今朝餵奶時，無無聊聊，睇下Dabi食奶時，原來對腳係咁樣嘆奶....比佢笑屎。
今朝要返母嬰見醫生，老公都陪我去，不過因為時間好難搵的士，我地就揸車去，老公泊去新城市。去到健康院，原來今日呢段時間係產檢，所以無乜BB，我地仲係2號籌，岩岩準備入去磅重，老公就泊好車行到黎，好野，唔駛媽me拿手唔成世！
Dabi今日重得好唔錯呀，已經3.67kg啦，姑娘同醫生都係話重得好好，今日仲特登食埋奶先去，岩曬！去到Dabi都無喊過！見醫生都係check一堆好normal既野，之後話比你聽好normal，咁就走得啦！
見時間咁早，我同老公仲去太興嘆返個早餐，嘩，好美味呀！！！
老公由之前初生都唔識抱，到呢家只係19日既訓練，已經可以單手抱住Dabi，單手食野啦！勁！
今日媽咪同哥哥一齊入左黎探Dabi，哥哥真係好鍾意小朋友，好少見佢咁山長水又遠都肯入黎，仲有久唔久就打黎問我點既婆婆，作為太婆既佢，都係想入黎睇下粒孫。唔少得既當然係佢老人家既一點又一點既心意同埋教晦。
晚上大舅父黎接亞婆去晚餐，同埋爹爹入埋黎，一家人一齊食晚飯，好似之前真係少之又少，可能哥哥又無返工啦！好似好耐好耐無試過咁樣一家人黎食晚飯啦！
仲有我媽媽既唔止一點點既心意，好靚呀！
Dabi，有咁多人錫你，你真係幸福！
你要健健康康咁長大，就係我地咁多人既期望啦！
屋企既人去左台灣睇花博，得返我同老公，老公話今日佢會返工...點知今朝起身見到紙條話工人姐姐病左，嗚.....
其實我真係好擔心，第一日自己同Dabi搏鬥，點知就連老公同工人姐姐都離我而去，得唔得呢？我呢個緊張大師緊係覺得唔得啦，我點會對自己有信心呢？
今日嘉嘉姨姨(結左婚就係姨姨架啦！)黎探Dabi，佢超有心，明明粗身大細仲山長水又遠黎，我都覺得唔好意思。黎到仲要無得抱Dabi又無得食薑醋，唯有希望你生左biubiu之後好快可以抱啦～不過都唔好意思，黎到Dabi又食奶，點知之後又喊極唔收聲，由2pm-8pm都係眼仔碌碌，搞到你黎到好似無咩可以玩B咁... ＜相片後補＞
晚上99話入黎煲湯比我飲，當然好啦，點知原來佢只係入黎煲湯，之後要去返學喎！下...真係辛苦曬佢！仲要係見佢買既料，只係煲一個鐘，竟然可以入曬味，可想而知佢係用幾重料去煲呢....
可能自己都覺得Dabi硬淨左，我開始打直抱佢，佢又ok喎，成隻袋鼠咁響我心口，好搞笑架...
餵人奶真係每個奶媽既煩惱，好想比最好既BB，但往往都會令自己好大壓力：怕佢食唔飽、怕自己餵既姿勢唔岩、怕佢去唔到便便、怕佢重得唔好....但衰唔衰我又真係好想好想餵！
今日Meggie帶左Phoebe黎探Dabi，我同老公一直都覺得佢好勁，已經為3子女之母，教個套我唔敢話好好，但我見Phoebe既成長，我覺得真係已經好唔錯。例子一：同我地去旅行時，Phoebe好似6個月大，已經識自己攞匙羹食野；例子二：個個小朋友都喊，佢喊住叫媽咪既時候，識自己去攞紙巾抺完眼淚先同媽咪講野；例子三：有次同佢飲茶食龍眼，佢識自己成粒放落口之後，吐返粒核出黎。
當然...仲有好多其他例子，所以不得不令我同老公都會去請教佢。佢話佢餵人奶餵到5個月，嘩，好漫長呀！不過我覺得只要開到個頭，就好自然會一直餵落去。當然唔少得抱Dabi既手勢都係好熟練；今日佢又教我地另一傑作：勒住佢痾屎！
雖然未成功，但至少令我地知道點樣train Dabi去廁所，特別係佢好怕dirty，少少野就響到喊，叫到拆天，早幫佢戒到片片，係我地舒服。
今晚就決定唔再餵bottle，再戰全埋身媽媽奶！
Yeah～
今朝起身見到呢隻Dabi B訓得超可愛！你睇，訓到拗曬腰咁，勁搞笑！
今日媽咪既朋友黎探Dabi B，兩個Auntie都係睇住我大，今日已經成家立室，仲有埋自己既Dabi B啦～
媽咪今日帶左好多朋友既禮物黎，多謝曬！
最搞笑係姑媽買左件6個月既，條褲已經係成個人咁長，哈哈哈....
