餵媽媽奶的心聲I

老公未執好相，見有時間，追卜之時，都分享一下餵媽媽奶既心聲。

知道自己有BB之時，自己已經諗住餵媽媽奶。
無他既，知道初乳有抗體，之後對BB係最好最天然既milk milk。
上埋產前講座之後，我知道左奶粉同人奶既比較，我決心又大左。
當然唔少得我桃媽、奶奶同埋婆婆不停響我身邊叫我餵。
而我每次都係咁答：「都未出世，出世之後餵到梗餵架！」
有頭髮邊個想做「辣哩」

當BB出世，由於佢響私家醫院出世。
出世頭4個鐘要訓箱，我仲傻下傻下睇唔明餵奶時間表。
我就白白痴痴咁錯過左第一日既餵奶時間。
(呢家諗返都覺得係好事。大大話話我都成3日無訓到先生個b)
第二日我終於睇得明張紙，第一次去餵奶既媽媽，有兩段時間比你揀。
可以有專心教你～
我仲記得心急既我個一朝仲早左起身梳洗好。
(明明之前幾日無訓，第二日好似好精神咁)
最緊要既係，幸好我問姑娘借左個水泡坐，呢樣真係堅幫到傷口手。

入到育嬰房，就有個姑娘Brief我地幾個新手媽媽。
首先就係話唔食：淡豆豉、乳鴿等。
無幾耐講完就會派bb。
呢一刻，我就響到諗，我點認得我個bb呢？
講真，我只係見過佢一次，個時仲血淋淋，又醜樣，唔係我個仔嘛？
到姑娘抱埋黎，講真，就算佢抱錯，我都以為係自己個仔。


之後佢就會教我地點樣餵。
而Dabi B真係好乖，佢第一野放落個linlin度，已經識得響到啜啜啜。
姑娘仲話佢啜得好好。( 亞媽自豪中...)
但我根本唔知佢有無啜到奶
之後姑娘幫我jit一jit，佢就話我已經有初乳。
請鼓掌
但最嚇怕我既事發生左，就係佢一路食，我一掃風佢就嘔返好多灰色既野。
我仲以為搞乜食奶都咁dirty？
姑娘先話比我知呢d係胎水。
Dabi飲埋飲埋呢十個月既貨仔都唔少野。
一路掃就一路嘔。
都岩既，響入面咁耐，唔飲仲有乜做？
每邊餵左10min之後，姑娘就叫我補奶粉。
佢飲飽食醉都搞左成粒鐘，幸好有姑娘教/幫我掃風。

這就是我第一次既餵媽媽奶經過。
響醫院呢兩日既食奶schedule如下：
07:30 - 10:30 - 14:30 - 19:30 - 22:30 - 02:30
啜幾耐？
由每邊第一次啜10min，到之後15min。
補幾多奶粉？
第一日食30ml (我無餵過奶)
第二日食45ml (基本上佢食到我既媽媽奶，飲唔曬)
第三日食60ml (都係飲唔曬)

我唔知公立醫院如何？
以我所知，係一開始就比你湊。
所以經驗我分享唔到。
但我真係好慶幸開頭有姑娘幫我fix左佢既schedule。
由出世佢4個鐘先會食一次奶。
到呢家，佢都只係3個鐘先會食一次奶。
從未試過要一日餵10-12次。
有人問，好多唔建議補奶粉，應該補嗎？
我會話，響我自己個case，Dabi絕對無nipple confusion。
得個幾日人仔，你又唔夠奶，佢又唔飽肚。
你唔補奶粉，咪搞著大家！
我其實由第六日開始，已經全埋身，無再補奶粉。
一樣上到奶，一樣無nipple confusion。
如果你一開始就佢喊就啜：
第一，你會分唔到佢幾時有肚餓喊。
第二，你會攰到唔想再餵媽媽奶。

希望以上媽媽奶心聲幫到你。
下一次，我會講一講人生最痛 - 乳腺炎。