小朋友的快樂

就我所觀察，我老爺係超鍾意小朋友架，但佢都會有大細超之分，就好似佢契女咁，佢就超到燶，閒時就會同佢出去飲茶，帶佢去玩！
今日佢車左黎玩，由上午同佢飲茶，直至下晝響我地張床訓覺，到食飯見返佢既爹地媽咪一齊食飯，佢都同我地一齊！
我個人都幾欣賞佢媽咪教呢個女既方法，見到佢個女歲半自己可以用湯匙自己食野，喊仲識用紙巾自己抹眼淚.....

同場加映痴纏小情侶....

老公今日爬到上樹，超開心

我已經係Mrs.

呢排既我好珍惜星期六，因為老公呢家唔係返學就爬樹，連星期日既family day都無左，所以星期六老公放工之後，我真係好開心，因為可以等佢一齊食lun豬，一齊行下街！
今日老公話不如去新城市行下，哈，梗係好啦～
於是就係我地滿載而歸既一天，老公買左新既羽絨，我地兩個都買左新既行山鞋(不過我唔係要黎行山用)，老公又買左新衫比我，仲有既就係買cream，原來我一直都無做會員，今日佢叫我做，填資料既時候，發現原來自己已經係Mrs.，噢！

同場發現有佢兩母女既相，Jolie真係大得好快！

高消費者可得高消費既禮物，我個人好喜愛今年佢送既禮物，特別係個利樹封，呀，點解出面無得買既呢？

扮年貨~

我們倆今年一直都好想搵一件新年情侶衫過年，之前諗住去裕華一定無死，點知就真係貴到屎.....

幸好有桃媽呢個格價專家，話比我知邊度平，加上仲有Auntie既折扣，於是我地今日就恤發到北角去買啦～

泊好車梗係第一樣野食返雞蛋仔先啦！

買完之後，同老公響北角行黎行去都唔知食乜好，諗住去個街市，點知至少排半個鐘以上，諗住行到邊就是但食，都係揀唔到，行到差唔多去攞車，見到有間焗飯，就去試左，個時已經係九點幾，呀....又幾好味喎！

最開心係同您一齊，真係食乜都無所謂～

Wish for 2010

上個星期同Hubby行街，見到可愛既小黃雞，忍唔住帶左佢返屋企～
呢幾日有時間tidy up間房，順便放埋揮春～

我唔捨得個「囍」字，所以都係可以留響到，好多野，好似我既士帶勞！
祝Hubby學業進步啦！生意當然係發財發財啦～

最好的生日禮物

最好的生日禮物，我諗今年對婆婆黎講，應該係出院！
今日，當我諗好曬買咩去比佢食，我係買左我自己都唔捨得食既雞肶飯，去到醫院，估唔到佢咁忍得口(原因係話因為我奶奶今日去探佢)，仲要係姑娘走埋黎話比我知，佢今日其實可以出院！
雖然之前同佢慶祝左，但我地依然同佢馬上出院，去左再食晚飯～

我諗今年對您黎講，呢個可能係最好既生日禮物，希望您健健康康，唔好再辛苦自己啦！

註：今晚Hubby放學後，桃爸&桃媽係陪我一齊陪我Hubby食晚飯，個時已經係10點，之後仲一齊食甜品，4個人，叫左6樣野，見佢地食得開心，可能就係我倆最快樂的事！

好有心思既祝儀袋

尋日去飲既人情封，我就係同Hubby去行街既時候，買左日式既祝儀袋，返屋企睇先知原來唔同色有唔同既意思，唔知自己買得岩唔岩，不過都買左，就送比主人家～我個人真係覺得好靚架

入面可有最貴重既＄同埋我深心深心處既祝福信仔！
記得我地個個年代好興既女仔玩意係....寫信！
Moon，我屋企仲有您比我既咭仔&信仔，呢家我諗已經變成sms啦！

呢個祝儀袋係日本好興既人情封，中間隻鶴都係祝福既一種，諗住您去日本影相，呢樣咁日本既野，您應該都岩，哈哈～
將我最大最大既祝福送比您！！

蔡生蔡太的第一張帖

之前已經寫過收到作曲人+中學同學Moon的囍帖，可惜可惜既係....
今日婆婆生日食飯，我參與唔到晚宴，所以小桃唯有早一點去拍張照，放下重要的...嘻嘻，才回去跟婆婆食飯，幸好今朝爹爹見到我講電話，叫我用車，好讓今日第一日上上樹堂既Hubby唔駛擔心我既交通！
所以響酒樓同婆婆打打牌，就出發去美麗華，嘩，我個時真係有睇過美麗華個場架，不過太貴，sales既service又唔好，所以令到我唔搵佢～
點知知道Moon響呢度擺，好羨慕喲....