今日首次發現Dabi B已經識扭抱啦，唔係嘛！16日人仔咋喎，咁快識？
另外，我呢個亞媽都有新發現，只要佢食得飽就打得暈，決定比佢食飽夜晚個餐，咁我地就有覺好訓囉！
今日爸B幫你沖涼，仲幫你影左好多....肉照，嘻嘻！
不過，仲比我捉你唔到....佢鍾意咩都放入口，無論係手套仔、毛巾、手仔、衫仔，只要係埋到佢口，就可以放入口。哪怕你比你隻手佢，佢都可以放埋入口！比佢激屎～
佢既手手腳腳都好多動作架，有時左踏右，右踏左，有時就腳趾痴腳趾，好可愛。
晚上Emma同Simon一齊黎探我，好開心，有佢地響到我就好開心架啦！連Emma知我有壓力，都會同我講笑話，超開心超豐富既一個晚上，酒微菜薄唔好介意，好朋友可能就係咁，有你地我就開心架啦！
是晚試下pump奶，嘩嘩嘩...竟然有6安，勁呀，奶媽！我都估唔到自己有咁多奶。
今晚大大又響到，佢幫我餵尋晚個d，佢食到110ml呀，勁！仲比大大打暈左，有覺好訓囉！
尋晚又係咁啦，唔同既係我pump左出黎，試下佢食幾多。佢食左110ml，諗住收工，點知佢又勁喊，唔收聲，咪叫老公開多左支奶比佢囉，點知佢飲左10ml又唔飲啦！咁唔代表佢肯訓，最尾佢都係要食住我個linlin先肯訓，不過個時已經係.....5am！
真係人都癲....
究竟應該點做呢？
到呢家都未摸清Dabi B想要咩，好唔開心架；不過當我見到佢咁百變既表情，突然又開心返曬！
今晚老公幫Dabi換片片既時候，我忍唔住幫佢地兩父子影相。
回想起老公第一天幫Dabi B沖涼，係超雞手鴨腳，到今時今日，佢換片片，已經係技巧超級勁！
而Dabi B，一日比一日多表情～
開眼既日子唔多，所以我地都覺得好珍貴，盡量都影低。
今日爸爸迫佢玩玩具....
同場加映跛姑婆送比Dabi B既玩具！係一對襪仔，但會有噹噹聲，好搞笑！
尋晚無覺好訓，唔知係咪出完街呢？餵完佢11點個餐，諗住訓，點知佢唔訓，食極都係喊，結果++補左兩安奶比佢，佢食曬又訓喎！下...唔通我唔夠奶比佢？超唔開心...
仲記得出院個日，姑娘話Dabi既臍帶好乾身，唔洗一日洗幾次，同埋應該好快甩。
我滿心歡喜期待呢一日來臨，但去到Day10都唔見佢甩，有少少擔心，唔係話7-10日咩？
但係呢兩日有少少血水，姑姐話應該就甩。結果，今朝老公幫Dabi換片片，我幫佢整返件衫之際，噢！臍帶唔見左既？等我亞媽仲叫我留起佢添！
幸好，抱返Dabi訓個時，發現有野un住佢，睇一睇，原來係個臍帶～
今日下午約左第一次去母嬰，點知大表姐上午打黎話想黎探B，幸好佢都就到時間，同Mose一齊黎～
Mose黎到之後，我仲以為佢唔聲唔聲，原來佢已經勁多野講，嘈嘈嘈，係咁爸B媽me咁...
