° ♪ ☆與你一起走過的400天☆ ♪ °

原來不知不覺間，今日已經係同你一齊走過左第400天。

由一個乜都唔識既新手媽媽，到呢家由換片、沖涼、餵奶、暗訓都無問題既媽媽，我覺得呢400天真係無白過。

Dabi B岩岩出世時，我同老公講，人地話過左100日就會好湊好多

那時既我倆仲覺得遙遙無期

點知轉眼間已經過左4個100日啦~~~~

好多人問我，點解咁後生就放棄左自己既工作去做一個全職媽媽？

首先我要多謝我老公無限量精神上同金錢上既支持

其實我知道你係好辛苦架....(◕‿◕)

若然你比我揀多100次，我都寧願當一個全職媽媽

唔係因為全職媽媽un un腳，如果你係一個全職媽媽，我諗你先會明白

7days 24hours on call既400天，絕不好受！

但係你可以望住你既小寶貝每日唔同既變化，就算幾辛苦，你都有一種動力撐落去

雖然做一個全職媽媽係真係連病同痾紙既資格都無，不過我...真係好樂意！

呢400日我真係過得好開心

仲記得未生Dabi前，有同事提我要每日都對住BB笑

我真係記到呢家架，而Dabi B真係一個開心BB

每日見到佢開心、快樂既笑容，就算個一刻佢激親你，你都好想錫返佢

呢400日，Dabi B已經由一舊蕃薯長大左好多

由要我抱住，到學識坐，到呢家四圍行，原來只係400日

睇住你fing開我隻手要自己行既時候，我心酸一酸

原來你已經又獨立左好多啦！

但願你長大後，仍記得爸爸媽媽曾拖著你既小手學行路既情境

還有40多天，我地又要同另一個新生命見面啦

緊張、興奮、擔心....

我成日都記住呢句金句：「神既恩典夠你用」

神既恩典真係好豐厚，呢一年比我地一家四口的，很多很多！

Dabi & Jobi：

爸爸媽媽未必可以滿足你地物質上所有既要求，

但我地會盡力地比最好既野你地

希望你地都能有個開心愉快既童年！

Dabi@Day395 - 十三個月成長印記

轉眼間Dabi已經1歲零1個月啦～
有時望住佢自己響到玩，我都會諗，呢一年都已經唔記得我係點過？
但Dabi真係大個得好快，快到我都唔記得幾時佢學識左咩？

幸好有呢個blog，提我要每個月都搵少少時間寫低返。
比自己/比Dabi都係一個回憶。

呢一個月，我真係覺得佢大個仔左好多，好多野都係我呢頭做左，佢第二日就識咁樣。

飲食方面
仍舊係兩餐固體，一日5餐，每餐奶8安。

佢呢家只係肯飲水，甜野樣樣都唔岩。

便便方面
日日都有便便。

訓覺豬方面
好stable，我同爸爸有好日子過既感覺。不過黎緊出牙仔，又要再挨過。

驚喜方面
牙仔仲係6隻，不過就已經識得四周圍行架啦。
行得好穩陣，唔駛點睇住佢扶住佢，只係怕佢盲左咁撞埋d角度。

講野方面，就真係奇奇怪怪，呢期又無左爸爸，但要乜都係叫Mum Mum，無論要波波、野食、定係媽媽，都係咁叫。

動作就學得好快，係媽媽同爸爸唔好，教佢睇得電視多，呢家同佢講「司各脫」，佢識舉起雙手Yeah。
Hi/Bye、Give me Five、拍手都識，要乜野就會指，飛吻都學識左。
而今個月最新學識左請請，話曬都就黎新年嘛，唔教返佢兩野，點幫蔡家賺錢。哈哈哈....
跟住問佢野，佢真係想要個樣野，佢識得點頭話比你知係。當然唔係次次都中啦，不過十次八次都可以明白架啦。
唔少得既，梗係開始識得發脾四啦，遇著想要既野無，佢會扭架～

學野好快既小Dabi，我期待你比我更多既驚喜。

Dabi@Day376 - 我有學校返鳥!!!

