Dabi@Day142 - 公園去～

今日見到呢個傻豬豬既心情唔錯，就決定早少少同佢出去同婆婆影相。
你睇佢見到爸爸幾開心，幾嗲。

點知一上車佢就訓著左，幾驚佢心情欠佳，幸好接完婆婆之後，佢就醒，就去左公園啦。婆婆放佢響登登登登，同佢玩，佢就開心曬。
我同老公話，呢一張......
好似.....
高潮樣.....

大眼look look，好可愛。

佢話同爸爸一齊賞花...

同婆婆影，婆婆話要保持美態。

媽媽，影完未呀？其實我有少少眼訓架....

最麻煩既係，之後去左婆婆屋企，點知....
佢個下午覺，整極都唔肯訓，所以就係搞著自己。
下次都係響屋企訓完先去婆婆屋企玩lu....

Dabi@Day142 - 一家三口 樂也融融

尋晚玩完撳錢，就響爺爺張床影起相黎。
點知Dabi B都幾配合，識得望鏡頭。
差Dabi B唔笑咋，我覺得我同老公個笑容好一致。

Dabi B，你係我同爸爸既小寶貝。
We Love You！

唔少得就梗係比姑姐惡搞啦！
姑姐，我塊面仲要黎第時識女仔架....

媽媽，你成日都影影影，唔怕我凍親架？
不過，其實我好enjoy架....

Huggies BB四圍走 - Dabi出現啦！

早前好多謝好多謝大家支持Dabi玩既Huggies BB四圍走！
雖然....雖然Dabi B只係得百多票....不過....我真係好唔鍾意有D媽咪去人地個張相度拉票之餘，仲要咩投左我，就可以比返10票你個類。
所以後尾我都無乜心機再玩lu...覺得好似都無乜意思咁！

當然，咁樣就當然有好多好多好多媽咪不滿啦，我都覺得呢d係身教，唔好大教壞細。係人都覺得自己既bb係最得意架啦，我都唔例外。
幸好，Huggies可能為左平息大家既怒火，佢book左一個大既廣告，響銅鑼灣地鐵站！而Dabi B都可以成為當中既一份子。
咁遠，我就梗係無山長水又遠咁去啦，幸好哥哥既女朋友有去幫我影底作為留念。

聽到有朋友問我，話覺得Dabi B好得意，點解無獎？個一刻，我已經當Dabi B已經得左獎啦，有大家既支持同溺愛，仲唔夠咩？

再一次多謝大家既支持，Dabi B第一次做廣告明星仔，已經好開心，好足夠了！