Dabi@Day92 - 三個月大lu!

今日係Dabi B三個月大既日子，對我黎講，好似無咩特別。
只係覺得呢個唔再係一個初生寶寶，有性格，識多左好多野。
而個D咩百日哭，戒夜奶都唔識用於Dabi身上，只係得厭奶出現左。

今日咁值得慶祝既日子，我為Dabi預備左一連串既節目。
(明顯地係為左亞媽而設)
因為工人走左，無人響屋企煮野比我食同做家務，出街係最明智既選擇。

首先就係桃媽為Dabi你預備既飲茶宴。
即係逗利是大行動。
因為今日約左由澳洲返黎既Uncle Thomas & Auntie Helen飲茶。
響澳洲既個段讀書日子，佢地真係帶左好多歡樂比我架。
當然唔少得跟Uncle Thomas出去釣魚既日子啦。
而Auntie Helen既明白事理亦係我覺得作為一個新手媽媽/奶奶好應該學習既地方。
聚舊令我覺得我又懷念澳洲既生活～～～

之後響桃媽屋企樓下買左個TT奶樽。
無法子，見到Dabi唔肯用奶樽，就咩方法都要試下。

晚上，哈哈哈，最開心既聚會又黎。
就係同Simon/Emma & Kitty一齊聚舊。
今晚選址都係我屋企，只因老公要返學，我怕自己一個帶Dabi B出去。
留響屋企，大家黎開開心心，叫Pizza係最好不過既事。

而Emma仲好sweet咁買左個Agnes B既蛋糕比Dabi慶祝佢三個月生日。
嘩，真係好靚架！
Dabi B，你真係好多人錫呀～