全職婚禮統籌人

唔駛返工一星期，日日都係無事忙，唔係搞結婚野就係搞結婚野，死啦死啦，不知不覺間，已經變左全職既婚禮統籌人，不過都有好野既，就係呢家好多新娘子都會黎問我料，問我邊度book咩好，咁當然我都係只會以過來人身份分享一下，希望幫到大家。

除左呢個職位之外，我仲做左另外幾份part time，第一份梗係呢家都出名既cafe world

，明明佢就同restaurant city一樣，但自己就唔知點解沉迷到傻左，日日計住如果自己要出街，就要煮５個鐘既pizza，如果自己成日響屋企，就可以煮沙律，如果沖涼咩，就煮個串燒岩曬，沉迷到有５粒星。

老公超好，日日怕我唔出街會悶（我係宅女黎架嘛），返黎都話想陪我出去食飯，傻瓜，其實有您陪我已經好好了！
尋日佢話要快ｄ生返個蔡ｂ，等我有野做，唔駛咁悶，正傻瓜～

倒數59天

唔駛返工既日子，以為自己可以接生意返黎做，但呢幾日都係忙於搞自己既婚禮，真係接都唔敢接。

今日又走左去搞帖，帖既design已經接近尾聲，應該可以去印，但就仲未睇帖封，真係唔多ok，所以今日就走左去睇一轉，幸好都唔難搵，亦都唔貴。其實一直都怕自己會用太多$響呢個帖上面，話曬都係人地一收到就唔知會唔會掉埋一邊，但我自己仍有自己既堅持，一生人一次，無理由唔搞自己想搞既野。

再響同小Joe傾電話期間，講開未搞紅酒，佢就叫我不如上一上夏生個度，結果就係咁上去賣醉，原來咁既價都可以有咁好飲既紅酒，真係飲到我想再飲，仲想問佢單枝買，咁當然係無啦，下次帶埋哥哥上黎試完就掂曬！

晚上會合劉Auntie去睇喼，佢話係嫁妝之一，要佢買架喎，所以我地今日就走左去睇啦，佢仲話想睇多款d，不如去Sogo睇，明明我無心理準備要去cwb架嘛，搞到我著拖鞋咁ugly，幸好都無乜人會留意我呢個look jeh～

睇左唔係太貴就係唔靚，一係就無紅色，終於搵到兩個，左邊個個係軟喼，仲要係我最鍾意既桃紅色，呵呵呵！最尾拍版連哥哥都覺得特別，掂曬～

第時去旅行終於有我地兩個既喼啦，開心屎～

甜品宵夜

今晚劉Auntie同劉爹爹終於響九寨光榮回歸，玩左成個星期既佢地兩個，不亦樂乎！響晚飯期間，不停同我地兩個講中間遇到乜同乜，真係聽到都令我地鬼掛住舊年去九寨影婚紗相既感覺！

聽到佢地玩得開心，都係令我地放心既一個感覺黎既，自從我知道自己就黎嫁，成日都會好擔心佢地會好悶，但有時見到我唔係成日響佢地身邊，佢地開始比以前對我既依賴少左，少左爹爹叫我幫佢問媽咪野，我總係覺得都係好事，畢竟我係細囡，學輔導咁講，我成日都自己走左去做佢地既磨心，連自己都不自覺。

食完晚飯，哥哥今日話肯同我食甜品（我一向都有甜品癮），就再次去上次都試過唔錯既「皇室甜品」，第一次去諗住試下無妨，點知佢竟然係可以媲美隔離又出名個間「金滿堂」，仲要平過佢又大碗過佢，唔錯唔錯！

加上個老闆娘既服務態度，令我不得不讚，一定可以再去既感覺！

建房大業慶典

哥哥的好友很有心，知道我們裝修完工，即刻響Facebook搞左個「建房大業」，黎到我地屋企玩一整天～

由於我地有Ｋ歌之王響到，我地今日都先去唱個K，細細個既年代，同同學明明星期六可以訓晏Ｄ都唔會，總會去唱Lunch K，梗係啦，幾十蚊３個鐘，抵！但由返工開始，我地由幾十蚊唱到幾百蚊，咁岩有朋友要飲酒咩，就真係Oh No～今日我地竟然走左去唱下午K（老到唔記得個時段叫乜野），埋單只係幾十蚊，仲可以７個人７支咪，您話邊到搵？

6點幾我地就走左去買野食，地點就係去我地屋企打邊爐，應該叫一品鍋，因為響整個打邊爐既過程入面，雖然個面係滿曬，但當大家想搵筷子向鍋中搵野食既時候，您會發現，連鍋中心都係滿曬野食，搵唔到（=.="）

