九寨成都婚照之旅Day3

話咁快又黎到第二日既拍攝之旅啦，之前睇天文台話今日天氣會比尋日好，所以我好期待今日既拍攝架！可能尋日106見我地化妝都好快，所以佢尋晚叫我地返酒店休息之前，都問一下我地今日7點半會唔會好少少，等我地可以訓多d，唔駛好似尋日咁第一個入去食早餐，我地兩隻懶訓豬真係話好啦！

可以訓多半個鐘唔係重點，重點係可以天光先起身～

今日入溝拍攝既第一站係蘆葦海(因為尋日拍既時候天氣已暗)，呵呵...同一套衫又可以有多一個造型，很好！所以今日化既妝都比較簡單。

揀完衫之後，因為個package包既係一日既溝內拍攝，通常人地第二日都會去溝外影，但我地兩個都唔鍾意，想影多日溝，所以今日就一早預備埋$比小魚交比佢地幫我買入場票。

果然今日天氣好好！入場前都係要勁影相，都係個句，佢d水真係好清，而且尋晚響酒店飲佢既水都好清純，勁過我地帶去既Evian，點解呢？

今日既蘆葦海有埋太陽仲靚，陽光打落蘆葦度，會閃下閃下咁，影得我地兩個不知幾開心。

之後換埋妝就去影我話比遠翔聽要影既景 - 諾日朗瀑布，換左呢條哥哥話靚既裙都不知幾開心，仲可以影埋花球，開心曬～

不過影既時候d水飛埋黎真係唔係人咁品，仲有個大叔響到渣住相機幫我影，影完又跑上黎比我睇返，好好笑^^

著住條裙走左幾步之後，遠翔響樹邊停下來，呢個係佢第一次影既景點，未有新人影過，其實個度只係一個路邊既樹下，有好多黃葉，但估唔到遠翔可以影得咁靚，真係好靚～

左邊呢張就係遠翔影架啦，而右邊好明顯就係哥哥幫我影既花絮，真係好靚好靚～

影完呢個訓地相之後，我地就去左食buffet，的而且確就好似其他sis講既一樣，好似食齋咁，野食又凍唔係太好食，佢有兩款$50/person或者$80/person，哥哥就揀左$50/person算，可能係我地知道唔好食啦！原來遠翔黎食既只會係呢度既蛋，仲要今日無tim，所以佢就好慘咁咩都無得食，食左超少野。

等緊車黎既時候，我地終於影到佢地3個既合照啦～

遠翔話想把握最後一點點既陽光去原始森林影，有多一個景點梗係好啦！小英仲超好，話想幫我轉個頭既setting，襯返個景，又賺多左個造型！

估唔到一條條既樹影出黎可以咁靚，最搞笑係遠翔有一張叫我地兩個彎彎腰，我地做極做到第三次先做到佢想要既效果，笑到死左～

走幾步，就成個感覺唔同曬，呢度暗間的，影出黎既感覺唔同曬～

亞仁仲迫我除褸，哈...好凍呀～

影完呢站我地就係咁坐響路邊轉妝，而我地既行李就放曬響車上面！

其實最後呢套婚紗係我最鍾意架，紗紗的感覺，很好很好！小英仲為我預備左襯呢套衫既小花^^

下一站就係五花海，亦都係去九寨溝必去既景點之一～

遠翔超搞笑，又爬樹又企欄咁幫我影，每一張都好特別好靚，佢仲搞笑話好多新娘同攝影師都響水底，叫我唔好坐咁埋，唔係會拉我落去....呵呵呵

走去對面就係另一種景，當亞仁正在幫我地對仔仔女女影相既時候，我地就自己都已經影到靚相，開始識擺pose～

當我以為影完之際，先知原來仲有最尾一個景點，都係PoohPooh(瀑布國語)，行下行下真係估唔到可以行到去一個咁靚既地方，影出黎已經好似油畫咁！不過真係好凍，凍到我既表情都欠奉，又聽唔到遠翔講野，所以pose都比較生硬。

上車好耐都未暖得返，幸好有個好司機為我開暖氣，呢個時候已經差唔多6點。回到106時，遠翔就叫我地不如去食麻辣火鍋 - 香牌坊，去到我地梗係叫麻辣，雖然已經叫左佢少辣，但我都食唔到，問個老闆娘，佢就叫我地轉做鴛鴦，仲話唔介意既就要後面table個個，因為有一對情侶黎，叫曬野食，食都未食就鬧交走左，哈，聽下聽下先知原來係同我地今日一齊影相既個對106新人，嘩，結婚黎鬧交？！

我地一於少理，就照食。

返到酒店，終於有機會影下相，乜都玩一餐，yeah～我地終於完成左一樣野啦！超開心既拍攝之旅^^

聽日揀相，唔知會係點呢～