差唔多6點45分去到，但到左既人唔多，我唯有膽粗粗咁入新娘房搵今日既主角，見到佢又有Live Band，又有好靚既deco，好羨慕喲....(喂，家下您自己個個都唔差啦....隔離飯香)，同新娘子傾左幾句，佢就要同其他人影相啦，結果小桃只可以四周圍影下，八下...
其實我自己既婚禮，我呢家仲好怕有自己整既野影漏左，所以我將您既，我都影低，雖然唔係靚相機，但我相信您都會覺得好珍貴，因為每一張都係您地既見證！
很喜歡您地日本那一輯相，我雖然趕，但都忍唔住睇曬先走架.....
有一張有一張我真係好鍾意，見到話比您知～

將我最深既祝福送比您地，期待聽到您地有babe，我地呢班女人仔一齊帶兒帶女出黎食飯，嘻嘻...

註:我個人超喜歡送比您地既人情封，好在影低左，下一篇blog補返，比我自己拆人情見到，一定開心屎，至少我整個時係咁諗

香港仔謝記

今日Hubby要出去香港仔做野，而佢知道悶悶既我，就超好咁打比我話同我一齊食lun豬，我梗係話好啦，唔係我會響屋企生菇菇啦....
唔係第一次去謝記，但次次都係舅父車我地去，今日同Hubby兩口子自己去，佢問我有咩好食，就算搵開飯都係話謝記，咁我地就一齊恤發啦....

個度只係開到唔記得係6點定7點，所以就算想放工食，都無咩機會，加上佢呢度既炸魚片，真係手快先有，今日有幸食lun豬，我地先食到，好味～
多謝老公帶我出黎食飯，開心開心...

今日係奶奶生日，我地夜晚去左食肥Angelo，麻麻地好食，不過一家人一齊，都無咩所謂，祝您身體健康！

婆婆，願您早日康復！

婆婆入左院已經差唔多３個幾星期啦，今日小桃病左，先去睇個醫生，再車埋桃爸&桃媽入黎沙田，一齊探婆婆，其實佢真係幾精神，只係醫生都無話比佢出院，仲係見佢既時候，叫佢繼續努力。
可能想佢再穩定先啦，不過見到今日咁齊人，咁多個仔女都黎曬，又會咁岩既？
婆婆，有咁多人錫您，您要乖乖地，祝您早日出院！

20100118 小小慶祝Monthiversary

因為今日Hubby要返學，所以尋日已經出走慶祝左我地既Monthiversary，今日等Hubby放學之後，我地出左去食糖水，小小的慶祝～

桃媽話尋日係舊曆，今日係新曆，send左好窩心既sms比我，多謝桃媽！
都係多謝Hubby，無您無今日幸福的我～

蔡生蔡太的第一個月Monthiversary

不知不覺成為蔡太已經一個月，總括黎講係開心、甜蜜、好開心、好甜蜜、勁開心同埋勁甜蜜！
同老公覺得無可能叫anniversary（明明係周年），所以同老公起左個term - Monthiversary，哈哈
我相當極之享受作為Hubby既蔡太，佢對我既疼愛、重視係我無諗過會有既～

成為蔡太既第一個月，我同老公決定放縱一下，唔渣車出走去南丫島甜蜜一下！
去到碼頭見到有船先去索罟灣，其實我個人覺得兩邊都係一樣，所以就出發...

其實我地出發我好遲，去到已經差唔多兩點半，我地原本諗住上船先佢個個超好味既麵，點知原來呢隻船係無架wor，勁肚餓咁去到索罟灣之後，我地就即刻搵間野食！

四周圍影相係我地今日既目標，估唔到行到上半山仲可以食到好好味既孖條...

