我既舊同事響whatsapp group 度傾開，話估唔到我會唔做嘢全職湊仔，話我性格唔似。
都係既，我係一個比人感覺拼命向上爬既人，話停落嚟做ftm, 其實連我自己開頭都有掙扎。最主要原因咪係我唔信工人，而我99同媽咪都係返工人仕，與其擔心比外人湊，不如自己一手一腳，唔駛諗點教點磨合。
呢3年我每日都係同個仔一齊過，當然仲有之後多埋妹妹啦。幸好既係，哥哥真係呢家諗返算易湊，妹妹惡湊既日子又好似遠左。但講真，你估真係三頭六臂咩？所以有時都有好唔開心好氣餒既時候，成日諗點解唔請工人？
有時一路煮飯佢地一路扭計真係覺得好煩，點解唔可以自己玩呢？
但睇住佢地大，自己負責返佢地既成長，我覺得好重要。
今日接仔放學，見到佢笑住咁落車，ee同我講佢好乖，摺左把紙槍比佢，我幾開心！
其實之前Dabi放暑假，我都諗左一排報唔報興趣班，一直都無頭緒，不過好同學豆豆既婆婆響學期尾先熟落，佢比我睇豆豆畫既畫好靚，又近我地，真係好唔錯。咪諗住一星期一日，比佢去學下，練下小肌肉都好。
點知一試就愛上，Dabi 由第一堂已經好鐘意，我可以好放心咁放低佢，由佢自己畫。佢會同我講：『媽媽，你去買餸啦，一陣返嚟接我啦！』上左6堂後，我同老公傾，仲上唔上好？見個仔又唔抗拒，時間又安排到，我地就照比佢上。
今日九月開學第一堂，Dabi 同豆豆時間夾唔到，得Dabi 單對單授課，Dabi仲開心，畫左飛機，整左手錶，老師仲教左佢用較剪，其實旻希想試好耐，無耐屋企有Jobi我遲遲未比佢用，今日見到佢覺得自己好叻叻，好自信既樣，我真係好開心。
同老師傾談之間，發現你學嘢好快，好多時老師只係講一句，你已經記得，仲識用返出嚟。老師仲讚你，話可以試教你畫蠟筆，好開心，旻希，媽媽唔係想你做畫家，但求你開心，畫畫時有滿足感，就好了。
Jobi 返唔返Playgroup 呢個問題其實我諗左好耐，首先係佢超級樹熊bb, 帶佢返去淨係聽佢喊，我寧願留返d錢暖肚。第二係其實Jobi B 日日同哥哥玩，我地日日都唱遊，講真，屋企已經同佢好似日日playgroup咁，返唔返分別真係唔大。
不過始終我覺得妹妹同外界相處係有待學習，咁岩又揾到岩時間，我都想比妹妹返下。就係咁，就報左名啦！
今日第一堂，講真，我都好驚，尋晚諗佢大喊點算呢？我點氹佢好呢？
今日一早送左喊豬豬哥哥上車，我仲特登去前面燈位等佢，同佢揮手，支持下佢。佢真係無喊，仲同豆豆一齊坐，好乖乖。返到屋企做完家務，等妹妹瞓一陣，我地就出門口準備返playgroup啦！
第一日返去，好在仲係好多哥哥時熟悉既面孔，而妹妹亦出奇地無怕生保，肯say hi 肯握手，正式上堂時，妹妹比我既驚喜真係一個接一個。佢可以自己去攞玩具擺玩具，可以跟Kaco姐姐既動作，可以跟普通話老師一齊聽故事，可以自己洗手，自己抹手。去勞作課室玩一個個箱既玩具時，亦係自己攞，自己收拾。我真係一次又一次咁湧眼淚，囡囡，媽媽呢19個月一直都好掙扎應該點教你，惡你，唔理你，定不停比安全感你？最終媽媽揀左後者，我希望你響滿滿既愛同安全感下成長，你要抱我就比。原來。。。真係work! 今日我親身見証呢一刻，我好感動！
妹妹， i am so proud of you!
12點放學，仲可以接埋哥哥，佢好乖，miss lo都讚佢，可以自己去vv, 食嘢，上堂都開心，無問題！叫我比多d自信心你：D
其實見到你兩個手牽手一齊返學，我真係好安慰！
Dabi今日第一日坐校車，我都有d驚驚，佢係咁話要爸爸媽媽一齊上車。咁我咪話要問叔叔得唔得。點知原來校車叔叔咁早到，我地行緊時已見到校車叔叔嚟緊，所以我地去到，旻希只係比人捉左上車，佢就爆喊，咁就車走左。不過豆豆婆婆話佢下一站已經無喊啦！
返到屋企，佢仲講比我聽今日玩左跳圈圈，同埋食貝殼粉。
見佢乖，老公爸爸話帶佢出去食嘢，去左新開無耐既Fullhouse Signature! 間嘢係專門sell人地搞wedding, 所以好多decoration, 我就係比佢地個一家四口公仔吸引左。
D嘢都算ok, 有kids menu同埋有畫筆bb chair, 呢樣好貼心，但係當然d嘢食都唔平，我地都要食成$200/人架。之後同佢地食埋雪糕，行埋supermarket就返屋企啦！果然，上午班時間好好用！