唔好誤會，我唔係送Dabi去托兒所 (聽聞呢家托兒所都超full)。
只係今日第一次帶Dabi B去interview。

去邊，唔係名校，只係廣源邨樓下既一間基督教幼稚園。
但係我又好buy佢由校長親自打黎約interview，時間flexible，著重見埋爸爸。
去到知道佢地係家庭式教學，即係唔駛點考試，開開心心就放學個款。

我同老公真係好怕名校式教學，即係要買債券都已經驚，之後又話要考試，要小朋友響幾個歲前學識幾多生字....
講真，要讀既有排佢讀，唔係我地教唔到，但咁細個，唔係應該開開心心返去同小朋友玩下，唱下歌，食下茶點咩？
點解呢家既教育制度要咁呢？

我同老公既宗旨係想小朋友有個快樂既童年，唔係要佢學幾多個生字。
所以呢間真係好good fit，最重要係，佢interview時，根本都無問Dabi野，佢呢家先１歲，答到乜？
佢話最緊要同父母既理念夾，咁樣就無問題。

等收信我地就可以交留位費，Dabi出年有書讀鳥。
十二月入學做插班生，叻仔豬。

Jobi B@30wk2d

Jobi B轉眼間已經黎到懷孕旅程既尾聲。

我真係有內疚無好好咁記得陀住你既一點一滴。
不過湊住Dabi B再陀住你，有時間都想訓下，邊得黎blog呀？
再加埋轉左新版面，真係update既心機都無曬。

不過差唔多黎到旅程既尾聲，我先開始回想陀住你既點點滴滴。
其實陀妹妹真係無陀Dabi咁舒服，有孕吐，勁無胃口，岩岩有既時間輕左8磅左右。
但到呢家又好食得，大食積回歸。老公都驚。
不過可能湊住Dabi，Dabi又痴身，所以陀得好辛苦。
妹妹既起身腳真係非同小可，可能我已經忘記左陀Dabi係點，佢野野踢落黎都好堅。
兩兄妹裡應外合時，我真係叫曬救命架

不過我諗陀完呢一個，都有一陣子先可以plan生唔生/生下一個。
事關有仔有女，好多人都收工鳥。

但我總係覺得我同老公都想再生，因為睇住佢地成長真係一件如此快樂的事。
未生小朋友既你，如果你有諗緊生唔生呢個問題，真係要快d生。
生完同小朋友一齊經歷既，可以話係我一生中最快樂既日子。

Dabi@Day365 - 十二個月(1歲)成長印記

回想起舊年既9/11，我見紅，仲同兩隻妹去食Genki。個晚無得訓，第二日，嘉嘉係咁叫我入院我都唔想入住。
直到夜晚8點幾，我地食埋晚餐之後，我先慢慢咁去醫院。
經歷10幾個鐘既痛之後，我終於響11/11生左呢個小寶貝。

轉眼已經過左365日，Dabi已經1歲大。
呢一年，我只能夠講，真係過得好快，每一日都好開心。
呢個小寶貝每一日都為我製造左唔同既驚喜。我慶幸有呢個機會做全職媽媽，去同Dabi一齊成長。
佢既每一個第一次我都係同佢一齊經歷，呢一件係我相當開心既事。

今年已經忘記上一年既痛楚。哈哈哈

飲食方面
已經兩餐都係食固體，一日5餐，每餐奶8安。
所以每一日我地都可以開心輕鬆左好多，可能真係好似老公咁講，佢儲夠XP就會升呢，就會食固體。

佢呢家只係肯飲水，甜野樣樣都唔岩。

便便方面
呢期日日都有便便。

訓覺豬方面
已經變得好stable，我同爸爸好似有好日子過既感覺。

驚喜方面
已經出左6隻牙仔，其他就未有動靜。
響10月尾時，仲係一舊飯，唔肯放手行。點知無啦啦就響生日前一星期，日日都放手行黎行去。
所以佢已經叫係一個識行既小寶寶。

爸爸就叫得好清楚，只係媽媽就唔知去左邊。只係勁喊先會叫。

識Hi/Bye之後，呢家連Give me Five都識，識錫錫，冧屎我。又識拍手好野(呢樣一直都識，無寫低)。
指住d野要你攞比佢，好叻。自己識攞住叉叉放野食入口。
呢期連飛吻都識，真係估佢唔到。

Dabi B，你既成長真係叫我同爸爸好驚嘆，呢一年，多謝所有愛錫過Dabi B既人。
所有關心我地一家既blog友仔，我地一家4口都過得好好。
期待黎緊妹妹出世，雖然到時可能會仲少時間上blog，不過大家都可以add我FB做朋友仔。
(超唔鍾意呢家唔見曬blog友仔)

