蔡B@15wk0d (我們失守了！)

忍手多次，我們倆常常去看，我成日已經忍唔住去一田同埋樓下個層行，但著實自己知道會有好多人買野比亞B，同埋唔駛去呢D咁貴既地方買。
加上我地有++，佢可以為蔡B預備最抵亦是最好，邊D要多，邊D要少，佢一一都知。有妹妹真好～

今日一家人去飲完茶，我地去左九龍城，本想睇下和尚袍比蔡B，但++話可能花園街仲平，所以我地就只係買左少少好平既item。

Mami勉強可以戴到你條口水肩，但Babi條肥頸，點都扣唔埋，好好笑。

我知我知，唔駛買咁多；我知我知，唔駛咁早買.....
就比我放縱一下～

同場買左衫仔比細佬B，忍唔住，如果蔡B咁快著到就好了n.n！

貳零壹零年生日第N擊

老公既好友們說那天不能一起食飯，唔好意思，今日要唱K補足！

其實有左蔡B之後，我都唔敢去唱K睇戲，其實我真係唔知可唔可以做(有經驗者，歡迎告訴我呢個大頭蝦媽咪)！

我一口就答應了，我相信蔡B都同意唔好拒絕人地一番心意，我地帶埋個日意外地買左個無cream但有豬屎既同大家分享～

唱完K之後，仲可以去食左我超鍾意食既碗仔翅！

貳零壹零年正日生日第二擊

今年劉爹娘決定正日跟我慶祝食飯，開心既係今年因為公眾假期，舅母又回歸(聽日就會返澳洲)，所以今日有好多人出席，仲誠邀左我奶奶出席！

一班人熱熱鬧鬧咁樣去食飯，我好多野都唔食得，變左buffet係絕對唔揀得，大家因為遷就我，就比我自己揀去邊食，食過幾次尖咀"滬江"都好唔錯，決定encore！

一行十二人，好鬼熱鬧，最開心既係，叫野食既我打開餐牌樣樣都叫，樣樣例牌portion唔多，岩我想樣樣都食少少既為食妹～食得開心，傾得開心；就到切蛋糕既時候，揀左屁屁蛋糕，所以超興奮，開心到講唔到野！

要數最搞笑莫過於係侍應哥哥比把刀我既時候，係一把超大把既牛肉刀，好搞笑！

影合照時，估唔到有個老外都黎助慶，明顯地係想一齊食埋一份啦！

多謝各人既禮物，厚愛，呢個生日我真係超開心，多謝蔡B陪住我一齊過，有你呢個大洗既媽咪都只係想將最好既都留比你！

多謝屋企人，每年都為我花這麼多既心思；多謝老公，你呢幾日每一天都要為我傷腦筋，辛苦曬！

我很滿足

貳零壹零年正日生日第一擊

昨晚收到老公的生日咭，很可愛，是5個可愛的小老公(熊)，他在每一個小熊寫的字都是那麼的有心思，謝謝。

今年是公眾假期，老公要為我的午餐也作了準備，之前說了很多遍，帶我去錦田吃這一家餐廳，但多次都沒有去。就是因為Open Rice的評價不太好，但我常跟他說，不緊要，自己試過才算吧。今天，我們來這裡午餐，老公說裝修了，漂亮了。
這裡很偏，真係無車黎都唔知點黎，幸好有車位泊車，有一點像馬鞍山西沙的感覺。出名是食扒或豬手(下，又係豬手，唔好啦)，所以我地兩個每人都叫左一set，很特別的是Garlic Bread是用籠仔上了。

我食既係牛扒，老公食既係羊扒，都好好味。

吃完梗係出返去影相，黎到14wk5d，可能係緊身衫，亞B走曬出黎，哈哈。
我諗第時比亞B睇返自己咁樣，應該都好好笑。

這星期睇住個天氣forecast，由好天到落雨，到前幾天見到傾盆大雨，都諗住今天唔會有好天氣，但真的超開心，竟是雨中見到太陽，影到自己想影既相，也不錯吧。

謝謝老公，帶我黎呢個地方，唔好信Open Rice，都好好味呀，唔駛擔心。你為我所安排的都是最好的，不用擔心！

貳零壹零年生日第二篇

這天的飯局是老公代替我的announcement。
那天他在facebook跟他的好友約了一個event，說慶祝我有左，點知....這一個event就在他的facebook其他朋友中news feed都清晰可見，結果就連我的朋友有他的facebook都知道了這件喜事。每一個人都來恭賀我們，哈。
就是這樣，就大家約在今天順道慶祝小妹的生日。
良生的女朋友在Ruby Tuesday申請了VIP，有50% discount，未來兩年我們多多機會都有得吃。
食物也是偏大碟，有很多會員的優惠，最好味是相中的古古力蛋糕(Tallcake)，這是良生女朋友做會員是經理送給她的禮物。超好味....真的必叫！

