海鮮站@媽媽慶生

尋日發生左咁唔愉快既事，其實大家都好似無咩心情。
但著實又教我更加要珍惜呢家擁有既野，就好似屋企人咁。
今日係媽咪生日，我一早book左海鮮站同佢慶祝，主要係受到小高同嘉嘉既熱烈推介。我覺得可以同佢一齊慶祝佢呢廿幾年既生日，原來都已經好幸福。

Book枱個日，多得嘉嘉提醒，我打比老闆娘問佢可唔可以安排比我坐入面，但老闆娘話真係唔可以confirm我地，只可以盡量安排。所以個日我安排左早少少去，幸好，雖然人地都到左，但老闆娘都留返入面比我地坐。

開頭，我見到屋企人都無乜信心咁，擔心佢既海鮮唔新鮮，但響老闆同我既熱烈推介之後，我地乜都叫。
基本上，我地除左無叫蟹之外，我諗我地樣樣海鮮都有叫到。
呢樣可能就係多人既好處。

老公叫左珍寶蠔，嘩，超大隻呀！
老闆仲幫我地將個龍蝦湯加左酒，再叫我地試下，真係慳好飲左架喎！
我個人今日好鍾意既就係呢個螺，超鮮甜。
白酒煮青口，老公就話煮得太熟，下次帶佢去食間再好味D既先。

當然，小桃可以食既野唔多，但就叫左碟魚比自己食，我覺得響無得食海鮮既情況下，可以食魚都唔錯呀！
至於龍蝦麵，我諗如果食豬屎既，應該個個都會揀豬屎黎食，可惜我同媽咪唔食豬屎，所以叫左個上湯，就覺得唔係好夠味咁樣。
佢地就話個黃金瀨屎蝦幾特別，出面食唔到。
個海鮮焗飯，老公就話無豬屎味，小桃試左少少，真係唔重豬屎味喎！
個人另一欣賞既就係每一枱都會跟一碟蒜蓉包，超好味。想encore都無.....

埋單既時候，連我媽咪都嚇左一跳，只係$1050/6位，佢話真係好抵。
個老闆仲抱左隻出世無幾耐既小貴婦狗狗比我地玩，搞到佢地鬼咁開心。
如果唔係食環境既，我覺得個度真係幾唔錯。

由於我地食好早，之後仲可以行下，再去食甜蜜蜜做甜品。Yummy～

發生幾多唔愉快都係大家唔想既，唔想再去討論岩定唔岩，但係佢地當中有唔少都係基督徒，都好積極咁樣去面對，呢樣係我覺得好奇妙既地方。
希望媽媽身體健康，年年都可以同我地一齊過生日。