去返個沙灘岩岩日落，個樹真係好靚，正所謂青春留倩影，鬼馬既我響沙灘到寫下畫下，點知原來老公已經影低左...
一個月快樂.....

差唔多到榕樹灣之前，梗係要食豆腐花啦....
睇埋日落，坐６點半船，又出發去食野啦！！

今晚係特登揀左中環Soho區食，話說上開飯睇，佢話中環個間老富昌好得，見價錢又唔係貴，馬上訂位去食～
落船之後特登同老公去CitySuper買定枝靚紅酒，正所謂有酒有美人陪佢，仲唔係不亦樂乎！個人十分推介佢個度既蜆同埋食極都有既法包，真係好好味，而佢肯幫我換黎左有豬屎既沙律，係我覺得十分體貼既地方～

鵝肝同埋個法國田螺其實無咩特別，但佢跟一個Sobert令我又覺得好唔錯，但最遜色既可能就係個主菜，不過我地兩個食住野飲住紅酒，仲食左３轉山咁高既包，其實黎到個主菜我地已經差唔多飽（雖然個主菜仍然比我地送酒咁樣食曬=.="）！
至於個甜品係我地訂枱既時候話比佢聽係結婚紀念所以佢地寫上去送比我地，而侍應們影相既質數同服務，可以話係極之唔錯，令我地兩個都覺得會再去多次既機會！
食左３個多小時，由７點傾到10點幾都仲傾緊，飲緊既我地兩個，真係覺得呢一餐好抵，值

推介，男仕女仕訂呢度同另一半慶祝，我個人認為好唔錯～

飯後，飽到屎既兩個人，仲身痕咁去左出名影婚紗相既地方 - 石板街影相，雖然我地無響香港影外景婚紗相，不過對我而言，我覺得好夠！晚上影既感覺，又有另一番風味，好有電影Feeeeeeel....

行到攰屎既兩個人仲因為搵唔到巴樹站而響中環行黎行去，渣車啦，渣車啦，唔識路坐車囉～

很盡慶既一天，多謝老公！

成為蔡太後：
。仍然唔習慣自己係Mrs.
。人地問自己姓咩，唔知答姓蔡定姓劉好
。手上多左隻好靚既介指
。訓覺唔會再覺得凍冰冰
。唔係好care自己唔化妝出街
。多左個爸爸多左個媽媽
。掛住屋企既桃爸&桃媽

無變既係：
。無論係老公定男朋友都咁愛我

這樣已經足夠了！

走在繁華的街道上...

Hubby今個星期開始，又再回復研究登既生活，所以我地兩個都好把握可以出街既日子。
尋日同Hubby講，不如今日去影相囉，當然Hubby仍然成日都話不如去行街以支持我買衫，但今日既慶之所至，我地探完婆婆之後，就出發～
開頭大家都無咩方向去邊好，但當然又係輸左話事...
老公就係咁，車左我地兩個一齊去左銅鑼灣！

第一次咁樣響鬧市影相，身邊既姨媽姑爹好似以為您係摸Do咁樣，一係就以為您係咩明星響到影相，望完一次，唔夠，再擰轉頭望多次，好勒，唔識既，繼續行...哈哈哈＠.＠

我地一路由利園行去Sogo....

可以企響呢條咁繁忙既馬路上面影相，我自己覺得好好玩～

玩到累既時候，坐低響最出名車仔麵既榮記，嘩，好耐無食，慳好味！

沿途行返去攞車既時候，又再影過....

今次真係乜都影，最後以一張輕吻既照片謝幕，全晚以一枝50定焦走天下，很喜歡這一輯相，哈哈～

Gel甲第二回

小桃為左結婚，奉獻出人生既第一次水晶甲，為左靚，我寧願要我最關注既指甲之後醜怪一排！
但....諗到就黎紅噹噹既新年，無奶油咁醜怪去派利樹架嘛....

於是我決定至少起碼過左新年先拆，咁貪靚既我，當然忍唔住去整第二回既水晶甲...