Dabi@Day334 - 十一個月成長印記

Dabi B已經黎到十一個月大，佢真係大個仔得好快。今個月真係發生左好大既變化。

飲食方面
本身佢一直都唔食固體，不過今個月佢第一次病倒了。
佢開頭有少少發燒，點知第二日已經又傷風又咳，成個人無曬精神。
即刻同佢去睇醫生，醫生話佢小支氣管炎，所以佢成日都有痰想咳出黎。
個幾日佢無曬精神，又唔想食野。奶都係食到亂曬時間，又嘔曬出黎。

點知，食完藥之後，開始好返之後....
佢終於終於終於終於開始食固體啦。我煲既粥佢食曬一大碗。
可能佢終於明白呢個世界有比粥粥更難食既野。

水就相當有進展，自從佢識用吸管飲水之後，日日都至少兩至三安，反而呢家比甜野佢唔飲。

便便方面
仍然唔係日日有，都隔日有。

訓覺豬方面
晚晚11點左右就會訓，訓到第二日七點左右。
爸爸咁要起身返工，咁佢餵埋奶就我暗返亞仔訓，爸爸返工。

驚喜方面
上面既牙仔一出出4隻。好堅，亦都明顯佢好扭計。
已經可以唔扶野咁行到一兩步，不過可能因為屋企用圍欄，所以佢仲未可以放心行出呢一步。
講野唔知點解，自從病完之後，就無左爸爸媽媽，只係得返D呀呀呀。
仍然只係識得Hi/ Bye，好熱情個款。

Dabi@Day303 - 十個月成長印記

轉眼間Dabi B已經黎到十個月大，回想起佢岩岩出世既樣子，我陣痛既時刻，所有野仲好似岩岩發生。
點知呢家轉個頭就話佢就黎一歲，而Jobi B就仲有幾個月就出世。
呢家終於明白點解人地話眨下眼就大。

工人終於返左黎，係我地之前無續約既工人，點知DD挖角，佢肯補返錢比呢家個僱主都返黎。
我都真係好安慰，我同老公都話要善待佢，唔好要佢咁辛苦。
而且佢有我上次生Dabi B時既坐月經驗，有佢真係放心好多。

飲食方面
今個月本應慢慢幫佢轉A+二仔，但佢竟然對二仔有抗拒。
咁佢呢個唔食固體既小朋友，我唯有繼續用返一仔，好過佢連奶都唔食嘛。

至於食固體，今個月我的起左心肝，每日都餵佢，佢食到大約半碗，之後就會唔食。我就補奶。
但有時又唔錯，可以一食就食到大半碗，咁我就連奶都唔補，等佢下一餐先食7安奶。
方法就只係燉，可能燉入味啦，佢先肯食。

鍾意食：生果類，最新連橙今個月都試埋，佢都OK
唔鍾意食：南瓜/三文魚(奇怪，只要料中有呢幾樣野，個日佢就食得幾啖)

水就相當有進展，自從佢識用吸管飲水之後，日日都至少兩至三安，反而呢家比甜野佢唔飲。

便便方面
仍然唔係日日有，都隔日有。

訓覺豬方面
睇黎又過左反彈既時間，佢除左要自己響大床碌黎碌去之外，就係晚晚11點左右就會訓，訓到第二日七點左右。
爸爸咁要起身返工，咁佢餵埋奶就我暗返亞仔訓，爸爸返工。
4-5點半夜起身既日子，好似已經過去，呢一個月只係有1-2次。

驚喜方面
上面既牙仔未有動靜，不過就好似想出想出咁。
識得扶住企，扶住行，好似好快會識行咁，有時仲會雙手乜都唔扶，企到一陣。
爸爸媽媽既發音都已經聽到，媽媽就係救命既意思，只要佢想叫救命就會有「媽媽」。而「爸爸」就比較常見，可能爸爸係佢既玩伴。仲有一個成日有既音係「娃娃」，唔知點解呢？
識得Hi/ Bye，好熱情個款，不過日日同佢玩Give me 5，都係唔比。
試過搵佢既玩具教佢貓貓/ 狗狗/ 鼠鼠，佢真係識搵返貓貓出黎，唔知係真定假呢？

每個月既驚喜都唔同，期待小寶貝你為我們繼續更多更多既驚喜！

(Day302: 佢自己除左條褲，唔知仲乜咁開心？)

