我倆的1218....前一天

回到未嫁時

係呀，1217...仲有一日我就嫁啦.......
呢一日，我只可以話唔係堅忙，係堅重！
我到呢家都仲諗緊，究竟D人無車既話，係點可以做健力士既呢？
我個日要攞既野唔多：
- 婚紗禮服比新娘5套
- 婚紗禮服比新郎3套
- 褂&馬褂各1套
- 妹/伴娘/媽媽/奶奶/嫲嫲衫共8套
- 新娘首飾/頭飾
- 花球
- 返屋企將所有物資搬去酒店

唯一慶幸係各分店都話曬比我知所有野幾點攞得，我伴娘仲要係1216先落機，我1217先陪佢去改fitting，所以響時間上，我自己個人覺得安排得已經好唔錯，最緊要係今日相借左威威&嘉嘉幫手做亞四，咪真係唔知點拎。
所有野已經響18:00 pick up曬響架車上，而聰明既老公同威威亦響我陪伴娘改fitting既時候，去左酒店check in先，可以先放低部份物資，咪架車我都覺得放唔曬。

而我地就天黑左右到左酒店，可以同未來老公分贓；分好贓之後，又發現嘉嘉地唔記得帶走嘉嘉條裙，幸好我地屋企約左響竹園食dinner(呢樣野完全要多謝未來老爺，唔係佢相熟，我個日咩酒樓都book唔到，我諗係有好多公司Annual Dinner)，所以約左佢地架車響竹園等。
個時已經8點，佢地有佢地返屋企，我就有我同屋企人食，但明明老公就9:30上頭，我就遲佢半個鐘，但我去到食完都已經差唔多9:15，可以話個陣仲未食完，所以我同Yoyo伴娘走先，返酒店沖涼，準備上頭。

其實個日桃媽見到個景咁靚，係影左好多相，不過我唔記得放左響邊，所以，只可以update住咁多先。
睇下張床幾大，我個晚係同伴娘同埋桃媽一齊訓呢張床，個景就簡直無敵，聽日可以睇住老公黎接我。
而伴娘個陣我都唔記得幫我最後衝刺整緊咩，只記得個晚係超不安，好怕自己有咩未做。

10點夠鐘上頭，大家都黎開心熱鬧(合照響桃媽既相機)，我姑媽幫我上頭，佢真係一個超好既上頭人選，除左我爺爺唔響到外，佢有3個仔女，全部都結曬婚，都有小朋友，即係計埋我嫲嫲，係四代同堂。基本上我屋企人有咩囍事都係搵佢上頭，而姑媽從來都唔會say no。

夾左個士多啤梨響頭，就上左頭，由於我地基督教，所以所有拜神都唔駛，搞掂。
之後就大家幫我手佈置，我個陣仲整緊.........老公個邊既seating plan。

多謝兩位姊妹黎訓，個晚超凍，我訓床都凍，何況佢地訓梳化？Joyee仔仲同我傾左好耐偈，個晚我記得桃媽兩點出過黎問我訓未，結果我係三點先上床訓....
之前個晚訓左兩個鐘，今晚訓兩個鐘，唔知聽日點線？

好緊張....聽日我嫁啦！