Dabi@Day92 - 三個月成長印記

踏入三個月，對BB黎講係一個好重要既過度期。
因為好多人話過左3個月既BB，唔會咁扭計，可以戒夜奶..等。
總之咩都係好少少啦！

當然岩岩過左呢個milestone，都有好多好重要既消息可以分享。
其實Dabi岩岩出世有一樣野令我同老公都好困擾 - 佢食奶會食到扯曬蝦。
(即係一路食一路會he her he her咁叫)
由岩岩出世到兩個月既時候都有呢個問題，每次去健康院/打針睇醫生都會問。
而每次都只係聽到同一個答案：「有少部分既小朋友會咁架，唔駛擔心，可能係氣管比較窄，可能遲d就會無左呢d聲。有機會去到1歲仲有架，不過就唔駛咁擔心，到1歲都聽到就返黎再check啦！」

你話有邊個亞媽會唔擔心呀？
成日聽到佢響到he he her her，一日食5餐都聽5次。
出街食奶既時候，都會聽到身邊既人問我咩事？
........................................
好消息點知響呢個月發生左，開頭佢明顯係細聲左，慢慢地，直頭連聲都無埋。
嘩...真係聽到亞媽幾感動。
終於終於Dabi無事啦。

另一個好消息，就係佢出世，唔知點解，右邊個linlin有一點白色。
係呀，好似我咁，我就話yeast infection，點知佢又無啦啦有點白。
問姑娘/醫生都係話無事，遲少少就會無。
大大就話搵日用針幫佢挑，下...唔係啦卦？
響Dabi雙滿月個日，大大又講同一番說話，唔知係咪Dabi聽到呢？
之後有一日幫佢沖涼，無啦啦無啦啦見個點白色野無左。


好消息真係一個又一個，比我呢個災難小姐放心左好多。

不過另一個好大既難題又發生左，就係佢唔肯食奶樽，仲要厭奶。
其實對我呢個奶媽黎講，係好開心既事。
明顯地，亞囝係好痴我既表現，佢唔想同我分開。
但咁樣都唔係辦法，我一直諗住餵到佢出牙，咪實比佢咬爆。
呢家已經唔肯用奶樽，到出牙咁牙痕，仲唔咬爆你？
但當你見到呢個肥豬既體重無升，一直都係響呢個水平，真係唔到你唔擔心。
比佢食親，一陣佢就甩咀。爆喊，罷食。
比奶樽，睇下佢食幾多啦，當然開頭唔肯食，餵左一個鐘有多，都只係食得兩安。
下.............
片片用奶樽食時，都叫濕多少少，如果全埋身，就無咁濕。
唔通真係食唔夠？

食奶方面，佢由之前既一日7-8餐，到呢家5餐一日，3個鐘一餐。
已經係半埋身，早晚埋身，中間bottle feed雪奶。
但就明顯越食壞少，大家有無好方案呢？

便便方面，佢一日比起之前明顯少左次數，但就日日都有，次次都係人奶c，都仲未定時。

訓覺豬方面，12-1點就會去訓。不過今個月唔同左既係....我地開始比左奶咀佢食。點解？因為佢食手既情況太嚴重，我真係怕佢食曬菌落肚。雖然我知老公唔鍾意，但經我解釋之後，佢都ok左。總之唔係成日食，見佢食手或者訓覺既時候，就比佢食。所以呢家唔係好駛暗訓，放佢落床，佢就會自己食一陣滋滋訓。

Tummy time唔多，可能因為呢排凍左。
亦都因為佢開始識得反抗，會eerr咁叫你唔好咁整佢。
但笑呢一個技能，真係lum得屎人，佢真係一個開心寶寶。
你望住佢同佢玩，佢就會同你笑笑笑。

而媽媽餵人奶，就頭先都講左，都係盡人事。
試過同老公同個囝3個一齊喊，就係因為大家都唔捨得唔餵人奶。
但yeast infection都係唔離開我。
我又覺得點都要train下個仔用奶樽。
所以....希望都係餵得幾耐就幾耐啦～