Jobi B@18wk5d

我自己覺得新blog有少少難用，唔知係咪因為唔見曬blog友仔呢？
好似無乜心機打blog。

咪咪行動已經去到尾聲，希望真係趕得切啦！

今晚有時間，暗完亞仔訓，我又有少少肚餓，上黎update下Jobi B既近況比大家知道啦！
多謝大家既祝福，其實呢胎我陀得唔係咁好，去到12wk其實都仲有積血，又有流啡。
我係食安胎藥食到14wk架～
好多人問我關唔關湊Dabi B事，我自己就好樂觀咁覺得個個小生命都係好獨特既。
今胎12wk時，醫生幫我做左個詳細既檢查，佢話我胎盤有少少低，同埋仲有積血，所以會流啡。
咁我都會問醫生，關唔關我湊仔事啦，但醫生都話唔關事，只係咁岩你做ftm jeh！
食藥食到醫生開埋止血藥比我，食到16wk返去再睇既時候，醫生話積血已經無曬，唔駛擔心。
仲見到Jobi B同我地響到揮手，同埋young我肚仔tim。

不過奇怪既係，今胎既胎動遲過Dabi B。
亦都明顯溫柔過Dabi B，到呢家我都只係間唔時平訓時，會feel到小小既轉動。

至於Jobi B既性別，其實我都仲係半信半疑，哈哈....
因為....
She is our little Princess！


我既生囡夢終於可以完結，不過一日未生，我都仲覺得佢有機會係仔，可能係因為少d野卦。
不過今胎其實仔囡我都咁開心。

我今胎既孕吐去到14wk終於舒服左好多，亦都大食左好多。
而Jobi B亦都一日一日咁長大。


呢幾日響屋企湊住Dabi B，我響廚房洗緊奶樽，佢自己響Playmat玩緊。
但我見到佢自己一個坐響到，左手玩右手咁，好似好悶。
個一刻，我已經覺得佢好寂寞了！
所以我相當慶幸響4個多月後，佢會多一個伴陪佢玩。

我覺得老公講得好岩，送比Dabi B最好既禮物係一個細佬/細妹，陪住佢一齊成長。
Dabi B & Jobi B，Daddy & Mammy Love you Forever！

Dabi@Day273 - 九個月成長印記

又變成月記，無辦法，未有工人，陀一件湊一件，好甘。
加上有咪咪行動中，希望完成到。
嘈入九個月，Dabi B真係大個左好多，今個月我真係唔覺得佢係BB
佢已經知道咩做得，唔做得，佢做衰野既時候會望住我，我話唔做得，佢會扁咀，再話佢，佢會喊。
個人相當古惑，又薄皮，好多佢既性格響今個月出曬黎，亦開始要教佢。
所以今個月我係第一次打佢PAT PAT，真係打在佢身，痛在我心，我不知妁唔捨得；但我又知唔教佢，我又唔想佢變港童。
幾痛都要努力去教

飲食方面
Dabi B仍然係食緊A+一仔，我地想佢今個月慢慢咁轉二仔。
佢食奶仍然真係食得唔錯，呢家食緊6安，夜晚有時仲會去到7安。

至於食固體，仍然係一個難題。
難題在於，我比曬心機整比佢既，佢食兩啖就灑手擰頭。唉.......
粥/ABC粉樣樣都唔食，就連Can food都唔食。

勁鍾意食：巨峰提子
鍾意食：蕉/ 蘋果/ 啤梨/ 西瓜/ 金奇異果/ 木瓜/ 南瓜/ 紅蘿蔔/ 蕃薯
唔鍾意食：粟米/ 節瓜/ 鯇魚/ 菜心/ 西蘭花/

水就有進展，因為佢岩岩學識左用飲管飲水，送左份九個月大既禮物比我。

便便方面
今個月都唔錯，唔係日日有，都隔日有。
試過幾次知佢岩岩要去，放佢響大人Potty去痾，成功。
不過仲未會買bb potty，因為坐響廳，一定走左去。

訓覺豬方面
相當特別，之前一定要抱住黎暗訓，咪屎唔肯訓。
無啦啦早幾日突然唔比抱住，要典落床，自己訓。當然就係會爬黎爬去，要成日but佢隻腳令佢訓返低。
今個月都有少少進步，少左4-5點起身，起身唔理佢/拍低佢都會自己訓返。直至6點-7點左右。
不過就會成日大長碌，加上我地開始比佢同我地訓，只因我個肚開始大，唔想自己又起身又訓低，所以就放佢響我隔離，方便自己。