當大家問我野食熟未既時候，明明唔係我落既，我都話熟，可想而知大家幾咁信任我？！超放左落肚之後，就會有第二把聲話佢岩岩落架咋喎～

是晚慶典竟然係大富翁之夜，仲要係啤牌大富翁，最慘仔既係哥哥記錯左係我唔鍾意玩，第一round我係無玩到，結果今晚傑仔成為大贏家，連贏兩局～

展開人生另一頁

之前差不多兩個月沒有update自己個blog，係因為有大件事發生響自己身上（對我黎講可算是），小桃.....失業了！

在公司做了差不多兩年，想想公司大地震已經是一年多前的事，當時我真的擔心自己會被人炒，話曬自己個direct manager一定會覺得我是被請返黎迫走佢，我邊會有運行？當時既我，真真真係有搵過工，但一黎搵唔到，二黎係我真係想要個title，所以決定留底。

但呢一年半，我真係完完全全地唔開心，一時就係有人比鑊我，一時就係有人造我，總之就係瀉得一乾二淨，而我就會幾個月唔埋，有人同您review之前，就會同您講一d令您擔心，進退兩難既說話，例如「您都好危下！」擔心過後，又會安然渡過。

一路我同男朋友都有個共識就係結完婚就會唔做，一黎個title開始有用，二黎到時唔駛怕岩岩返工請唔到假，三黎就梗係出埋雙糧岩岩好啦～

點知....８月尾....我開始知道佢地請緊人，咁交曬戲既我去八既時候，就知我係比開刀個個，咁同事之間傾開既時候，都岩既...公司自己個brand個個月都唔到數，仲得返半年，點都要交個人出黎，加上我同佢關係又唔好，呢個係一個好好既機會！

幸好身邊有班好buddies，佢地提我要點樣去搞，有咩要準備，最終響３個月代通知金加埋有pro rata既雙糧下，尋日14/10我last day左！

呢段時間....我心情好複雜，所以一直都無咩心機update個blog，事實上我知道公司咁樣對我，我係超開心，因為我岩岩好有兩個月去prepare我既wedding，您知我既希望工程幾恐怖架啦，但同時間要面對人生既大事：失業、創業、結婚，我真係完全失控，我可不是喜歡打開手問屋企人攞$既人，一世女都未試過問屋企人攞多零用去買野，每一份工都係工接工，停不下來（賤命一條）。

幸好響呢段時間，咁岩有安排到去見輔導，佢問我覺得邊樣最重要（咁當然係結婚啦～），加上呢一個係我日求夜求既結果（我真係唔想做呢間公司好耐），最緊要既係，無論係我男朋友定屋企人，都係二百萬個支持，就算我話可能無得比家用一排，佢地都係話無問題，都支持我。

而我男朋友響呢段時間，真係擔當左一個好重要既角色，因為我知道我呢個幾月，係不停不停忐忑不安，一時就好開心，一時就會好擔心，最明顯係佢接親我放工，我就會不停數公司個幾個煎釀三寶，從而令自己覺得自己走左就最明智既決定，佢抱抱我，支持我，陪我一齊數，係對我最最最大既支持；更對我經濟上無限既支持，以前出街食飯，我地無分被此，成日邊個有銀包就邊個比，呢個幾月，佢係有意無意咁話佢比，等我可以有多d$傍身，又問我夠唔夠＄，真係超級感動！仲係咁叫我唔駛咁急搵工，想做乜都做，最緊要自己開心。
咁好既老公，邊度搵？

來到今天，已經開始唔駛返工，我將會開始搞自己結婚既野，同時會開始創業，比時間自己，得就得，唔得咪出黎再搵工，希望各新娘子會支持啦！始終都係我興趣嘛，有自己要求，無辦法，幸好呢家開既頭都唔錯，朋友仔既feedback都好鐘意！祝您地都有個難忘既wedding～

最後一天返工，我真係好輕鬆；今天唔駛返工，我更加感覺到呢兩年不停擔心比人造個種提心吊膽既感覺可以放下之後，係幾咁好。

倒數66日+結婚進度表第三回

倒數3個月唔整結婚進度表，因為自己有事發生左，呢兩日再update大家。
但響倒數既66天又唔知邊度黎既勇氣，都覺得係時候整返呢個表嚇下自己！
-------------------------------------------------------------------------------------------------------------

婚禮日期：貳零零玖年拾貳月拾捌日
註冊地點：道風山神學院明節堂
註冊時間：下午二時三十分
晚宴地點：九龍灣國際展貿中心13樓煌府海景宴會廳
開席時間：晚上八時正

工作人員名單
伴娘：Yoyo
伴郎：迪捷
姊妹：Yuen/ Joyee/ Wing/ Emily/ Alice/ Vissica/ Phyllis
兄弟：定宇/ 永良/ Patrick Man/ 力行/ Robert/ 威威/ Victor
花女：Siby（諗住搵埋Katie同埋妹豬）
花仔：Kobe
MC：定宇&Wing
教堂工作人員名單：未有
當日攝影攝錄：Tat @ Jack Creation & team

