20140206-初七人日，人人快樂

這是一班我在11月媽媽會，經過3年戰鬥出來的一班真朋友！

我...很難交朋友...一，係我呢家湊仔，唔係生左根本唔明我有幾忙。二係我份人比較直腸直肚，鐘意就鍾意，唔鍾意真係做唔到朋友。

所以呢班朋友,我很珍惜！真的！

第三年團拜了...

第一年我生妹妹，無得參與！

舊年齊人D!

今年揀左返工日子，少人左！

所以要key大頭相！

宏琦仲超窩心咁為大家買左蛋糕！

小朋友都問邊個生日，當我地話人人都生日時，淳淳唱：Happy Birthday to大家！笑死我！

20140205-BB蕉

今日老公返公司開一開門，派派利是就可閃！於是去左俊家燒野食。

見佢地兩個想坐火車，我仲叫老公唔駛接，膽粗粗帶兩件坐巴士轉火車去元朗！

開頭老公未到，Gary接我地，所以帶左佢地響錦上路坐低等下！

去到俊哥哥屋企，兩隻開頭完全唔肯落地。手抱兩件...好彩後尾可以比Gary同靜兒抱一陣直到爸爸黎！

明明話燒下午，見佢地話踢波，我都醒水話閃去瞓，瞓一陣都7點先開始燒野食。

以為兩個小朋友好呢hea,佢地又出奇地乖巧。乖巧到可以食完自己去玩豆豆-一隻好老既八哥！仲㩒住唔比佢行。

又肯跟俊爸爸入屋彈琴，可算係首次。証明我仔真係好愛音樂！

20140204-年初五，難得見到老公既上班天

老公響老爺度返工，基本上係唔會好似員工咁蛇去玩！所以除左去旅行外，我真係無乜同老公可以咁名正言順去玩！除左...新年！

今年放到年初五，正！

我地諗左好耐，本想去踩單車，又覺得得我地兩個玩，細路坐好似無咩意思，就改左去海濱公園玩！

雖然今日已經無前幾日咁好天，天陰陰，不過好在無咁多人，仲可以有風，睇到人放風箏！

我總覺得兩兄妹一同成長既回憶非常難得！可以出外走走，就由他們去玩吧！

可能妹妹痴住我，所以我成日幫佢影相比較多！

爬上箱落已經無咩難度，只要在旁陪住，比信心佢地，就會自己搵方法上去！

晚上想再出外走走，所以就約埋婆婆公公去尖沙咀。當然...去錯地方，去左羅湖城咁，邊有位食野。唯有食food court!之後去睇下古古力，玩下樂園。

同場加映呢個醜樣妹，無啦啦拿高自己條裙！！！

20140203-年初四，抖一抖！

今年初四都係假期，我地無特別安排節目，只係因為未同奶奶拜年。所以落歡樂食完lunxh就去同奶奶拜年！

新年最開心都係小朋友，因為可以名正言順地食古古力同糖！

晚上響老爺屋企瞓醒後，本應自己食自己。點知老公又可以約到良生地！我地就出發大埔食dinner!大埔卻痴左線咁多人。我地去左東江雞根本無可能食到，本應附近買外賣，又突然有枱，就用外賣盒坐響到食。

之後去埋大埔中心買碗仔翅同豆腐花！正！再上良生屋企玩！

呢兩個人仔最開心，事關亞Faye有源源不絕既零食。跟住無啦啦響良生房搵到條繩，以為佢玩咩啦！佢響到fi你，fi你？聽到我一頭霧水...

聽下聽下先知原來佢響到扮消防員響到救火救人！笑死我！

今日響到話佢知八仙嶺山火，燒著D樹時，佢仲話：媽媽，係咪好似你煮西蘭花咁？

小朋友既聯想力...真強！

20140202-年初三玩到盡

基本上老公既朋友每年年初三都會去老爺度拜年。今年仲要初四都係公假，岩曬！大家高高興興初三賭返日！

大家都帶定身家黎玩！

咁岩老爺朋友都黎，好熱鬧！

煙霧彌漫，不醉無歸之夜...不是我！

20140201 - 大年初二齊開年

每年年初二我地都好趕，因為要走幾場！話曬開年飯嘛！

今年一如以往，去婆滾家👉老爺家👉夜晚嫲嫲齊人拜年！

今年婆婆家外牆終於裝修好，可以響佢度拜年！

之後就趕返老爺度。

原本諗住出返屋企瞓，但見太攰就直接沙田瞓完先再出返土瓜灣晚飯！

兩個細路仲可以嘆返杯雪糕先！

20140131-馬年進步，豐衣足食！

大年初一蔡氏一家恭喜發財！

結婚有仔女既就仔女快高長大、健康聽話！

結婚未有小朋友既就繼續甜甜蜜蜜，快快生個陪Dabi & Jobi 玩！

未結婚既就梗係快D拉埋啦！

我地照慣例一早去左婆婆屋企先，住隔離，方便拜左年先！

可惜既係我老公由尋晚開始發燒，病住陪我地去玩！

之後就出發去老爺家拜年！有賭既賭，拜年既拜年，爺爺仲帶左佢地去一田買野，開心曬！

晚飯由大大主理，大家都食得開心！

舊年vs今年

20140130 - 一年一度團年飯暨大抽獎

唔知有幾多人都好似我地一家咁重視團年，係呀！我地屋企兩邊都好重視團年，即係呢...如撞正同一日要走兩場個D!

今年我地好好彩，唔駛走兩場，加上有小朋友，所以可以懶D!小朋友瞓醒直接出發去老爺度！

睇下預備左成塊面咁大隻蟹！

當然唔少得紅酒！我今晚都淺嚐！

My Happy Family!

食飽飯，一齊玩一陣，就傳統大抽獎出現！今年大獎係$2500架！

爹爹一路派錢，呢兩個細路就一路搗亂！今年dabi抽到2000，妹妹1500，老公1000，我800，而每年最少既300大獎仍然由強記抽到！勁！

今年無得食湯圓，但派完利是大家就高高興興返歸準備明天拜年了！