嘉嘉生日晚餐@Morton's

是日晚上，DD特登book左Sharaton既Morton's同嘉嘉慶生。
明明唔係法國菜，但唔知點解要由7點半食到11點都未食完～
但我欣賞既係，每一枱佢都好有心機有一個Staff將佢既Steak/Seafood攞出黎同您介紹，我地個枱個人叫Leslie...，真係幾好service。
不過可能真係唔岩我地胃口，唔係佢個扒唔好食，但真係超厚，開頭我地見咁貴，以為真係因為酒店所以咁貴，點知原來係勁大塊，食到main既時候，其實除左我之外，佢地個個都已經5-7成飽左。
但我地食佢個扒，如果叫medium rare就太生，如果叫medium就大熟，好似好奇怪咁...

咁之但係同嘉嘉慶生，最緊要大家都開開心心....

我個人特別欣賞佢個menu，真係會寫埋嘉嘉個名上去，個menu仲可以帶走添！

生日快樂！

同場加映大肚照一張：

個個都話我呢個媽咪開始見肚啦，6個月先黎見肚，都唔知搞乜～

你今日M左未呀？

++地已經響美國返黎一段日子，一直都好想影低！

相當出名既blogger公主嫁到呢排幫人搞緊上網訂獨一無二既M&Ms，響自己既婚禮用，令我又再次諗起呢盒野。
佢呢家每一日都放響出門前最當眼處，每一日都問我地：「你今日M左未呀？」

好靚，真係好靚，我個人真係超喜愛！

Bamix之果汁體驗

尋日見有生果向我同老公招手，見響屋企望住個電視唔知做乜好，又黎....
我個杯係蘋果慘汁，點知太多渣，飲極都飲唔到水，好似搞爛左D渣咁～
老公個杯係藍莓火龍果汁，聽日去廁所一定超開心！

不過有特別發現係每次整藍莓既野，無論係乜果汁，放得耐都會杰pat pat咁，有無人可以話比我知點解呀？

果然係聽大家話，落火龍果真係水好多，老公都話甜d，好飲d！

HapPY BiRTHday to Kawai

嘉嘉大一歲啦!!
同哥哥特登唔訓住等佢返黎，可能嘉嘉都知我地會等佢，12點，一齊切蛋糕！

生日快樂！
最重要係，我地4個人又一齊食左成個蛋糕，仲要食得曬！

相中見到仍然牙痛中既威威...

蔡媽咪倩影again@24wk4d

呢個爸B&媽mi，一係就唔影，一係就日日影！
今日咁岩攞開相機，又影下個肚仔先～
比起之前著呢件衫，呢家既我，已經輕易咁見到個肚啦！

今日仲屎x痕咁走左去Mannings買$300野join佢既Mann咭，點知join完先知....
所有嬰兒產品係無優惠架
後悔都無用，join左咪當多個優惠囉！

同場加映：見到呢兩枝核突野，忍唔住買返黎比小朋友，佢...真係好樣衰！

淘/桃之睡衣

見大家都係咁話我件睡衣靚，仲可以著出街，呵呵呵...
忍唔住自己響到飄飄然咁(喂，唔係讚緊你喎！)
唔緊要唔緊要...好野都係要同大家分享～

今日試埋另一件深藍色波點，都係好靚，呢一次真係...
淘/桃得好！！

蔡媽咪倩影again@24wk3d

過下又一個星期，過下又一個星期，明明之前同老公講係每個星期都同Dabi影張相，呢家都係記得先影...
對比上面張banner相，咁又4個星期，個肚明顯已經大左好多，就連公司既同事仔都話呢家終於覺得您見肚啦！
咁樣我諗我係應該開心既，嘻嘻...
至少我開始享有大肚婆既福利....

我諗對於做亞Mami既，最開心，莫過於見到自己既小朋友肥肥白白，呢家肥B未肥媽，仲唔開心屎我咩？但根據我既食量，我感覺到...我正在努力吹波中！

我肥唔緊要，最緊要都係亞囝您健健康康，肥肥白白！

個抓呀.....