第一次幫Dabi扮靚靚，同佢去街街，仲戴埋帽，好開心。表姐夫仲可以車我地去母嬰，唔駛諗揸車泊邊咁煩。幸好++同老公今日有陪我去，佢地可以好快手咁幫亞B除衫著衫。
去到我原來係第10號籌，不過Dabi喊到傻左咁要食野，我唯有同佢去餵奶房，等老公同++響出面等。一路餵奶都有同對面餵奶既媽咪傾偈，聽到佢讚Dabi好白，哈哈，做亞媽既幾飄飄然。今日同Dabi上磅，佢比起之前無除衫，佢今日重3.31kg，開心屎我。
之後姑娘原來打錯我個名，係咁叫係咁叫，幸好我都有入到去問佢係咪叫我。入到去姑娘問我有無餵人奶問題，佢問我Dabi有幾多濕片，同埋睇佢重量，就話佢重得好好，又話片片夠多，叫我唔駛擔心。支持我全埋身，唔駛擔心咁多野...
唉，做亞媽係咁多野諗架啦，做人奶媽唔易做架！
雖然係咁，我都努力全埋身緊....
之後老公抱住Dabi，我就揹住個袋，兩條友照樣響沙田行街....嘻嘻....係行街，因為兩條友好似坐月坐到就黎癲咁，有得出街就不停行行行。行到Dabi差唔多夠鐘食奶，我地就返屋企lu....
今日約左生完Dabi B之後，去吳醫生度覆診。
++今日要幫手去湊BB，所以我地誠邀左大大入黎幫手睇住BB，等老公可以陪我去覆診。
去到吳醫生度，佢話我子宮已經收縮得好好，餵人奶真係好大幫助，原來original size應該好似係7.5cm，我呢家已經摸唔到，用u/s照都只係8.9cm左右，醫生話收到好好。加上傷口又埋得好好，醫生叫我唔駛擔心。
我八八卦卦咁問佢，唔知會唔會醫院磅錯，點解亞B好似上次重得咁多？佢又開始返佢既爛gag，話都係佢估計先岩，應該係3.18KG，比佢激死！
睇完醫生，呢個亞媽好似好耐無行街咁，老公陪我係咁行，去下呢度去下個度，臨尾仲去買多個沙翁食先走。
點知返到屋企，大大話佢已經喊左成個鐘，嗚...
「爸B媽Me係咁去街，唔理我，又唔比奶我食....」
「傻豬黎既，媽咪肚餓去買野食之嘛～」
返到屋企，餵飽呢隻豬仔，就可以好乖咁訓訓啦！
繼上次大大黎有得沖涼，今日又再有得沖涼，yeah～
今日發現新pose，佢平時橫抱時，可能因為聞到我既奶蘇味，係咁聞係咁食；今日我試下放佢響大脾打直咁同佢傾，佢又真係無喊，幾開心咁望住我。
尋晚佢訓既時候，我試下唔整醒佢，點知佢真係訓到5個鐘，唔通咁快可以戒夜奶？
今日叔叔嬸嬸黎探Dabi B，因為佢地約好曬今日去睇清明上河圖。
叔叔真係超有心，見Dabi B不停咁訓，肯鵝左佢半粒鐘，嘈醒佢～
去到爸B幫佢沖涼，就發左癲咁係咁喊，想用手打爸B！
但其實佢落水沖既時候，明明係好開心架嘛～
借機打爸B....
今日終於影到佢奸笑個個樣啦～
今日公公同婆婆都黎探Dabi B呀，每次公公見到佢都冧曬咁既樣，都係佢超錫粒孫架啦！
Dabi B既樣真係每一日都響到變，今日我又覺得佢重手左，大個左～
一家五口既合照，我相信是我一直都期待既一張合照。
終於可以有自己既寶寶，終於可以親親自己既寶寶，Dabi B，我愛你！
-------------------------------------------------------------------------------------------------
餵人奶相信是每一個媽咪既期望，成日覺得人奶是提供最好既給寶寶。
小桃都唔例外，一開頭響醫院，姑娘讚我上奶上得好，話Dabi B食得好，係老公同我講：「我愛你！」一樣咁感動。
但著實我諗係我對自己無信心，之前佢每邊食15min都未夠飽，今日佢食一邊20min就已經唔食。我又好擔心佢食一邊唔夠飽，但佢又訓左，點整都唔醒，真係令到人好frustrated。
如果only食一邊唔食，咁會唔會收奶架？
超多野要擔心既媽咪.....
