Jobi B@Day3 - 眼仔碌碌初二夜

今日已經係Jobi B Day3
呢幾日真係好特別，對住Dabi 14個月，未分開過
點知無啦啦要同佢分開幾日，我都好擔心
突然要生Jobi B，佢又病左，我不知幾怕
點知....佢唔太需要我響佢身邊都OK喎。

反而Jobi B就好搞笑
佢開始食人奶，當然響私家醫院有補奶粉
我亦未上奶上得好好
不過人地就只係怕bb食左樽唔埋身
Jobi b就只係肯埋身，一比奶樽佢，佢就O曬咀咁唔知發生咩事
點樣比個樽佢都唔食，要係咁掃風

咁樣雖然我就開心既，至少餵人奶唔駛擔心
但同樣地，就擔心我未上奶，令佢食唔夠

尋日妹妹仲係訓得比較多，但今日就眼仔碌碌好多啦！

JobI b@Day2

Dabi B VS Jobi B＠Day2 (都係咁似樣)

今日Jobi B望玻璃公仔既時候，姑娘舉起佢比我地影相，超搞笑

最鍾意仁安係因為佢有親子時間，同爸爸可以抱抱。
超可愛

病病既Dabi B都換套靚衫同大家拜個年，恭喜恭喜！

Jobi B@Day0 - 號外之Jobi生產記

各位等候期待Jobi既blog友仔....
我要宣佈Jobi B已經等唔切年初一，今日就出左黎同大家見面，逗返封利是啦！

話說尋日仲去吳醫生度產檢，個時仲係乜事都無，醫生話落得唔錯。
雖然同平時一樣行得辛苦，但都可以自己返屋企。
點知一返到去無耐就開始陣痛，仲要Dabi B岩岩發燒，燒到102度，我梗係好擔心啦。
但個肚又痛，所以都無法。
只係同Dabi B食左藥就同佢一齊訓。

一直都痛架啦，見唔係好regular，咪訓下先囉。
點知半夜３點幾已經無得訓，係咁大約10-15分鐘痛一次，亞仔可能病又好醒訓。

我都諗緊幾時要去醫院架啦，但去到朝早11點，我既陣痛開始好似又嚴重左。
見年廿九，爹爹地就話不如食餐好既先生啦，就車左去九龍城食日本野。
我都以為自己好輕鬆，點知已經唔係好食到野。

食完就諗住入院，入到去我話好似有少少作動，不過想痾左ｖｖ先。
姑娘仲唔比，一檢查已經開到３度。

嚇到佢地唔比我落床，要坐輪椅過待產室。
個時先岩岩登記入院，係15:23分。
之後老公同桃媽一齊陪我，我地仲有講有笑...

去到大約5點，醫生黎到就已經人手幫我穿水，再落催生。
因為佢話我痛得唔夠快，胎水已經有少少濁，所以要咁做。

之後呢一個鐘就好快，痛得好regular，成日都有想痾屎既感覺。
個時已經７度，好快已經入產房。個時大約６點。

但入到產房，我已經忍唔住，係咁想痾想痾咁，有兩次真係好似賴屎既感覺。
聞緊笑氣既時候，仲聽到姑娘係咁話已經fully左啦。
我想賴屎既時候，因為醫生未到，唔比我痾。
終於知道開到１０度既感覺係點，因為醫生一黎到，我就已經即刻自己生左。

上次Dabi出世，我同老公都只係覺得好醜樣。
但今次，我見到Jobi，我竟然係喊，好感動！

佢地兩兄妹真係好似樣呀～～～

今次笑氣聞得唔多，個人好清醒，又見到個胎盤有幾大，又清楚感覺到醫生聯針。
恭喜曬蔡家千金小姐，趕住出黎逗利是！

Dabi@Day426 - 十四月成長印記

我家既小王子就黎要做哥哥，唔知係咪因為咁呢？定係因為１歲後既BB真係大得貢快呢？
我覺得呢兩個月佢好似突飛猛進咁....
乜都聽得明，乜都識貢樣。
黎緊要做哥哥，其實我都好擔心自己比唔夠時間佢，所以我都盡量每一日放多少少親子時間，等你知道我呢個媽媽永遠都係咁錫你架。

飲食方面

仍然係一日５餐，每日兩餐固體。
不過有少少衝動想下午個餐奶轉做固體既下午茶
睇下幾時ready就轉左佢

便便方面
佢仲係好stable咁日日有poopoo。
不過呢期佢轉左食埋夜晚奶先poo，搞到夜左先訓

訓覺豬方面
呢方面真係好乖，可以越訓越晏，搞到我都唔知叫唔叫佢起身食奶咁
都好既，黎緊妹妹出世，我知到時你呢個八卦豬一定同我地一齊無覺好訓

牙仔方面
Dabi B第七隻牙仔已經面世，係左下門牙隔離個隻
不過右邊個隻就出極都得個洞，白色未見到，見佢就超牙痕，日日都發狂食手

牙牙學語方面
其實我真係覺得呢隻小鬼係好多野都聽得明，只係自己唔肯講
佢仲係乜都係Mama/ Mum Mum，只係十日唔埋有一日會無啦啦爸爸度。
不過我又覺得唔駛點迫佢，見佢都肯講野就ｏｋ

動作仔方面
佢已經越黎越仔，乜都係要擒，乜都關佢事
行就已經行得好穩，除非佢好攰，咪好少會有pk既情況
呢期多左同爸爸帶佢落平台公園玩，所以佢都好開心，玩都開放左
成日都自己爬條樓梯去sir，好得意，好好笑
呢期睇Barney最搞笑既係佢會跟埋一齊跳舞，超可愛