謝謝各方親朋好友的關心，昨晚我已經安全出院，醫生話做完超聲波之後，見個情況已經好好，無咩事，可以食一個星期藥睇下點…(雖然我個心口仍然有痛，只是頻率減少了)，不過知道個心臟無咩事，都無咁擔心，尋晚已經好想好想出院了。
響醫院食既野黎黎去去都係個ｄ，我最愛就係佢既火煺通粉，次次都食，因為佢既火煺好多，每一啖通粉都可以食到火煺，好好味。
而前日哥哥就食左個豬扒東東，佢話同之前個晚食既京都骨一樣喎
出院已經係十點幾，咁岩力行又入左播道做小手術，我同哥哥就一齊去探埋佢先走，點知我行下行下，可能太耐無出街，姑娘又唔比我落床，所以體力好差，好攰，好快已經要返屋企休息了。
在醫院呢段時間，好在哥哥帶左佢既notebook比我，我先可以睇左一整齣日劇「沒有玫瑰的花店」，仲要睇到最後一集，哥哥響我身邊，我先知ｄ人係邊個，呵呵呵…好好睇^^
對，我無啦啦入左醫院啦又....
話說我星期日晚同哥哥抖緊既時候，無啦啦心口突然又痛一痛(早幾日放工既時候已經試過兩次，但都10分鐘內無事)，諗住又係好快無事，哥哥仲忍我笑，點知好耐都唔好返，夜晚諗住訓醒無事，訓醒都係咁痛，見唔係好對路，返工搞埋D手尾就去左法國醫院了！(我當然其實唔係真係好擔心，諗住都係骨膜炎之類)
去到同姑娘講左兩講，佢就話不如您照個心電圖先啦，就算睇醫生都會叫您照架啦，咁我咪去照左先囉！點知...之後就有個醫生黎，話我唔知咩adnormal，大概係有d心律不正咁，所以建議我入院做詳細檢查，嚇得我驚驚地，就梗係打比媽媽爹爹哥哥等人，就搞入院手續。
一搞完入院手續，響病房都未坐低，就叫左我去做磁力共振，去到d姑娘都問我仲咩事入院，好少咁細個黎做呢個檢查。響入面，無啦啦又要打粒豆豆，嚇死我即刻喊，之後仲要打唔知咩藥水去我個身體內，就會好似跑緊步咁，仲要係好劇烈個隻，個刻真係好辛苦，好似透唔到氣咁。做完咪諗住返房囉，點知醫生好快就黎，佢話頭先好快已經去睇左我個報告，話大概知咩事...佢話一般人心臟外面個膜都會有d水包住，但我個心臟就比其他人多，所以要轉介比心臟科醫生！嘩...個刻真係好驚，心臟喎，連姑娘都話唔比我落床，兩個鐘要量一次血壓，連水壺都預備埋比我，驚死我有事咁，搞到我都驚埋一份...
之後姑娘仲話比我知個心臟科醫生係呢間醫院既院長，到尋日佢就話唔駛做咩咩咩檢查，轉左做超聲波。等緊做之前，我仲突然無啦啦心口好痛，透氣又要大力大力透，我個刻都真係幾驚架..到做完個超聲波，醫生就話我個心臟呢家無咩事，d水都唔係特別多，呢家好好喎！知道個心口痛唔關心臟事，我雖然口話無咁驚，但都唔知病因。
直到夜麻麻黎巡房，佢話無咩事，好似過濾性病毒咁，人地就傷風感冒，而我就心口痛，一切正常喎，那一刻才呼了一口氣，一直知心臟有事，都不知幾驚，好彩呢家知唔關心臟事，不過醫生都係未比我出院...
不過醫院真係千祈百怪，有一班人一齊入院，響到開餐，有一個不停自己同自己講野話要投訴，有幾個唔識既入黎無啦啦friend左，成晚個醫院都好嘈，真係一波未平一波又起...
幸好在這幾天，有您的照顧，您陪伴在我身邊，如果這輩子沒有您，日子真的不知怎過，謝謝您細心的照顧～
上星期同哥哥已經諗住去睇,結果係星期五7-9所有戲院都爆曬,訂到無得訂...有無咁多人同時間入戲院睇戲呀???
結果我同哥哥尋日就訂左今日既飛,一齊去睇小丑,無錯,今集大家都話小丑先至係主角,全套戲都好緊湊,有D野唔明,都唔夠時間問哥哥,Heath Ledger真係做得好好,不過可惜可惜...以後都睇唔到佢做戲lu~
不過一見到個個面面,真係每一幕都唔敢睇,好鬼驚....
推介指數: 5星
已經10點鐘,同哥哥咪諗住去食Double囉,點知....有無咁多人泊車呀???仲有n咁多人響到double park泊車??幸好最終去到大圍都有位,估唔到食double都咁煩...
今日心情唔多好,希望聽日無事啦! 訓覺Zzzzz....
望穿秋水都未見自己update個blog,哈哈...
Kiki仲問我係咪唔開心所以唔update....
只因太忙,公司開始接手既工作越黎越多,所以連update既時間也欠奉,睇大家blog既時間也沒有...
但呢幾日實在有感而發,感到自己實在太敗家,要同大家分享一下
話說星期五個日,因bigbig既關係,諗住裝埋部NDS入去無咁悶(我要好長時間架嘛=.="),點知件衫個袋太淺,清潔亞姐又響隔離攞住筒水,就係咁...NDS就跳左落去游水...
上返水面既時候,佢一身濕曬,響喇叭位仲會發生一D"zzzzzzzzzzzzz...."咁既聲音...
結果即日,我同哥哥就去左買一部新既紅黑NDS,連埋新既R4咭,多謝承惠$13xx
之後.....................................................
星期日晚,哥哥同我講話有人walk-in買到生滋iPhone,叫我都打去試下(事緣我之前去左幾次3問佢幾時有都無人答我,只係好無禮貌咁叫我等),打黎打去之後...響網上見到有人話cwb有得walk-in買到,把心一橫,lun豬就去左八一八,點知....
哇卡卡...
即晚仲同哥哥玩左好耐,無論上網好,打電話好,玩GPRS都好,一流....
實在太敗家了....要休息一陣..但係我都仲係好想買野....