如果有睇Toy Story3既話，應該知我講乜～

自從我有左Dabi之後，睇動畫係多左好多，至少我已經響老公既電腦裡面睇返：
Cars
Toy Story 1
Toy Story 2
史迪迪
Shrek
怪獸公司

.
.
.
etc

早響上個星期，已經睇左Shrek終結篇，好睇，我真係幾鍾意呢套戲。

但苦等大家11年既Toy Story3，我地又點可以錯過呢？
本應想睇IMAX版，但原來佢唔係3日前買飛架喎，一早全院滿座，唯有揀左Elements。
後悔既係我地無揀英文版睇，總係覺得咁樣先係原汁原味。

我諗小朋友睇既時候，可能真係只係得啖笑，但我地呢班有返咁上下年紀既人去睇，真係另有一番風味。特別係搬屋比較多，或者對某一件玩具特別有情意結既朋友仔...
我同老公睇完都係百般滋味在心頭，我諗住細細個個隻Mochhichi(其實我仲記得係二舅父送架)，諗起呢家響屋企既亞屁；老公諗起間房要裝修時，一件又一件唔要既玩具...
或者人都係要失去先識得珍惜吧！

但我倆都超喜愛巴斯光年講西班牙話個幾幕，真係笑爆肚。

估唔到睇完之後，我地明明已經響戲院食左包，食左Pop Corn，但出返黎都係再食dinner....

Element有小王子既display，好精美，忍唔住走既時候同佢影張相。

勁正！

最重要係消費$180已經有6個鐘唔駛錢泊車，我同老公係咪咩店都閂曬都要行多陣呢？

爸B親DaBi

爸B話要親親DaBi先可以訓喎！

其實我都好想同DaBi咁親密呀...

雖然我知您唔可以好似我咁日日24小時都對住DaBi～
明顯二人爭寵中！

Bamix之Smoothies體驗

我無放棄我既Bamix，買返黎其實暫時主要都係整雪糕同飲品，不過黎黎去去都係個幾樣，就唔post出黎比大家睇。
不過，今日我好似成功左...

因為我上次打奶既時候，打極都打唔到企起，想整Smoothies失敗，只係整Milkshake。
今次，我都係用返同一款奶 - 我最愛既澳洲奶，唔知點解，打得起好多，當然要企身仍然唔係做得好firm，但少少奶可以打到2/3杯咁高，勁高興。
仲加埋老公愛既芒果，芒果Smoothies，成功！

BB物資@奶樽

其實響好早之前，我地兩公婆已經忍唔住買左野比DaBi，特別係去日本個一次，我地係最敗家，明知日本好貴，但就總係覺得寫明日本製既，乜都好少少，所以寧願貴少少都想買比DaBi。
今日咁岩去開大圍食飯，就同老公講，不如去姿彩睇下。
(姿彩 - 都係專賣BB野，好似護協咁，價錢就同護協差唔多，但就因為響大圍，超方便老公去買野同埋泊車)
入到去，我以為老公會咩都唔比我買住，只係睇下。點知...
佢係仲瘋狂過我，個Sales一話咩做特價，佢就話不如買定先，超搞笑；都係因為呢個爸B大疼愛呢個小寶貝啦！
結果，響tintin既介紹之下，同埋我既控制下，我只係買左一大一細既ChuChu玻璃奶樽，買ChuChu係因為上網睇過佢既膠係唔知咩咩咩，總之比較安全；買玻璃係因為聽人講，佢既成份最無害，始終膠就係膠嘛。買返去係為左試下跛跛轉贈既奶樽消毒器岩唔岩用。
如果大家對ChuChu有任何意見/建議比我，都超歡迎！

睇得出爸B超錫呢個小寶寶，唔知點解，比我知道佢錫自己仲要開心！
好明顯係因為我呢個老婆知道老公已經超錫我...滿足ing...

我的低能湊B之道

一直都係馬仔既Super fans，由第一本既低能之道，去到呢家既我的低能湊B之道，我屋企都有齊曬。
仲記得上一年，都係有人去書展幫我帶大肚之道同埋旅行之道返黎。
返到黎之後，睇幾睇就大肚，岩曬....
今年，有++幫我去書展，將低能湊B之道帶返黎，都係...
睇幾睇就要開始我既湊B之道，岩曬....
雖然幾十蚊我通常一晚就睇曬，今次都唔例外，但睇到能引起大家既共鳴，不停自己白白痴痴咁響到：「係呀，係呀！」您都咪話唔搞野。

多謝馬仔，湊B咁忙都為我地帶黎歡樂！

蔡媽咪倩影again@23wk1d

又忍唔住捉老公幫我影大肚相...
開始覺得DaBi可以響我肚入面既日子已經越黎越少，好多人都話我未見肚，好似轉個頭到個肚大既時候，就已經到DaBi出世既日子，嗚...唔捨得，我真係好鍾意呢個豬仔響我肚入面玩既日子，可能係呢世人同個囝最close既日子黎架嘛！
但當然，另一邊箱，我又好想快D見到DaBi出世，見佢young手young腳咁，一定好搞笑！
心情...um...真係堅矛盾！

咁岩沖完涼，都係唔好見樣，但著左岩岩淘返黎既睡衣，都唔錯呀～超舒服喎！
睇返張相，即刻同老公講：「嘩，原來我個肚咁大架啦！」

老公反而同我講：「係您唔知仲乜鬼成日著咁鬆身既衫去遮住佢之嘛！=.="」

爸媽倩影＠21wk

那天難得可以去得到咁靚既地方，天氣又好，我地都忍唔住影埋大肚相。
雖然都好似唔係好見肚，但仍然見到小小隆起啦～

仲有老公爸爸親DaBi相，我真係覺得您好錫DaBi(聽唔聽到我呢個老婆媽咪響到呷醋中)....