新娘
婚紗：France Bridal x 2 (一件行教堂用，一件march-in用)
晚裝：France Bridal x 2 + 顯卓 x 1 (會再試下顯卓會唔會有新款)
裙褂：上海街永隆
婚紛鞋：已選
晚裝鞋：未買
首飾：已租
化妝：Hana @ Hana Studio

新郎
馬褂：上海街永隆
禮服：France Bridal x 2 (1黑 + 1白)
新郎鞋：未買

四大長老+屋企人
媽媽禮服：顯卓 x 2 (23/10 final confirm款)
爹爹禮服：未買
奶奶禮服：顯卓 x 2 (23/10 final confirm款)
老爺禮服：未買
媽媽＆奶奶化妝：Hana's team
姑仔禮服：顯卓
伴娘禮服：顯卓
伴娘化妝：Hana's team

兄弟姊妹
姊妹裙：已訂造＠Sweet百利（米白+#86蝴蝶結）
姊妹化妝：Hana's team
兄弟呔：已訂（黑底+桃紅波點）

行禮準備
結婚戒指：周lung lung Love Diamond (要去改size)
戒指枕：未買
羽毛筆：未買
簽名筆：DIY，未搞
結婚證書套：已訂盟Blessing，11月中交貨
婚禮邀請咭：DIY (11月中要比Final Layout教堂)
婚禮場刊：DIY (11月中要比Final Layout教堂)
婚禮佈置：搵左資料打緊價

新房準備
新房裝修：已完成
新睡衣：已買
龍鳳被：已買

出門準備
茶壺：已買
紅傘：未買
利是封，貼紙：未買
囍字拉條，揮春：未買

雜項
婚紗相：(1)九寨溝@106視覺 - 08年6/11 - 12/11已影 (成品已收)
                 (2) France Bridal - 18/4 & 17/5 已影 (成品已收)
成長片段：10月底交相片到Jack Creation
音樂：有初步idea，未整好
主婚車：自己車
廿四座：給兄弟姊妹用（未租）
紅酒：未搵
結婚蛋糕：酒樓包
回門燒豬：已買，用太興燒肉劵代替
啤牌：未買
簽名布：France Bridal包，已取
場地佈置：九展煌府提供
西餅唐餅咭：美心&奇華（已DIY)
囍帖：已有初稿，未印
帖封：買返黎之後諗住DIY，未搞
帖封貼紙：買左返黎，有idea，未搞
台咭：DIY，未搞
花車公仔：已有，未整成花車公仔
新娘花球：Trince Flower
伴娘花球：DIY，未搞
主婚人襟花：諗緊DIY定響Trince Flower訂
兄弟姊妹襟花：DIY，未搞
傳統用品：上頭用品、包羅萬有利是封（未買）
婚前檢查：已完成＠家計會
賓客名單及座位表：追趕中
兄弟姊妹聚會：姊妹第一次gathering已完成
                              預計11月中兄弟+姊妹第一次gathering
                              11月尾姊妹第二次gathering

-------------------------------------------------------------------------------------------------------------
其實都好似幾on track咁呀.....

試新房．完工

一直鐵定於十月裝修，一直都的唔起心肝搵資料，一間房既裝修又唔係間間肯做，幸好疑似豬期間，可以搵師傅上黎睇下報下價，又有好多好熱心既esd朋友仔同埋屋企人，揀左之後，就馬上訂料，中秋之後開始裝修！

5/10 拆傢俬，裝電制
6/10 裝電制，送傢俬
7/10 裝傢俬
8/10 裝傢俬 (發現層板漏左，即訂，希望星期六送到，不過機會唔大)
9/10 痴牆紙
10/10 痴牆紙，裝燈，埋尾
          發現自己比錯床褥size師傅，要改，即刻OT改過，埋尾
　　  8點鐘完工～

成件事真係好感恩，中間其實好多蝦碌野，但師傅無發脾氣，仲幫我諗計，我真係好彩有呢個師傅，雖然佢手上有幾單大野，都肯跟我呢ｄ細野，我都不知幾感動！

７天完工真係響呢個蝦碌既環境下諗都諗唔到，但表伯同表伯娘返黎，真係要趕，結果今日佢加班都幫我搞掂埋，價錢合理，用料都唔錯，收口位又唔差，pass，可以上esd介紹返比朋友仔！

結果執屋執到４點，先可以訓覺～

第一次既雙人床，以為自己響酒店^___^

花左萬元既床褥，希望生生性性，訓得安心～

仲有我揀既燈燈燈....燈～
加埋自己好鍾意既dream catcher，我響澳洲買左響自己屋企用既時候，真係發少左好多惡夢！

仲可以紙盒藏屍....

紙盒藏肥屍亦可...

難為了家人比我地將d野放到周屋都係....超迫爆~

唔少得梗係幫我地趕工既名星師傅～