廿五年黎年初二既煙花都唔會有我份，今年第廿六年都唔例外，我地年年都會同女麻女麻食開年飯！
今年一如以往會一早去婆婆屋企食午飯既開年飯，哈哈，今年我仲好乖咁個個都斟茶比佢地飲，梗係啦，每人逗多兩封利是喎，呵呵呵！見到我笑成咁就知我好豐收啦！
由於媽媽（未來奶奶）今日會入帝堡城拜年，我就食完午飯先去帝堡城，同媽媽拜左年先，估唔到佢地已經開緊局，仲有媽媽呢條大水魚添！
晚上我地就去尖沙咀食飯，因為已經封左路既關係，仲可以響馬路上面坐響到影相添！
去到既時候，佢地仲打緊牌。今年Kobe同Siby一人畫左一張揮春送比我地，超開心，仲會拎比您同您講：「大吉大利！」而我都整左個紅色既指甲花應節！
今年多左大表哥同埋玲表姐既利是，呵呵呵，好熱鬧，出年就....我都要派啦！
臨走比媽媽睇中左桃花，話要整相，哈，又幾靚喎～
晚上老友鬼鬼開戰，點知....迪捷好快就已經ByeBye左，仲搞到呢三個老友忙左成晚，搞咩咁醉呀？
新年將至，今晚年三十代表大家一年一度既抽獎時間又到啦！
今年都係大大煮大獲飯，唔開心既野唔好提，總之好多餸好好味～
雖然我同哥哥要先到碧濤同婆婆食年三十飯，不過今年唔同係預先同媽媽講好左，要早食早走，大家一切都好預備！
返到去大家都差唔多食完，好在我同哥哥都有幸仲食到大大既手勢，之後點少得既就係哥哥既影相時間....
睇下飲到面紅紅既跛跛，同埋大個左開始講野唔停既妹豬...
終於到抽獎時間，今年同舊年一樣都係有16個人參加，當然計埋無黎到既威威同埋嬸嬸啦！
有大喜有小喜，您睇我同哥哥、Kelvin同細細就已經睇到個分別，仲有個笑到飯左既妹豬一家三口照（細細，我超鍾意呢張家庭照），仲有我笑到見牙唔見眼既相！
結果公佈：
$1500得獎者 - 妹豬、小桃同埋LeeLee / $1000得獎者有嘉慧、滿哥同埋跛跛 / $800得獎者有BB同埋嬸嬸 / $600得獎者有哥哥同埋叔叔 / $500得獎者有強記，威威同埋大大 / 至於$300得獎者有細細、Kelvin同埋BB
一家人可能就係咁，好簡單就已經好開心！慶幸自己有得參與，您地無嫌棄我，同您地一齊真係好開心，我好期待以後每一年都同您地一齊過！
唔少得梗係影全家幅，同埋派利是，仲有Kelvin超凡技術既大頭照，好快樂既一晚！
跛跛，回應您個blog，出年會考慮買件新衫比未來老爺著架啦！
是日係陳BB既生日，跛跛話幫佢搞個心入派對，我同哥哥都應邀出席！
一去到最搞笑都係見到好耐無見既妹豬，同埋已經有左３個幾月既細細，唔知係咪因為細細有左呢？我更加覺得妹豬好似懂事左好多咁，講既多到我都唔信！
唔少得既當然係BB既鋼琴表演啦！
今年跛跛話最好唔好買玩具比BB做生日禮物，問買咩好，佢竟然話BB鍾意做個Ｄ補充測驗，唔係嘛，只不過係６歲既小朋友都有咁既嗜好？
最估唔到既係真係BB收到禮物時，真愛不釋手，想即刻做架喎！
之後細細話不如去市花行，我地就一齊去左個迷你市花行啦！妹豬一見到個老連咁大個既多多，錢都未比就抱住周圍走，哈哈...
陳BB，我祝您快高長大，入到間好既小學，學識同身邊既朋友仔分享分享啦！
由於我地兩個成日都響到諗轉唔轉場（怕唔夠擺）既緣故，一直我對攝錄同化妝都抱著只係搵，唔book住既心態，我真係怕到時落左訂，轉場轉日子人地唔得就大獲！
但經過磋商，發現就算陳慧琳結婚都只係擺50圍，無理由我地有咁勁，於是把心一橫就同哥哥傾好決定唔再轉場，積極為其他野做準備，而最緊要又未book既當然係攝錄同化妝啦！
雖然話就話我有要求，但對試mua呢樣野，我真係覺得唔想用曬d錢去試咁多個唔同mua既妝，平既試妝都係$400，貴一貴既都有，而見過其他人結婚，絕對覺得mua呢一筆係唔慳得，梗係啦，一生人最靚個人一次架啦嘛！
其實一直響我心目中都有幾個選擇：
1. Jacko Lee
小Joe介紹，響esdlife上面都超多人搵佢，約佢試妝起碼要等個幾月
2. 譚小環結婚時搵既化妝師
只係攞左資料，響金都，好似係台灣級既化妝
3. Hana生
日本學化妝既，同事Emily結婚搵我做姊妹時，佢幫我化過妝，快靚正，超勁！
心裡面一直都想搵Hana，但又怕貴，但原來我比較之下，價錢都算負擔到，但試妝費就比較貴，要成$800，esdlife上面無咩人講佢，我都1516左好耐。
最終，為左唔想左試右試，同Hana生傾完之後，就約左佢今日上去試妝。
一上到去，就已經幫我影左醜怪相，嘩，好殘。佢落足心機第一樣先搞好我條眉，我都話，邊個搞得好我條眉就一定揀佢。身為眉王，佢又點會整唔好呢？之後就好似畫畫咁搞好我個底，我個心仲一直響到諗，駛唔駛咁多野響我塊面到呢？
佢超細心，每一個步驟都幫我影張相，等我睇到個變化，又解釋點解個底咁重要！試完第一個妝，我就已經嘩左一聲，點解好似好厚既感覺，影出黎都可以自然成咁呢？真真正正岩我要求，我就係怕出去做新娘時，好油好濃妝既感覺，呢ｄ咁清既岩我岩我。
註:
由於有唔同姊妹問我Hana既聯絡方法同埋價錢,所以我post埋響呢度方便大家先:
1﹒ 新娘化粧及髮型設計 (早或晚) $1,800
2﹒ 新娘化粧及髮型設計 (早晚) $2,800
3﹒ 新娘化粧及髮型設計 (全 晚) $2,800
4﹒ 新娘化粧及髮型設計 (早+午+晚) $3,800
5﹒ 新娘化粧及髮型設計 (早+全晚) $4,500
6﹒ 新娘化粧及髮型設計 (早+午+全晚) $5,300~$9,800
7﹒ 伴娘or姊妹化粧及髮型設計 $380~$580
8﹒ 宴會化粧及髮型設計 $580
特別眼睫毛 $ 68up
試妝費 $500~$800