小意外@Mami

尋日有小意外發生，話說Mami去vv既時候，突然見到un un有少少啡，真係好少好少個隻，諗住無咩事。但都問左tintin，諗住聽下佢講咩，點知佢話叫我即刻去睇醫生，話呢家呢個時候既Mami，應該少少少少既血/啡都唔應該有。
之後我就打去問姑娘，點知姑娘話醫生問我可唔可以即刻去睇佢，下，好似好大件事咁既？
當時已經差唔多收工，去得黎都趕唔切，所以我就約左今日一早去。
不過成晚其實我都好擔心，幸好您呢隻傻豬豬不停不停咁踢住Mami個肚，話比我知您無事，仲玩水玩得好開心。

今日一早，我就去左睇吳醫生。
佢話唔一定個個都搵到原因，睇下我有無機會早產，有機會有人係咩原因都搵唔到。
第一樣野梗係睇下呢隻傻豬豬啦，佢呢家已經睇唔到全身照，醫生一look，已經話佢肥du du，好可愛；佢今日就好似跳水王子咁，不停用手抱住自己既膝頭，而對腳就young起，向住Mami個肚，不知玩得幾開心。怪唔知得Mami日日都feel到您腳young young啦～
我真係覺得您唔再似ET仔，呢家好可愛啦！

醫生第一下睇，就見到您正面，您真係好乖仔，次次都會知道我地見面，比我地見個正面。

之後當然係同Mami檢查，點知，醫生一睇就知道....
原來Mami有粒息肉，所以先會有少少啡，醫生話唔痛，仲建議我做左佢好d，我都唔敢怠慢，唔想影響您，所以...就即刻叫醫生做左佢。
結果...
(以下相片可能會引起情緒不安，要由家長陪同收看)
.
.
.
.
.
.
.
.
.
.
.
.
.
.
.
.
.
.
.

好嘔心，不過一天都光曬！

淘埋一份＠睡衣

經小sin子同埋tintin既推介，我又忍唔住買左下面既餵人奶睡衣。
其實我無做過research響香港買會幾多錢？但小sin子話香港貴好多，我就信。
淘寶呢個款好吸引，唔似大陸貨，正。
麻煩左tintin星期四幫我落單，今日，就已經收到貨。

我買左兩款，一款係藍色，一款係粉紅波點。
收到既時候，比我想像中仲要好，唯一錯既係，佢比左粉紅波點個件既size我，變左加大碼，但我度過，又唔覺得差好遠，所以都無退貨。

藍色個件特價$59，粉紅色個件$69，運費就係$34，為返都好抵，聽tintin講，其實如果要多件，運費都係差唔多，但我個人覺得兩件睡衣就足夠，所以無買到。
最鍾意係佢有埋條褲，真係好方便，值得推介。

爸爸給DaBi既第一份禮物

老公話今日要買份玩具比DaBi，但我地食完飯，只係得返Page One未閂門，而爸爸就一直都好鍾意小朋友自小陪養睇書既習慣(只不過DaBi未出世喎)。

所以爸爸買左呢份禮物比DaBi，佢係可以比DaBi沖住涼響到玩，搖下搖下仲可以噹噹聲，呢個係我同意買比佢既其中一個原因。
爸爸話應承左小朋友唔可以講大話，所以一定要買禮物，多謝老公爸爸！

我地已經叫左小寶貝做DaBi，原因係老公爸爸話佢係大B(即係第一胎)，所以叫下叫下，就叫左做DaBi啦！

當aNdY遇上AnDY's Room

一直都很想很想去Toy Story在CWB既大擺設，一直在飛卜見到很多很多不同朋友仔更新既相，今日打去問，佢地話下個星期就係Last Day啦，怕到時仲多人，所以老公決定今日帶我去，好野！
一路上看到好靚既天空，忍唔住影低～

去到已經夜麻麻啦，不過就爆多人，個個都爭住同三眼仔海影相，其實我地都預左影唔到無人流既相架啦，不過又覺得唔可以唔黎，幸好，唔係排曬隊，好快我地就可以同三眼仔影相。

三眼仔既另一邊，就係Buzz Light Year，不過太多人啦，得一個唔夠分，所以點影都影唔到，唯有上去Andy既房。

響咁大長床下面影相，原來都幾搞笑架喎，睇下Andy通上Woody，哈哈哈....

