九寨成都婚照之旅Day4

 兩日既拍攝終於完成左，係意想不到既漂亮 (無諗過會影到雪同時又影到紅葉)，係意想不到既順利，經過兩日之後，我地兩個都攰到爆，幸好尋日有好好既休息，都係爹爹講得岩，最緊要酒店好先會訓得好。

今日又可以晏d先起身，我地兩個終於可以正正經經咁食早餐，早兩日太早起身，食野既時間又唔多，今日我比前兩日食既野係兩倍，至少咩都敢試，其實間酒店真係好唔錯，野食選擇我相信響九寨已經唔算少。

喜來登算係一間比較好既酒店，因為出名既「九寨天堂」距離溝內好遠，坐車都要差唔多50分鐘，都未計車費，所以我地選擇左喜來登，服務都好一流。出面個空地有半個維多利亞公園咁大，好興奮。

九點左右我地去到106開始揀相，我地總共影左243張相。

第一輪我同哥哥只係可以揀走左40多張，好懊惱，但小魚就響我旁邊教我點樣揀走。

第二輪我地用另一個方法，開始揀靚既相入資料夾，發覺都仲係有好多靚相，唉，遠翔真係好勁。問左好多唔同既野加＄既問題，終於我地要左比較貴既套系，再要多一張20吋，將30吋大相轉左40吋，再將12吋相簿轉做16吋，嘩，好開心！

總共入冊既有90幾張，呵呵呵....

用左我地3個半鐘，終於搞掂左，個時已經係12:30，我地要趕兩點半機返成都，我地即刻去106食牛肉麵，哈哈，點解我地巧遇一陣接我地既司機，佢仲請左我地食。

12:45分我地終於上車要離開106，哈哈...點知響車上面見小魚響到大叫小桃，又跑出來才知道自己沒有把CD帶走，他們真好人。

今日望既景色已經無之前咁多雪，司機好安全咁送我地去到機場，個時時間係大約1點半，時間岩岩好，問櫃台佢仲話比我知今天天氣好，所有飛機都無延誤。

今次可能遲左check in，所以無窗口位坐，好好休息好快就離開左九寨溝，帶住106話比我知好食同應該去既地方就去到成都，仲可以就咁響飛機行落地，咁大個女第一次，超開心。

落機之後，我地就坐的士，去我地既「凱悅酒店」。司機仲唔識路，幸好我有帶住酒店既電話，小英話大約$50車費就會去到，哈，佢果然無呃我，落車先知自己好似去左香港銅鑼灣咁熱鬧既地方。

不過呢度既司機就真係好似大陸既司機咁，車同車之間cut線都只係秒距，我同哥哥呢d識渣車既人都睇到嘩嘩聲。

去到酒店check in，就安排我地上房，嘩！點解只係$600既酒店可以有咁靚既，靚到我地兩個真係唔多信。間房既所有設備都好先進，個廁所仲係好開揚添！

對面就係106，好好既哥哥就陪我上去106同小妍打個招呼，哈，幸好哥哥提我，原來我地傾下傾下，就已經傾到7點多，原來我地兩個都咁多野講。

問左佢地去咩景點好，寫低之後，成都第一站我地就去左「錦里」。

D人話個度好故色故鄉，原來真係好特別，響呢度即刻諗起大紅燈籠早早掛，四周圍都係紅色既燈籠，響呢度，我地仲巧遇尋日一齊影相之後佢地嗌交比我地食埋佢地個火鍋既一對新人。

行下行下我地就開始買野食，哥哥一路行就一路講：「呢度好野呀，本書話一定要試架，食囉！」就係咁，我地每行一間舖都會買野食，呢個好好味既士多啤啤冰糖葫蘆我地食左一串之後，行個圈返轉頭再食多串。

仲有張飛牛肉，唔多好食既軍魁，同埋好似提拉米蘇既糕。

食左咁多野之後，我地再去搵野食晚飯，就係小妍話好多食野既地方「耍都」。我地仲係自己行過去，幾叻。行左一個圈之後，我地都係決定食麻辣火鍋，呢一間睇睇下先知叫「爛火鍋」，叫左黃喉、鴨舌、肥牛、鵝腸等，叫左枝只係$8就有1.25L既雪碧，食得好好味。

估唔到鴨舌原來食落係咁好味，今次既麻辣比起尋日既更辣，我只可以食到少少，埋單既時候都只係$80大元，好抵好抵。

坐返的士返去酒店附近，我地就周圍行下，見到仲有simple bread、KFC、好多百貨公司，仲有好靚既咖啡店。

好開心既一晚，聽日要再開心多d先。