆比我，但考慮轉用金/銀底簽名筆；結婚證書套(未買)

嫁妝: 未買

飾物: 法國婚紗+自己+ 親戚借用飾物 (會有幾多呢?)

車頭公仔: Bechhichi (已整婚紗禮服)

婚禮邀請咭: 未找人設計，但又想自己設計

婚禮場刊: 未找人設計，但又想自己設計

婚禮教堂佈置: confirm左教堂先諗

婚禮各項安排: 未confirm

喜帖: 酒樓包，但想自己design搵人印

婚宴司儀: 女仔應該係肥肥人，男仔未諗

婚宴場地佈置: 九展新場，唔知要唔要呢？

婚宴用童年片頭: 未整(Jack Creation + 酒樓包)

婚宴進場音樂: 未安排

婚宴酒類: 未安排，會唔會有人sponsor呢?

過大禮事宜: 未安排

花球: 未安排

餅咭: 美心 -- 已買差唔多120張

花車及旅遊巴: 自己車，唔知駛唔駛book 28van呢？多數都要

花車佈置: 未安排

小禮物: 未定

邀請人名表: 已有初步名單

媽咪，伴娘及奶奶化妝: Hana + team包辦

姊妹衫及化妝: 衫未決定，化妝Hana + team包辦

當日rundown: 未安排

各人task list: 未安排

伴娘: 表妹Yoyo

姊妹名單: 已有初步名單，未confirm

姊妹手花: 未決定，想DIY

伴郎: 3揀1，多數係迪捷

兄弟名單: 已有初步名單，未confirm

兄弟襟花: 未決定，想DIY

婚前檢查: 未安排

新房裝修: 預計8月開始搵資料，9月confirm，10月裝修

茶壺: 未買

紅傘: 未買

新睡衣: 未買

龍鳳被: 未買

回門乳豬: 酒樓送

利是封,貼紙: 未買

囍字拉條,揮春: 未買(但未來99話會送門口既對聯比我地)

啤牌瓜子糖果:啤牌未買，瓜子糖果酒樓送

兄弟姊妹飯局傾rundown: 未安排

---------------------------------------------------------------------------------------------------

謝謝網友Luci，借左您個進度表一用。

黎緊要完成的項目包括：
1) 約4月顯卓first fitting
2) 買奇華唐餅
3) 約牧師，搞掂教堂事宜
4) 完成106執相
5) 影法國婚紗相
6) 決定要唔要搵decoration

好似好慢咁...淨返9個月，感覺自己躲懶左，要努力D先得。

上海豪食之旅Day4

黎到最後一日，我地一定要盡慶回家。

一早出發先去呢個吳越人家食個個叫做「蝦仁蟹粉麵」，就係強記叫我地買返去比佢做手信既，雖然帶唔到返去比佢，都叫左食左比佢睇呀嘛@.@

而聽聞上次高生黎食，就話個麵唔ok，反而個八寶飯好得，所以我地諗都無諗又係叫到成枱都係野食啦！

果然真係個八寶飯勁好食，所以我地都買左返去比強記做手信！

黎到上海，就當然要去下呢個世界最高觀光廳 - 上海IFC啦～

佢既設計都好鬼搞笑，成個手抽袋咁，由於星期日，我地要等差唔多半個鐘有多先入到去。

一上已經去到94樓，不過今日大霧少少，所以影唔到好清既相，但望出去就真係好壯觀。

轉一轉lift，我地就去到100樓啦～嘩，呢度正好多，因為地下係玻璃設計，乜都睇曬，咁之但係我怕高既，就點都唔敢望同埋行埋去。

不過哥哥用wide angle影出黎既相，因為玻璃/鏡設計，好靚！

呢兩兄妹幾大膽...

走既時候，我地見94樓無咁多人，又再影多次相，拿，係咪無100樓咁靚呢？

落返地面，諗住影佢全相啦，點知原來都幾講您響邊度影，因為我地響呢個方向影，佢就好似變左杜拜既帆船酒店咁啦！

但岩方向既話，又會影返佢係一個手抽袋^^

又係食既時間，今次我地去南京東路，因為有好好食既小楊生煎包，真係好好食，生煎包一d都唔乾，勁juicy，仲有特大羊肉串，好好味～

最後一站，LeeLee帶我地去既地方叫老碼頭，係一個岩岩起緊既新地方，成個鬼佬地方咁，又係影相既好地方！

我地走啦....上海，有機會我地會再見架！

小花，您都要保重啦！

返到香港啦，幾好，我地有行李運送員～

上海豪食之旅Day3

尋晚約小花司機既時候，我地約左9點鐘，哈，佢又問我地點解咁早，呵呵呵...