-------------------------------------------------------------------------------------------------
尋日晚飯個餐，一黎自己八卦想知自己有幾多奶，二黎見Dabi B食完15分鐘之後唔係好食，我又開始好谷，所以忍唔住走左去pump奶。
Pump完出黎有成4安(未計佢之前已經食左一邊15分鐘)，我都忍唔住覺得好勁！但點知一上網睇，又話原來要兩邊都pump夠15分鐘，大獲！我只係每邊pump左10分鐘咋，又話要pump清，但我又無！加上見Dabi B唔係好啜，搞緊都唔醒，同埋pump唔知咩影響，總之之後就好唔開心！連老公同++都問我仲乜，好似跌曬watt咁，我都唔知，只係知自己好唔開心。走左入房喊左陣....
之後就諗都係唔好pump啦，pump完原來好唔開心，我鍾意同Dabi B你既親密關係多D，你又肯啜，我唔應該對自己無信心。
尋日大大生日都要返工，今日又入黎做陪月，真係辛苦曬。
大大不停鼓勵我，叫我比信心自己，其實我係夠奶比Dabi B，只係我因為唔信自己有咁多奶，見人地無就覺得自己無可能咁快上到奶，覺得Dabi B唔夠飽only。仲叫我睇下自己係咁滴奶，點解唔信自己？
咁又係.....
今日我就全埋身，原來Dabi B都仲可以4個鐘左右先食，BB肚餓就會喊，唔會比面你，咁即係佢夠飽啦。片片又夠，都係比信心自己先！！
有專業大大響到，Dabi B好似今日都乖D咁既～
今晚睇黎有覺好訓！
Day6，Dabi B既食奶時間仲未係好定，但習慣地都係4個鐘先會叫要食奶，但我卻擔心佢食唔飽，我諗呢個係埋身餵BB每個媽媽都會面對既問題吧！
幸好我地有好既家人，自從試過Dabi B個晚唔訓之後，呢兩日既方法都係++睇住佢睇到3點，我同老公就9秒9入去勁訓，3點就出返黎接++既更。用左兩日，都work。
今朝有新發現，就係Dabi B噴屎。
話說佢每日都痾唔少，都痾得好密。點知今日當老公幫佢換片既時候，佢竟然....噴屎...我個時響toilet，老公單人匹馬都搞得掂，勁！
我真係好喜歡影低每一日既Dabi B，每一日都有新驚喜！
由於Dabi B出院既時候唔係黃疸高峰期，兒科醫生話BB響Day4-7日會係高峰期，所以要我地響今日 - Baby Day5既時候去覆診，check下黃疸，睇下佢既情況點！
邊個話坐月唔出街？我地響Day5已經出左街lu，雖然我呢個媽咪仲係著到成隻糭咁。幸好++可以陪我地一齊去覆診，有佢響到，我地呢兩個新手爸媽都輕鬆不少。
去到先知仁安係咁豪華，真係貴野真係唔同d。同Dabi B上磅，嘩，佢已經3.44kg？呢家唔係收水期咩？即刻令我地3個都覺得Dabi B出世唔止3kg咁重，如果唔係點會幾日就重左0.44kg咁多？
見嚴醫生，佢話Dabi B既黃疸好好，出院既時候90幾，呢家都係130幾，所以confirm唔駛照燈，仲話佢重得好好。
我仲問左好多餵人奶既問題，醫生可能覺得我太過緊張，係咁同我講，我諗你太緊張，唔駛set個routine出黎既！你太多rules想去跟啦～(咁都比你知道？！)
見到醫生，佢就poo poo啦，馬上同佢換完片片之後，再去上磅，今次3.38kg，放左少少poo poo果然輕返少少。
返到屋企又係時候食milk milk，好鐘意掃佢風，佢個雙下巴響到震下震下既時候，好可愛呀！
下午，大大終於響美國回歸lu，等到你啦！今日有大大，好似好多野都易handle左，哈哈....