驚喜方面
佢下門牙已經出得好大隻，不過上面就流極口水都未出。
已經識得扶住企，扶住行，好似好快會識行咁。
好多音，我地發咩音，佢都會跟住講返，好搞笑。
好似獨立左，雖然仍然好痴我，不過有時我行開行埋洗奶樽都無問題。
好似唔同左樣，越黎越似爸爸；開心屎爸爸。
開始唔再係BB，已經越黎越好玩，好搞笑，真係又氹又冧屎人。

期待你既一歲生日！

蔡生蔡太又升呢

終於又過左So call既3個月。
蔡生蔡太又升呢啦！
我地隆重為大家介紹我地新既家庭成員：Jobi B

<揮手中既Jobi B@11wk2d>
我地仲未知Jobi B係仔仔定囡囡，我同老公都好期待。
講真，仔就岩Dabi B玩；囡呢，我同老公就會解左呢個生女情意結。
結論係....仔女都無所謂。嘻嘻！

Jobi B係預期中既意外，哈哈哈....
我同老公一直都想Dabi B兩歲前有個細佬/細妹，係plan左呢幾個月開工。
不過估唔到咁易中，咁快中。哈哈哈....
(可能係老公勁...呵呵呵)

過去呢3個月，真係要超級多謝老公大人。
自從佢知道我有左之後，基本上有佢我就唔駛餵奶湊仔，佢一手包辦。
工人唔黎之後，即刻比我請鐘點ee頂住先，唔駛我咁辛苦。
就連夜晚個餐半夜起身，都係老公搞掂。第朝仲要晨咁早返工呀，陰公！
但由於Jobi B唔係咁穩定，係，呢一胎陀得唔係咁舒服，經常又暈又嘔，仲要照超聲波既時候，見到響胎囊隔離有個積血，你都咪話唔擔心。
不過Jobi B好乖，由於我m期不定，我地一知道Jobi既存在，已經係wk6，一見醫生就話我有積血，但同時已經見到Jobi既心跳。
呢家仲係會間唔時流啡架，湊住個大，醫生叫我盡量休息，都真係只有盡量。

好多人問我地點解咁快？
不過我又好樂觀咁諗，湊一個又係咁湊，湊兩個又係咁湊。
係開頭既時候要少少時間去磨合下。
諗起佢地差個1年多，到時friend過打band咁出街，哈哈哈....
開心屎！！

<Dabi B，要熱烈地親親Jobi>

預產期係出年1月尾，我成日都同Jobi講，要過左初三先出黎，一黎醫生費好貴。二黎都等爸爸媽媽同埋Dabi B幫你逗埋利是先嘛。呵呵呵....

Dabi@Day242 - 八個月成長印記

無啦啦變左月記啦～
唉....
Dabi B，Mami會努力架，希望追唔切blog都有相為証。
轉眼就黎到八個月，時間真係過得好快，我呢家反而好唔捨得佢大得太快。

飲食方面
Dabi B仍然係食緊A+一仔，我地想佢至快九個月先轉二仔。
只係唔想佢肥得太快。
不過佢食奶真係食得唔錯，呢家食緊6安，夜晚有時仲會去到8安。
但係...佢試過兩次無啦啦嘔曬出黎，嚇到我同爸爸都唔敢再加奶。

至於食固體，對於媽媽都仍然係一個難題。
難題在於，我比曬心機整比佢既，佢食兩啖就灑手擰頭；就連佢之前最喜愛既Banana米糊，都say No。唉.......
粥/ABC粉樣樣都唔食，就連Can food都唔食。

勁鍾意食：巨峰提子
鍾意食：蕉/ 蘋果/ 啤梨/ 西瓜/ 金奇異果/ 木瓜/ 南瓜/ 紅蘿蔔/ 蕃薯
唔鍾意食：粟米/ 節瓜/ 鯇魚/ 菜心/ 西蘭花/

水就仲係唔係好肯飲。
要買唔同既有味野返黎比佢飲先可以。
大約每日只係飲到30-50ml。

便便方面
真係超開心，呢家佢日日都有poo-poo。
不過好奇怪，佢好鍾意食食下固體，無啦啦坐響到poo-poo。
咁樣就會變成我成日都勒唔到佢去。
希望遲d有改善。