今日我地去遠少少既地方 - 朱家角，佢係成個村都係一D好古舊既屋，而入面真係有人住架喎！５人精華遊再出發....

最開心既係今日天氣大好，所以我地著既衫都明顯少左^^

去到雖然天未係好清，但見到太陽已經開心屎，哥哥即刻攞部相機出黎影！

我地一路行都見到好多野食，呢度最特別既係糉同埋元蹄，但因為我地已經食左豆漿做早餐，所以就無食到！

沿途見到咩都影一餐...

我地行到最入既時候，就決定坐船玩！

最搞笑既係哥哥一起身，架船都會搖晃架^O^

由於大家玩得好盡慶，所以當個船家要我地響放生橋落船，LeeLee就話比多$60坐返轉頭！

回程既時候，我就買左士多啤啤冰糖胡蘆，點知有Bee黎搵我，嚇死～

而哥哥同嘉慧就搵到有三聚氰胺既牛牛雪條 - 隨便食！

差唔多成個鐘有多既車程，我地又響架車上面訓死左！

唔少得當然都係食，呢一站係越南野 - 華越樓。

又係成枱都係野食，不過最好食既係生牛肉河同埋呢個唔知咩魚既薯粉！

哥哥見到好多攝影人黎呢度影相，就試下影啦，點知又真係幾靚架喎，原來呢度叫 - 田子坊，係一個藝術既地方，好多自家設計野買，我都買左個核突公仔比Vissica做手信～

約左５點半我地一齊去做Spa，見有少少時間，LeeLee就帶左我地黎呢個勁似中央公園既世紀公園啦～

影出黎既相真係幾靚架喎，見到勁多人響到Hea....

做完Spa已經七點多，唔知係咪因為我未做過呢？覺得佢地好似只係將d香薰油搽上個身度，不過so far都係舒服既。

今晚另一節目係去買手信，沿途響一個紅綠燈見到呢間叫Hello Mimi既Studio，小花司機話可以比我地停一停睇下咩黎，結果我同嘉慧同埋哥哥就走左落車八下。

原來佢就係雜誌呢排話既獨一Hello Mimi Studio，入面可以同Hello Mimi影相，即係沙龍個d呢，不過當然要收費啦！亦都唔比我地響入面影相，所以我地只可以響出面影，不過呢d只係得意相，如果結婚相要同Hello Mimi影會唔會太搞笑呢？

買完一袋二袋既手信同埋書之後，我地就食火鍋啦！今晚去呢間叫鍋比盆大既火鍋，LeeLee話都係好出名架喎～

叫左個麻辣，點知原來都唔辣，我都食到～

不過食到響成都食既黃喉都好開心！

上海豪食之旅Day2

尋日小花司機問我地十一點半黎LeeLee度pick up我地會唔會太遲，哈，我地比較懶訓，無辦法，再加上有呢個電氈加暖氣，簡直就係我訓覺既恩物。唔知係咪暖氣係哥哥既敵人，佢就訓得麻麻，繼７點幾鬧鐘響，仲有爹爹打比佢問野，之後佢就自己響到玩Picross，我響到訓。

今日Benny響寧波黎搵我地（百忙之中都抽中陪我地，真感動T.T），所以一起身我地就相約左響上海都好聞明既小南國等。Benny仲帶我地去左一間好華麗既小南國，呵呵呵～

由於未得LeeLee批准，暫時以哈哈笑代替住Benny先。

今日我地都地繼續尋日既作風，想食乜就叫，結果都係叫到成枱都係野食，不過佢既小籠包就無尋日響蘇浙匯咁好食啦，反而無影相既元蹄同埋雲吞都幾好食。仲有個特色蝦，唔好以為佢好似好簡單，但食落又幾美味咁喎！

食完野，Benny就要繼續工作，而我地就去左東方明珠啦！

個波波好大好靚，只係天色唔好，所以朦朦地...但我地一於少理，見乜都影，就係跑上跑落呢個樓梯影相，幸好有哥哥既靚相機，我地就有咁鬼靚既相！

響東方明珠入面有個藝術館，雖然LeeLee黎左好多次，但佢都肯陪我地黎，真係偉大。我地幾本上係見乜都影一餐，而入面其實係展覽一d古時既野。

您睇下，每人都要比佢打一下既時候，會係咩表情呢...