晚上TKY上左黎，送左厚禮不特止，知我地初生既衫仔唔夠，仲加左碼比我地，多謝曬！我最鍾意幫Dabi扮女仔，唔駛擔心。
尋晚唔知Dabi B仲乜，明明第一晚訓得好好架嘛，尋晚....
佢成晚都唔知搞咩，鬼打都無咁精神，喊就間唔時，但就抱又唔訓，放低又唔訓。好難訓著左之後，唔夠半個鐘又醒。成晚都無乜訓過，真係人都癲。
朝早我直頭係同Dabi過左62房，留返老公響自己房訓，自己同佢搏鬥，直至12點幾，屋企有人，Dabi就乖乖咁訓.....
因為係黃疸高風期，所以我都唔敢懶，睇住Dabi B，不過同佢搏鬥左一整晚，幸好今日有好既家人黎，可以幫手睇住佢，我同老公馬上中午後去眠一眠。
「我唔聽我唔聽，你唔好鬧我呀！」
真係比你激死～
是晚，我都不知幾擔心，好想你乖乖咁訓。幾有母愛咁？！
仔呀仔，你乖乖啦，媽咪同爸B真係想好好休息，你乖乖好嗎？
第一晚響屋企訓，佢可能好好訓，係媽me就無覺好訓，可能係第一晚，我成晚訓少少就醒，擔心佢訓得唔好，擔心佢有野整住佢，擔心佢喊自己唔知....
今朝見到佢，個感覺真係好真實。
由於未完全上曬奶，我仲嘔緊bottle，Dabi B食得好乖。
無幾耐，老公既朋友黎左探BB，仲買左我好想買既禮物比Dabi B，超岩心水。大家似乎都好錫Dabi B，Dabi有咁多Uncle錫，真好。
今日，公公仲入埋黎探Dabi B，係公公第一次抱Dabi B。佢超搞笑，開頭明明話唔叫醒Dabi，我叫佢抱都唔抱，但我一抱起Dabi比佢，佢就超開心，係咁同Dabi B響到玩。
咁可愛既小朋友，真係令人愛不釋手！
仔呀仔，點解你可愛成咁既？！
順產4日3夜既package今日就要出院，今朝真係好擔心架，因為都要等埋兒科，睇下Dabi B既黃疸高唔高，先可以confirm佢可唔可以出院。
吳醫生一早黎左，佢就話我可以出院。7點半去餵Dabi B既時候，兒科嚴醫生岩岩去睇佢，尋日嚴醫生話如果Dabi既血型同我一樣，佢黃疸高既風險會低d。Thanks God，今日既血液報告出黎，佢所有野都正常，連血型都係同我一樣。黃疸指數係90幾，但醫生話今日只係Day 2，通常要到Day4-5先係高峰期，所以話今日Dabi B可以同我一齊出院，但就過兩日返反覆診。
無野開心過可以同亞囝一齊出院！多得老公同++，我既出院衫厚到不得了！最特別係要著襪咁著拖鞋，潮look～
返到屋企，大家都好雀躍咁想抱下Dabi B，呢個豬仔真係好可愛呀～
點解你訓著都咁可愛既？
你今日出院，爸B已經處男下海幫你沖白白，原來你都幾鍾意玩水水架喎！
而哥哥同埋佢女朋友好快就黎左，我哥哥真係好鍾意小朋友，第一次見佢響facebook好開心咁話比人知佢做左大舅父，笑屎！
而我自己個人就好like仁安送比我地呢本Album，係Dabi B張開眼睛既相，最搞笑係醫院比我既時候，佢比左一本我，我睇下睇下，點解Dabi個樣唔同左咁多既？唔通真係人地講既日日都變得咁緊要？哈哈哈...原來比錯左我，好在大家都有check jeh！
我張相仲比仁安upload左上佢地醫院個website，自己忍唔住睇其他個d，就覺得...Dabi，點解你咁可愛既？
夜後，爸B幫你影相，我又覺得你唔同左啦！仲見到好深既雙眼皮，唔知你似邊個多D呢？