另外這一項+$66可以一次任拿的沙律，吃得大家超飽。
當然唔少得叫Ribs，今次叫的配了這一個雞翼，辣辣的超好味。
而這個迷你漢堡3個裝也可把每一款都試了。

很美味的一餐，雖然錯配了一個豬屎蛋糕，但也是滿滿的，開心的。
回家已經11:45pm，意想不到的是嘉慧在12:00am拿出超靚的Prama Ham漢堡蛋糕，真的超滾動。
每一層也是有Prama Ham的，還有上面刻有Happy Birthday的心思，真的好靚，好開心。

這樣就踏入新的一年，簡簡單單，但多了一個新成員。

貳零壹零年生日第一篇

今年既生日是特別的一天，是難得的公眾假期，回想幾年前，我曾因為男朋友（現在的老公大人）沒有請假而悶悶不樂，哈哈...想起也覺得自己細路女。
今年家人提議正日與我慶祝，所以老公就提議我們二人提早慶祝。
老公這星期都問我想食咩，其實唔知道係咪人大左，想要既都唔多，反而仲同老公講，唔駛諗咁食咁貴；要咩禮物？唔駛啦，真係無咩想要....

老公決定今天帶我去King Ludwig Beerhall食德國菜，本應有諗過去赤柱食，但今天天色雲變，所以都係去尖沙咀就夠了，逛逛Sogo就去開餐。
這裡吃的，最出名就只有咸豬手和腸仔，飲的就只有啤酒(我唔飲得)，所以老公就叫左一杯。

出名真係出名，食得超開心，真係好好味，老公話無論腸仔定係豬手，同啤酒都係絕配，可惜可惜。

用HSBC埋單，仲有件黑森林送，呵呵呵，抵曬。

吃得好開心既一餐，真的，有你在肚裡的小寶貝就足夠了。

蔡B產檢@13wk6d

首先多謝咁多Auntie既祝賀，蔡B同蔡媽咪都好好，其實睇返網上面既媽咪，我算陀得好c服，咁耐都只係嘔過一次，作嘔既情況就只係響返工後早起身刷牙有少少，絕對地無大家話既聞到飯味嘔！不過我真係唔鍾意食肉，呢樣就真，同埋對住家飯既興趣大減，鍾意老公帶我出去食酸同埋辣野(明明之前好唔辣得，呢家就好似無辣不歡咁)，不過大家又唔駛擔心，我既辣對大家黎講都只係少少辣～

今日本應想改遲一個星期先見您呢隻臭豬，但醫生個度Full曬，唯有照原定計劃都見下您啦！
約左5點見醫生，但我同老公3點幾已經響新城市實在行得有點累，幸好姑娘比我地早d上去～
仲超快有得見醫生...

一見到醫生，我仲對醫生講：「醫生，您剪左頭髮喎！」
醫生就一臉尷尬咁笑住摸摸頭話：「係呀，嘻嘻，好唔好睇呀？」

今日一開始，醫生就好興奮咁話見到蔡B既正面，佢仲扭曬腰咁樣，唔知想點？

醫生搞左兩搞佢先肯訓返好，嘩，又大隻左啦，今次佢又游左個頭仔去右邊，我第一時間就問醫生，中間黑色個個係咩黎架，原來係胃黎既！

醫生今次都問我地想唔想知，嘻嘻....我諗都可以開估啦～

照兩照仲搞到佢怕醜，搵手遮住塊面添！

之後醫生又用個隻野篤下我個肚，搞下蔡B，今次照得仲清楚少少，係啦係啦，知您係....

囝囝啦！我們的小王子 - 蔡B！

同場加映岩岩沐浴更衣完既超殘蔡Mami，嘩，老公唔影都唔知個肚呢家又大左，哈哈～

願您每天乖乖健康成長就好了！

嘉之厚禮

Mami都未出手，今日卻收到嘉姨姨送比你既小禮物，呵呵呵....

傻啦，唔駛買禮物，咁早縱壞蔡B，不過真係好靚，多謝曬！

Oscar Test @ 12wk2d

幸好響我有蔡B呢度時間，我有Tintin呢個早我兩個月既準媽咪，佢會提我好多野要注意，提我有咩食得唔食得，提我要book咩檢查，唔係對於第一次仲要無啦啦響無心理準備下有左蔡B既我，其實都幾無助(您知啦，無得話比人知，真係有苦自己知...)

我記得佢提我要book Oscar Test，我第一個反應係問佢：咩黎架？哈哈哈...