哥哥浸親啦............

威威仲咩帶嘉慧去旅館，個樣仲要咁衰....

出返黎之後，司機就叫我地不如去呢個濱江大道行一行，原來佢就係外灘既對面岸，仲好靚添！

外灘觀光隧道就係嘉慧話一定要去既地方，由浦東去浦西，但最後就無去到...

LeeLee之後帶我地去左一茶一坐食個tea，哈，食個tea都係成枱都係野食，問您怕未？

大約７點幾，我地就去接埋Benny，由Benny帶我地去一間Fushion菜 - 「人間」！一去到我地已經被佢地既外觀吸引到，開門都係一個機關，裝修好華麗，去廁所唔可以急先去，咪會賴....

d野食都好特別，特別係呢個冰鎮芥蘭，成個波波咁，好搞笑又好好味！

節目又點會咁快完，LeeLee之後帶左我地去外灘，就係浦東個邊啦～就好似尖東海旁咁，好靚！佢既建築物特別，所以影得都好靚，仲有著曬燈既東方明珠，影出黎比上海IFC仲要靚...

吹完風之後，再戰新天地。新天地就係上海既諾士佛台咁，好多人飲酒，之後就去個間叫Paul既出名麵包店買左麵包做消夜返屋企啦！

返到屋企，有威威電視迷，有我同嘉慧做NDS迷，LeeLee就要好忙咁執佢既行李，哥哥就話要幫間屋影返張相喎～

LeeLee一個人住咁大間屋，都係同我地迫響帝堡城開心D^^

上海豪食之旅Day1

上海之旅終於成行了，今次出走仲有嘉慧同埋威威，當然唔少得就係留守左響上海等我地既LeeLee啦～

今朝我地已經唔駛返工，只有勤力既老闆仔 - 哥哥出去做埋野先返屋企，呵呵呵！咁我當然乖乖執好曬行李等哥哥啦！

1點鐘我地就齊齊帶左４個喼出發，一去到機場，當我仲推住行李既時候，嘉慧就跳左上架車度，哈哈哈...推佢落斜既時候我以為會跌親佢添～

食完美味既Burger King，我地就坐Bus出去上飛雞，近距離咁見到飛雞好高興，我地一齊出發啦！

去到落雨濕濕，上左LeeLee為我地預備既王嘉偉的士，差d無命，幸好都安全到達LeeLee家，而Benny既司機已經響到等我地車我地出去食飯。今晚LeeLee話要食好d，帶左我地去食「蘇浙匯」，呢間野都好高級，基本上無返咁上下著住西裝既都唔會黎，我地仲無啦啦咁lucky被安排坐左入去包房入面（個侍應仲話要$1200最低消息先有架）！

今晚既美食就多囉，基本上我地無數人頭，只係見到想叫就叫，叫到成枱都係，最開心既係食到麻醬油麥菜、清炒蝦仁、蜜糖火腿同埋多汁又薄既小籠包。後尾仲要送埋糖水，勁呀！

都話哥哥同威威有路架啦...

由於夜同埋天雨路滑既關係，我地就去左錢櫃唱K，估唔到既係佢地既歌仲新過香港，連囍帖街既謝安琪版都有您就知啦！仲有唔講得笑既大Ja野飲，叫左都可以幾個人分，加上先進既電腦選歌系統，同埋兩邊牆都有cut歌同大細聲remote，簡直就係wonderful。最尾埋單每人唔駛$100，仲唔係super？

高露潔Colgate刻名牙刷

早響一月既時候，我閒時去萬寧想買牙刷比哥哥，見到買滿$39就可以抽獎，有機會得到刻名牙刷一對，即刻諗都唔諗就買夠去參加！

本應仲響到諗唔知有無機會二月情人節既時候送比哥哥呢？

幸好，佢寄黎既今日我收到（遲一日都上左飛機），攞返屋企比哥哥，白色情人節快樂！