Emma介紹呢一間，說真的係貴左一D，但我欣賞佢既雕花，著實，芳間好多都只係畫花同埋碎花，所以我諗左成個星期，都係揀返同一間再做多幾次！

今日唔知點解睇左咁多本甲書都係想揀colourful既item，所以，就整左以下呢一款啦～

個女仔都幾勁，明明我地睇書都唔係呢一隻，但我鍾意colourful又唔鍾意低能，佢都可以幫我整到咁，巧滿意！

甜蜜的兩夫婦

尋日響飛卜個好友度，見到佢同佢男朋友食野既相，八卦&餵食既我不停響到睇，咁岩Hubby又響隔離，我見到其實一張Pizza Express既相，我就響到講：
「呀～好耐無食過Pizza Express既麵包仔*啦！」
*註:係，我一向唔食豬屎，所以同朋友仔去食西餐，佢地成日都要就我，揀無豬屎無白汁個d，連以前同公司同事去Pizza Express，佢地都係咁樣就我。有一次我去食到佢既麵包仔，開心到飛起，因為響咁多野食當中，搵到一樣我食既....

Hubby就係咁樣，今日訂左枱同我一齊食，嘩，開心到我屎～

為左麵包仔，我地特登叫個最多麵包仔既Appertizer，yummy～

究竟呢個小姐發生咩樹，連一塊Pizza都玩到傻左，無聊！
開心快活的一天，期待1個月的小慶祝～

我倆的結婚證書套

同大家FUN享一下我地既結婚證書套....

其實好多人問過我，要整結婚證書套嗎？
我反而覺得好個人，因為響唔同地方證婚既話，需要既都唔同。
如果鍾意既話，就算去婚姻註冊處得個30分鐘，都可以整一個，唔駛攞住佢地送既玫瑰證書袋。
我決定整，係因為上網見到「盟」真係整得好靚，一睇就鍾意，根本無考慮過其他，當時上網見「盟」話佢暫停唔接order住，我幾驚，幸好佢都幫我整到！

我鍾意佢既packing，真係靚到嚇親，我自己個日約佢交收既時候，我都問佢咁靚既？另外我就好鍾意佢可以放相既服務，我個人黎度講，總覺得放到張相先有代表性(係囉係囉，所以堅持張帖要有相囉！)，所以二話不說就比左＄！

當日放埋張證書落去，真係好唔錯架～

喊住都攞黎影相，幾靚架～

P.S. 其實我知好多結婚既網友們都好想搵資料，試下Open to Public，大家會自重嗎？

心動

今日婆婆可以同我地一齊出院渡假去食個晚飯farewell Yoyo，所以我地6點多就去到紅磡煌府陪婆婆玩下麻雀，等佢呢兩個多星期苦悶既生活，有點生趣！
哈哈，見到佢開開心心咁樣，我都不知幾歡喜～

晚上回家，收到小桃既信？Oh，原來係Moon既囍帖，那一刻我發現自己有點感動，唔知當時大家收到小桃既囍帖既時候，有無同樣既感覺呢？相識左咁多年，由白痴同學會，再響歌曲那些不起眼既位，見到您既名，再響今時今日，會響不同既Show見到您，就連超級巨聲都見過您，我真係覺得您好有才華！

今日收到您既帖，我有一下感動，大家都成長了，找到另一半，成家立室！
下一步，應該期待大家抱著拖著小朋友出來聚一聚那一剎那～

蔡生蔡太的第一次@利是

今天晚上相約了伴娘表妹及家人晚飯，明天她又要回澳洲了，幸好的是可以申請婆婆出院放假，好讓她能參加今晚的約會。

今天的特備節目，可是我預備了蔡生蔡太的第一次 - 利是。
表妹弟都要返澳洲，未能一起過年，唯有預早派利是，唔知得唔得既呢？
不過見到佢咁開心，應該無咩問題...