呢家諗返起都覺好笑，好在有佢咋，唔係我真係完全唔識要幾時做咩！
Oscar Test = 早期唐氏綜合症檢查，私家一定有得做，但好多人都會揀響威爾斯做，私家幾多錢我唔知道，好似都係差唔幾，但威記就係$1300大洋；最好既係即日有得攞report，就算您要趕返公司咩，您可以走先，姑娘即日內會打返比您，話比您知個結果；但私家就一定要2-3日之後先會知！

唔駛解釋都知Oscar Test係咩黎，如果您媽咪唔知，您問佢知唔知咩係抽羊水/絨毛，佢就一定知，但抽羊水/絨毛都有絕對既流產風險，所以呢家就有呢個Oscar Test，只可以響11-13周做，唔係會做唔到！
Oscar Test會用抽血同埋度頸皮去睇下亞B有無風險，有先要去做further test，當然做左，只係90%肯定亞B無唐氏，但無風險而又咩都有心理準備，呢家個個準媽媽都會去做！

記得要wk 6-8打去，咪會full booking，到時就要去返私家做。
－－－－－－－－－－－－－－－－－－－－－－－－－－－－－－－－－－－－－－

今日我約左10點做，開開心心扮好靚就同亞B去，尋晚同今朝都brief左亞B，講掂數。
10點45分左右，就已經叫我入房抽血，不得不讚呢個姑娘，我真係超怕抽血，但佢堅係抽完都唔知，真係邊夠您黎！抽完話比我聽抽完啦，見我好愕然，仲識講笑問我想唔想抽多支，哈！

之後就等得耐啦，因為照Oscar真係好睇你同埋人地個亞B合唔合作，人地唔合作，您都係要等！
幸好今日有奶奶陪我，傾到12點左右，先到我照，開頭呢個貪玩B都係屈埋左個身，仲揮揮手咁，臭B；醫生試下都係照唔到，唯有先照下腦仔、手仔、腳仔、心臟等，一切呢家都OK！
見到亞B，真係覺得好Miracle，佢兩個月前仲係一粒黑色野，今日已經可以連脊骨都有埋～

之後醫生就叫我轉去左，再轉返去右，先訓平，今次亞B就好合作，訓得乖乖比醫生照，但就young起兩隻臭腳比我地睇佢幾不滿。亞B都好合作，照左一陣就走人，仲有70%肯定左佢既性別。

呢張係亞B既大頭照，姑娘比我睇佢有鼻骨，上顎同下顎，臨走醫生仲話亞B呢家屬於中碼B，安心曬！

下午姑娘打黎話我個report係1:12741，即係低風險，唔駛擔心。
姑娘仲話約埋照結構，我聽到好多廣華生既都要自己出面約，真係好開心自己揀左威記！

又要等下一次先見到您啦！

蔡生蔡太要升呢

終於過左So Call既3個月，所有人迷信所講既3個月，唔穩定既3個月。
蔡生蔡太要升呢啦！
隆重而簡單地為大家介紹：
Our Little Prince - Choi B

響好多人眼中都問我地....嘩，咁心急呀？
雖然Choi B係一個意外，但我相信呢一份都係神為我地預備最好既禮物。
其實....
都係早左幾個月jer，大家都為呢個小生命而覺得好開心！

－－－－－－－－－－－－－－－－－－－－－－－－－－－－－－－－－
呢3個月裡面，真係要多謝我老公；佢比左無限既支持、愛我同Choi B，佢可以既都盡量抽時間陪我做產檢，將佢僅有既時間，基本上都比曬我同亞B。每晚就算亞B未聽到，佢都會同亞B傾完偈先訓，真係親親爹地。雖然突如其來既亞B，呢個準爹地真係多左好多煩惱，但佢真係超級錫我同亞B，可以比既，佢都一一比曬我同亞B，見佢為左要買樓，要讀Master，要做野，要....而煩惱既時候，佢對住我同亞B都係充滿住關心，充滿住愛，咁既老公(準爹地)，邊度搵？

另外唔少得就係蔡家上上下下，佢地對我呢個第一次做大肚婆，咩都緊張一餐，咩都話唔知食唔食得既大肚婆既包容、體諒，真係令我好感動，雖然無講出口，我都切切實實地感覺到您地對我既包容，真係感激萬分！

唔少得既就梗係自己個桃媽一家啦，媽咪基本上個個星期都會問下我幾時會返黎飲湯，整定曬花膠湯比我飲，又煮我食得既野，呢家先開始知做媽媽既偉大；桃爸就一知我檢查，一見到我就會問我有無唔舒服，係咁叫老公睇住我；而桃哥就仲搞笑，一早已經叫佢既同事朋友留曬BB野比我！

仲有就係天上的爸爸，我相信呢一個唔係一個意外，係您比我去經歷，響我搵工之前，比我知有左呢個小寶貝，比我去有充足既休息；再比我搵到份好好既工作，就算知我係準媽媽都唔介意，真係體貼入微！
－－－－－－－－－－－－－－－－－－－－－－－－－－－－－－－－－－

對不起，亞B所有肉照都會私有化，如果您係我既朋友，我會慢慢將之前既Post開返比blog友仔，之後既blog友仔都可以睇到，但未係blog友既，歡迎大家留言，但由於亞B既事比較私隱，恕小妹未能100%肯定一定會加大家做Blog友～
望見諒！

小小註：其實我之前已經成日update左blog唔記得set privacy，唔少blog友仔都知道左，真大頭蝦，不過開心事我唔mind同大家分享架！