Dabi@Day63 - 健康院again+兩個月成長印記

自從雙滿月之後，無啦啦第二日氣溫急降。
本應約左尋日打針既我，都拿拿林打去改期。
梗係啦，咪咁凍出去整病邊一個都唔抵嘛！

今日結果就先返健康院度高磅重。
Dabi既體重都仲係令人好滿意，特別係當姑娘問我佢食緊咩奶既時候...
我答：全人奶
姑娘就會回應返你：嘩，咁佢重得好好喎！繼續努力啦！
Dabi B已經有5.25kg，身長55.5cm，頭圍38.5cm。
雖然除左體重都係50%以下，不過學姑娘咁講，人奶B已經好唔錯。
要咁樣安慰自己先可以堅持落去架嘛！

踏入第二個月，Dabi成長左都唔少。
佢已經識得對住你微笑，又識得睇人眉頭眼額 (即係見到爺爺就識笑)。
食奶方面，佢由之前既一日7-8餐，到呢家5-6餐一日，3個鐘一餐。
依然都係全埋身，希望佢食到幾耐得幾耐。
便便方面，佢一日都有幾次，次次都係人奶c，通常夜晚痾埋最尾個次先會訓。
訓覺豬方面，就算係特訓成功左。由之前12-1點食埋餐奶先訓，到呢家我地train佢食完10-11點個餐奶，12-1點就會去訓。不過仍然都係暗訓。
由於佢多左時間清醒，所以我通常會響佢沖完涼未食奶之前同佢玩下tummy time。

乳腺炎後遺症就係 - yeast infection真菌感染。
當然唔係有完乳腺炎既人一定會有yeast infection，不過我就有。
仲要搞極都唔斷尾....
就算點戒口都無話清得到，仲係時好時壞。
所以都係盡人事，餵/忍到幾耐就幾耐。