期待已久既九寨婚照之旅終於正式展開啦～
因為我地揀既係大陸agency - 106視覺，由深圳飛成都，再響成都轉機去九寨（九寨係無直機可以到達，點都要內陸機）。由於要時間揀衫，所以只可以揀飛早機 - 07:45響深圳起飛。哈，響沙田既時候，爹爹就不停擔心我地兩個唔識呢樣個樣，不停教我地兩個，呵呵...梗係啦，我地兩個都唔鍾意返大陸，所以其實真係咩都唔知～
4點半左右，我地就響屋企帶齊裝備出發。一落樓就見到有兩架的士(唔知點解呢?)，為怕打交，我地求其揀左一架就上車，向住皇崗出發。好在有小Joe同埋tintin(106姊妹)講過比我聽，所以大概都知會係點。原來係凌晨12點至6點，的士先可以去皇崗入面，唔係要去出面轉黃色個d巴士。去到黃崗，承惠$200，之後坐黃巴去過關，我地就沿住天橋去的士站（爹爹提我地兩個記得唔好理天橋上面叫您坐車個d)，所以我地諗都唔諗就一直行行行，上左的士，一路上我都有d擔心，因為路上好黑，我仲問哥哥司機唔知車緊我地去邊，哈，幸好...我地６點已經去到機場，承惠$80左右。
去到機場，個時天都未光，而個機場係一個人都無，呵呵呵...因為未有人返工～
而爹爹早已響我地坐緊的士既途中已經起左身，同哥哥響到sms緊，仲話估唔到我地咁快去到，話我地利害利害！
個機場都好大好新，只係...唔知點解一張chair都無，又未有人返工，真係唔知做乜好，唯有兩個無聊人響到影相囉！
好安全之下又已經去到成都，個時只不過係10點半左右，但由於去九寨既機係下午1點45分，所以我地就去搵野食(因為頭先個飛機餐我都無食，超難食)，行左機場一圈之後，我地兩個決定都係食KFC，哥哥仲食左個香港無既"嫩牛五方"，係自己落麻辣粉架，佢話好好味喎～
大約11點半，我地諗住check in既時候，去四川航空問，先知道原來要去機場另一度搭佢既內陸機(大約離機場400米遠)，我地兩個又無拖住個喼行，幸好聰明既哥哥好快搵到。Check in之後，當我地諗住去入面等，佢就話班機delay，要2點40分先開，咁我地兩個就唯有響到玩NDS，幸好，佢都響大約3點未到就已經起飛...
之後聽sis講話四川航空好窄，我今次坐又唔係，佢地service幾好，同埋都幾闊，因為我地兩個早check in，仲坐到Economy既第二行，嘩，正！
響唔夠3點45分，已經見到連綿不斷既雪山，我同哥哥就不停咁影相，怕之後影唔到～
一落機，本應有諗過搵106sis話比我聽既司機黎車我地，但見到有的士，我地問左都只係200個大洋，就上左車去酒店先～
個司機超好人，會問您係咪黎旅行，因為我地人生路不熟，佢仲一路講解九寨既文化景色同埋有咩地方要去，行左一陣，仲無啦啦行左架車話叫我地可以落地影相咁話，咁我地就梗係落車啦，就響過對面馬路之際，我地兩個無睇車，哈，差少少就...
大約個半鐘左右，我地就到達酒店，其實原來去九寨係一條路，我地一路都不停忙四圍既景色，同埋...搵106間舖，原來個個司機差唔多都識去架，唔駛擔心！司機仲會不停問您睇唔睇藏迷...
去到酒店都不知幾開心，都係爹爹講得岩，佢話一定要住貴少少既酒店，影相已經咁攰，點都要訓好少少，哈，正！
響酒店休息左一陣，我先發現我會帶九寨店既電話，唯有先打比小Joe同TinTin求救，但由於唔識區號，又打唔到喎，佢地就叫我直接去店入面搵佢地...
哈，一去到，小魚已經話好擔心我地，打左電話比我地成日，呵呵呵...真係唔好意思呢～佢見我地仲未食野，我又見佢地岩岩開飯，佢就叫我地先去對面個間滋味來先食個晚飯！
由於入夜，都真係好鬼凍，好在我有個無敵大暖爐會抱住我～去到店入面，個老闆都好好人，會介紹我地食咩～我地見好似耗牛肉好出名咁，就叫左一個，期間出面既人問我地食唔食串燒，哥哥就叫左少少返黎...
不過佢唔記得叫佢地唔好咁辣，嘩～唔食辣既小桃都食到既！個耗牛肉真係好好味，仲好有分量，成碟都只係有牛肉，無其他料，仲每一舊都係好林架～
之後我地就返店入面揀衫，佢地真係超細心，知我怕凍，就攞左個暖爐比我先取暖，我就同遠翔(攝影師)先夾一夾我地要既風格同埋揀衫～
由於我地決定影兩日九寨溝內(坐的士沿途黎既時候見到古城，我地兩個都無咩興趣)，所以遠翔都建議我揀婚紗多少少，咁個景就會靚d，而個化妝師就不停幫我揀衫，為求令我滿意為止，我覺得佢既衫都算多得揀，唔會有揀唔入手既情況，反而就係多到都唔知揀邊件好，期間遠翔都會入黎比少少意見我，話邊件好，而哥哥除左比意見我之餘，就係幫我影相，等我可以比較一下！
我係一個好鬼難決定野既人，好想試多幾件，而佢地都超好人，唔會黑面，仲話當然要試多幾件啦～
揀左成個鐘，終於搞掂左，揀左３件婚紗同埋１件晚裝，而男仔就可以聽日我化妝既時候先揀衫，於是106就幫我地叫車，當然個司機都係會比咭片我，同埋問我聽日駛唔駛佢車，仲問我地睇唔睇藏迷，而我地就約好左佢聽日一早車我地去106，車費都只係$9/程！
今晚兩個一齊敷左Mask就訓，聽日先影靚相～
沒有留言:
張貼留言