最開心係可以同佢影相，超肥超可愛。

老公話我地做緊第四隻三眼仔喎，不過，都影唔到無人響後面。

合照都係一樣，搵到人肯幫我地揸部咁重既機，已經好唔錯。

雖然係爆多人，不過都慶幸自己有黎到既，幾可愛。

由於大肚既關係，唔可以做危險動作，只可以交比老公，但影出黎都好似唔係好似響個玩具盒入面既？

之後兩公婆去左食翡翠拉麵小籠包，估唔到沙田等唔到位，響呢度居然等一陣就有位。仲換到3小時唔駛錢泊車，good曬。
期待可以去一齊睇Toy Story 3！

威院照結構@21wk1d

上星期去左吳醫生度照結構，見到DaBi安安全全都好放心。
本應唔想攞咁多假，有諗過唔去威院做埋照結構，但一黎難得威院自己安排埋比我做(好多朋友仔響廣華係完成無得安排，要自己比錢出去做)，二黎呢個都係大檢查之一，威院keep埋自己record都好；所以問左朋友仔之後，都係決定去埋威院。
上午先返左工，下午就自己先坐車去威院。由於尋日整親既豬腳，今日仲係吉下吉下，要用紗布包住隻腳行。諗住今日見醫生可以問埋。去到平時做開產檢個座，點知...原來佢個位原來響另一座，所以我就要再去另一橦。
去到靜英英，幸好有個好心未來爹地話比我知坐響到等就可以，無幾耐我老公都黎埋，呵呵呵...有人陪。

估唔到威院都好唔錯，佢會先幫媽咪check左個子宮先，睇下有無早產既機會。不過...由於有個醫學生響到，講曬國語咁，佢地兩個響度您一句，我一句，我都聽唔明。唯有自己問一問，幸好佢話我都無事，呢家睇都無咩早產既機會。
之後就去另一間房，另一個醫生就invite埋老公爸爸入去，可以一齊睇BB。佢幫亞B每一part都照得好清楚，不過今日亞B搵個背脊向住醫生，睇極都睇唔到個樣。最尾要個醫生搵野墊住我個pat pat，look亞B上D，雖然都仲係搵個背脊向住我地，但都有好到，醫生都可以清楚睇到亞B個鼻同個咀咀。
幸好亞B都好乖，好合作，好快就可以走lu。
威院個檢查真係做得好詳細，雖然咩都唔可以帶走，但知道亞B健康最緊要。

DaBi，我地同老公爸爸一齊努力，您要比心機呀！

豬腳Mami

餵食之過...

成個杯麵既熱水倒左落隻腳度，熱到喊，真係好痛，所以忍唔住喊！
呢家成隻腳都紅曬，點算？

貳零壹零年漆月肆日寶馬告別篇

老公為左蔡B，我地要換車啦！
呢架係老公好鍾意既車，見佢對呢架車既愛錫就知道：行到咁上下就會去換油，每次泊車盡量都揀有蓋，露天如非必要都唔揀，間唔時竟打蠟，比人整花左少少就拎去噴油，etc。
只不過，呢架車只係揸左年半，屋企好多人都提老公，我個肚越黎越大坐load得咁低既車就會好辛苦，所以....終於...佢換返架5門車，唔再揸自私的車。

新既車呢家仲裝備中，所以我地就先帶呢家寶貝去影相留念。（之前既車，老公係唔會特登搵個地方同佢影相）
特別呢排天氣咁好，點可以唔同佢影相呢？老公想搵個影到個天又影到山又影到車既地方，呢度的確係一個好唔錯既選擇。

有好既天氣，真係咩相都好易影得靚，個天藍到我都嘩嘩聲。

呢架車影出黎真係好靚，可能我對白色車都有情意結，我特別鍾意佢。雖然佢真係好自私，上車唔方便，但...知道要換車之後，我同老公一樣，都係咁唔捨得。

今日可以充當老公既Model，哈，超開心。右下呢一張，我覺得好似影緊CarPlus咁，哈哈哈....

雖然您同我地一齊既日子好短，不過就好似老公咁講，可能有一日，我地會揸返您既新一代呢？

希望下一個主人會比我地更懂愛惜您！
多謝老公您作出咁大既犧牲。

後記：明明只係同老公出去影左一個鐘相，我竟然有少少中暑既感覺，返到屋企既晚上，仲發現自己燒燶左，明顯地皮膚紅紅的。（都未計同一日我自己整杯麵食，燙傷左自己隻腳仔，變左豬腳）
真係禍不單行～