2010年新年快樂～

Super Mario Bros. Wii

日本で売り上げＮＯ．１です！！

尋日Hubby既老友記黎左我地屋企搞派對，一行10人黎打邊爐，開心快活！
送完飯比婆婆，我地就7時恭候啦～
喜歡這樣熱熱鬧鬧，喜歡聽到定宇為左個爐一堆唔熟既野講大堆說話，喜歡良生將一d唔熟既野放落口，喜歡看著您地4個傻瓜瓜的，乜都玩一餐～
今日既新遊戲 - Super Mario Bros Wii，嘩，好玩到呢...
我鍾意玩孖寶，係由紅白機既年代，今時今日，有呢個比我回味一下，開心！*u*

泰國的手信

媽咪舅母舅父婆婆一行10人響聖誕節既時候去左泰國，開心快活過了一個陽光與海灘的聖誕節，誰知一回來，婆婆就出事了，整個家庭每天都為左婆婆而擔心，去醫院陪佢，我就煮野比佢食，幸好....情況已見好轉！
尋日同媽咪食飯，佢帶左呢個手信比我，係佢地一齊揀架wor，呵呵呵！
其實唔知點解，我一睇落又真係好鍾意wor，唔通係粉紅色？唔通係有大蝴蝶結？！

婆婆的近況

31/12那一天，當大家還在準備迎接新的2010來臨前，

我收到媽媽的電話，告訴我婆婆又暈又嘔，去了急症室，

5時左右，我到達醫院，苦等3小時的家人和辛苦得連眼也睜不開的婆婆剛剛見完醫生，醫生說婆婆只是一般的耳水不平衡，我們當然放下心頭大石，

但轉眼間，做完腦掃瞄之後，醫生卻說婆婆的小腦有一個小波（即係爆血管），

之後就一直等待著不同的檢查，看著睜不開眼的婆婆，

聽著她說那天發生的事，我們真的感謝神，

沒有祂，對於一個忘了食藥而又等待了一小時的老人家來說，

她真的很很很幸運的一個！

住了數天醫院，她的病情好轉了，就被安排到沙田醫院休養，

閒時做物理治療，用輔助架重新學慢慢行。

沒有工作的我，就獲選成為她的午/晚餐的貼身妹仔，

就像舅父說，這兩個星期，可能是我出世以來，跟婆婆相處最多，談最多的時候了。

這就是我幫婆婆預備的晚餐，那天吃的是魚和菜，

她每天都是這樣歡歡喜喜的把我帶來的都吃光光，當然少不

了我們的參與。



慶幸這段日子，沒有工作的我，擔心車費貴，老公都是疼我的，

給我經濟上的支持，同時有時間就會跟我一起去，

您那天的安慰說話，我仍記在心上，謝謝您！



今天帶來的好消息，醫生批准婆婆星期六/日回家渡假，

她會在基澤叔叔家住兩天，好讓沉悶又腄不好的她，好好享受一下！！

遲來的祝福

中學同學Moon，現在已經係名人之一，哈哈哈...上埋超級巨聲，仲唔係.....
我結婚既帖都有送到佢手中，當然明白佢地兩個準新人忙於工作，但佢既心意我已經響飛卜度收到曬啦！
點知今日仲收到佢既咭，您唔提我都唔記得我地既白痴同學會，仲要我係會長，呵呵呵....多謝您既我手畫我心，超鍾意，您既心意，真係....好喜歡！

期待您月尾結婚時，當主角的那一刻～～～

夜晚去左睇SuperBand演唱會，同樣係第四行，但就坐到無雷公咁遠，入去好好享受左音樂，睇左Hubby叫佢做「陳星」既羅大佑響到水上飄，最愛聽到周華健既歌聲，好正，不過可惜既係歌並唔係我地個一代，仲要11點就完，點解呢？

無聊兩公婆＠扮訓

尋晚呢兩公婆超級無聊，又未訓得著，結果老婆同老公講話不如我地扮訓呀，扮得最似個個就嬴，邊個嬴呢？

哈根大師又一傑作 - Cream Crisp Double Choc

今晚響房玩玩下電腦，突然同Hubby講，我好想食野，於是我地就開左之前買黎想試既哈根大師新出品 - Cream Crisp Double Choc！

一係唔食，一食就無法抗拒，當我抱住食阿菠蘿既格格三文治既感覺去食既時候，您第一下咬落去係會：「OH！」因為佢既脆真係估您唔到～
一句講曬：堅好食
五粒星推介