Dabi@Day212 - 七個月成長印記

Blog已經追唔切，主要原因係媽媽懶執相，執得黎個仔又醒，邊有時間寫blog？加上呢家看仔好似捉馬騮咁，著實無曬私人時間。
不過....我都總係想記低佢既成長印記。我覺得好重要架～

飲食方面
由之前Dabi轉左做半人奶，去到1/6，我地終於正正式式咁同媽媽奶講左bye bye。
主要原因係因為唔夠奶，你可以話我都懶pump，所以demand同supply齊齊少，亞仔亦都知道唔駛啜得咁辛苦有得食，比佢埋親身佢都好快甩咀，而我亦都覺得餵左6個幾月人奶，已經對我黎講係超額完成。～值得掌聲鼓勵(國語)～

由1/6佢已經全奶粉，食既係A+，始終對我黎講大牌子有信心。
之前就食4-5安，係架，因為佢食人奶食得少嘛，所以我都唔想迫佢加得咁快。
但慢慢地，我地發現佢食Nuk既黃咀，好似排唔到氣咁，咁岩5月尾見到Tintin，佢地叫我試下轉咀，Pigeon又平又易買，咪諗住買一個試下囉。
點知....真係飲到巴巴聲，呢家已經係餐餐5安起，6安止，夜晚個餐仲係飲7安既添。

做亞媽，見到個仔食得好，我都不知幾開心。
當然磅數都相當顯著咁上升，咁一直企穩14磅唔郁，去到呢家我諗15磅已經走唔甩。雖然仲係響最低生長線，不過對我黎講，就已經好安落啦。我唔係要佢變肥仔，只係想佢健健康康啫。

至於食固體，對於媽媽都仲係一個難題。
難題在於，我比曬心機整比佢既，佢食兩啖就灑手擰頭；即食米糊/Can Food，佢就食曬。唉.......
所以呢家佢仲係一餐米糊，主打都係食生果。
食過咩？
鍾意食：蕉/ 蘋果/ 啤梨/ 西瓜/ 南瓜/ 紅蘿蔔/ 蕃薯
唔鍾意食：粟米/ 節瓜/ 鯇魚/ 菜心
粥就仲未成功，不過開始摸到佢要咩texture，我都仲要繼續努力。

水就仲係唔係好肯飲。
要買唔同既有味野返黎比佢飲先可以。
大約每日只係飲到30-50ml。

便便方面
仍然唔係日日有。不過就自從我迫佢每日都飲少少水，佢又飲夠奶，就變得隔日都有。仲要係食米糊既時候，坐坐下就會無啦啦便便。
不過就仍然唔鍾意我勒佢poo-poo～
希望佢可以快少少食粥，就可以regular啦。

訓覺豬方面
夜晚個覺唔駛抱住暗訓，放落床仔，聽下音樂，15分鐘內就會KO。
每日呢家訓覺既schedule都好定。
而今個月，我地開始11點就開始比佢食奶，所以通常23:30就會KO。
但可惜既係...佢今個月唔知搞咩，晚晚半夜4點-5點就會眼仔碌碌咁醒。
佢唔喊架，不過就唔肯訓，要抱返暗佢同放大人床一齊訓。
晚晚都係咁，真係辛苦屎。

驚喜方面
就梗係佢除左可以hands-free咁坐之外，已經識爬。
仲爬得好快，所以就日日都捉馬騮。
不過就仲未識跪，所以未識自己坐響到。
但佢就成日覺得自己識企咁，好搞笑。

另外就係....
佢開始左出牙仔啦！岩岩開始爆啦爆啦爆啦.....

睇住你每一日咁長大長大長大！
我真係好開心

Dabi@Day209 - I Love DAD!

細佬B有好多衫過左去Dabi B度，我作為亞媽既，都不知幾想多謝細細。
今日襯爸爸返工，我就同Dabi B裝身，等爸爸有個驚喜。

唔駛問，爸爸一返到黎，一定開心屎。
再加埋呢個冧到爆既笑容，已經將爸爸俘虜左。

呢家Dabi B已經好叻叻，我係完成唔駛怕佢跌，佢就已經識得自己玩。

呢期仲識踎響到，不過唔識「叔」腳，所以未識自己坐。

呢個小朋友仲越黎越鬼馬，真係氹屎人。

Dabi@Day207 - 下水禮

上次諗住開開心心同Dabi B下水禮，點知....
粗心大意既亞爸亞媽唔知咁既天氣，去到暖水池都仲係好凍。
唉......落左水唔夠兩分鐘就同佢上水。
梗係啦，連我自己都覺凍，點比亞仔游？

不過同Wickey買左個水泡，問過威威佢話至少要曬幾日先可以落水。
所以...唯有同佢試下響屋企游水。
哈哈哈....
放曬玩具仔，呢個小朋友都好開心，只係唔知係咪我唔識用，Dabi有少少飲水。
所以要托住呢個小朋友。

放開個水泡，佢就癲左。不停搵玩具玩。

同埋不停放入口。

至少知道佢唔怕水，期待下次同佢落泳池。