訓覺豬方面
夜晚個覺唔駛抱住暗訓，放落床仔，聽下音樂，15分鐘內就會KO。
每日呢家訓覺既schedule都好定。
而今個月，我地再開始提早到22:45就開始比佢食奶，所以通常23:15就會KO。
但可惜既係...佢仍然係唔知搞咩，一星期總有4-5晚半夜4點-5點就會眼仔碌碌咁醒。
佢唔喊架，不過就唔肯訓，一係就同佢暗兩個鐘，一係就開枝奶比佢，KO完就會訓返。所以我同老公都揀後者。至少我同佢都有得訓。

驚喜方面
就之前仲係好似士兵咁爬，呢家已經識跪，又識正確既爬爬。
最緊要係識得駁腳，又識得企。

另外就係....
佢兩隻下門牙已經出曬，呢幾日見佢有少少憫，我諗佢有可能想出上面個兩隻啦！

睇住你每一日咁長大長大長大！
我真係好開心

Dabi@Day212 - 七個月成長印記

Blog已經追唔切，主要原因係媽媽懶執相，執得黎個仔又醒，邊有時間寫blog？加上呢家看仔好似捉馬騮咁，著實無曬私人時間。
不過....我都總係想記低佢既成長印記。我覺得好重要架～

飲食方面
由之前Dabi轉左做半人奶，去到1/6，我地終於正正式式咁同媽媽奶講左bye bye。
主要原因係因為唔夠奶，你可以話我都懶pump，所以demand同supply齊齊少，亞仔亦都知道唔駛啜得咁辛苦有得食，比佢埋親身佢都好快甩咀，而我亦都覺得餵左6個幾月人奶，已經對我黎講係超額完成。～值得掌聲鼓勵(國語)～

由1/6佢已經全奶粉，食既係A+，始終對我黎講大牌子有信心。
之前就食4-5安，係架，因為佢食人奶食得少嘛，所以我都唔想迫佢加得咁快。
但慢慢地，我地發現佢食Nuk既黃咀，好似排唔到氣咁，咁岩5月尾見到Tintin，佢地叫我試下轉咀，Pigeon又平又易買，咪諗住買一個試下囉。
點知....真係飲到巴巴聲，呢家已經係餐餐5安起，6安止，夜晚個餐仲係飲7安既添。

做亞媽，見到個仔食得好，我都不知幾開心。
當然磅數都相當顯著咁上升，咁一直企穩14磅唔郁，去到呢家我諗15磅已經走唔甩。雖然仲係響最低生長線，不過對我黎講，就已經好安落啦。我唔係要佢變肥仔，只係想佢健健康康啫。

至於食固體，對於媽媽都仲係一個難題。
難題在於，我比曬心機整比佢既，佢食兩啖就灑手擰頭；即食米糊/Can Food，佢就食曬。唉.......
所以呢家佢仲係一餐米糊，主打都係食生果。
食過咩？
鍾意食：蕉/ 蘋果/ 啤梨/ 西瓜/ 南瓜/ 紅蘿蔔/ 蕃薯
唔鍾意食：粟米/ 節瓜/ 鯇魚/ 菜心
粥就仲未成功，不過開始摸到佢要咩texture，我都仲要繼續努力。

水就仲係唔係好肯飲。
要買唔同既有味野返黎比佢飲先可以。
大約每日只係飲到30-50ml。

便便方面
仍然唔係日日有。不過就自從我迫佢每日都飲少少水，佢又飲夠奶，就變得隔日都有。仲要係食米糊既時候，坐坐下就會無啦啦便便。
不過就仍然唔鍾意我勒佢poo-poo～
希望佢可以快少少食粥，就可以regular啦。

訓覺豬方面
夜晚個覺唔駛抱住暗訓，放落床仔，聽下音樂，15分鐘內就會KO。
每日呢家訓覺既schedule都好定。
而今個月，我地開始11點就開始比佢食奶，所以通常23:30就會KO。
但可惜既係...佢今個月唔知搞咩，晚晚半夜4點-5點就會眼仔碌碌咁醒。
佢唔喊架，不過就唔肯訓，要抱返暗佢同放大人床一齊訓。
晚晚都係咁，真係辛苦屎。

驚喜方面
就梗係佢除左可以hands-free咁坐之外，已經識爬。
仲爬得好快，所以就日日都捉馬騮。
不過就仲未識跪，所以未識自己坐響到。
但佢就成日覺得自己識企咁，好搞笑。

另外就係....
佢開始左出牙仔啦！岩岩開始爆啦爆啦爆啦.....

睇住你每一日咁長大長大長大！
我真係好開心