Dabi物資@奶煲+奶樽

奶煲+奶樽呢個item，可算係我做得最多reserach既一項，由得知跛跛相贈既奶煲唔用得之後，我就歡天喜地咁諗我地可以揀肥奶樽，做得多research既後果係：
我係揀左4位候選既佳麗
奶煲一號 - Tommee Tipee

-上層可放置奶咀及樽蓋

-數字及字母顯示存放時間倒數及處理程序

-分體式設計奶樽盛器可獨立取出放入雪櫃,增加奶樽更長的存放時間

-有燈號及響聲提示消毒程序已完成

-全自動完成消毒過程

我個人覺得佢平得黎都好易幾好用，見網上用既準媽媽都唔少。
想揀既原因係我鍾意佢無fix死奶樽隔間，即係肥又得，瘦又得，仲可以第時將亞B既食飯杯杯碗碗放埋入去消毒。
但一去到荷花，唔單止個sales姐姐話比我知無Avent咁好，就連我同老公都覺得佢既料好流，所以由個一刻開始，已經諗住揀Avent。

奶煲二號 - Avent

- 置件層架

- 全自動完成消毒過程

- PES原料製造，不含雙酚A致癌毒素，可更安心使用

- 排氣孔設計，防止寶寶吸入過多空氣，而引致脹痛不適

- 英國製造
大品牌，基本上無乜野要擔心，老公亦都唔係見貴野就買，佢真係會聽iQ有咩function多左，知道無用之後，就話唔駛買貴個隻。
放得到肥仔奶樽，料靚價錢貴，所以已經一心諗住揀呢一款。

揀完奶煲，就梗係揀奶樽，講真，真係越聽得多就越心多。
本身一心諗住買ChuChu母乳奶樽，點知原來佢已經無再出肥仔樽，只係得玻璃樽款。再出既肥仔樽，又只係得肥仔樽既PPSU十字咀版本，即係無得買。
奶樽一號 - ChuChu

- 採用不含環境荷爾蒙之新原料 – PPSU 塑膠製造

- 闊身奶瓶令清洗更容易 , 更方便

- 奶瓶傾側，奶亦不會漏出

- 不會打破

- 樽身輕巧，方便攜帶出外

- 可煮沸、藥液消毒及微波爐消毒

- 附SUPER CROSS CUT 矽膠闊身奶嘴

- 日本製造
既然無得揀母乳咀，究竟我地好唔好用十字咀呢？
但老公一黎對日本野有bias，佢話明明只係因為Yen既匯率貴先搞到佢個價咁高，無理由我地陪佢一齊加價。加上已經無左ChuChu我最想買既原因 - 母乳咀，所以就無揀。

奶樽二號 - Tommee Tipee

-採用PP原料製造，不含雙酚A，可更安心使用

-natural flex奶咀在寶寶吸吮時可延伸及運動

-讓寶寶隨意將奶咀放在較舒服位置來吸吮

-奶咀使用超柔軟的材料製成

-仿似媽媽的乳房一樣

-特別為排氣、防脹氣而設計的高敏感度閥門

-以及減少因吸入空氣而導致的絞痛問題

-特大的寬口奶咀設計，更像媽媽的乳房
Tommee Tipee既母乳咀係除左ChuChu之外，我做既research之中，最似母乳既奶樽。但真係睇親佢既現貨，摸上手既手感，加埋荷花話比我知Tommee Tipee係英國野，但大陸做。
睇埋個價錢，好似真係好大陸野既感覺，所以都係out！


奶樽三號 - Dr. Brown

-採用全新耐熱PES材質，絕不含致癌物質雙酚A

-其專利的內置通氣管，能減少奶液中的氣泡

-減少吸入過多的空氣而引致肚絞疼、打嗝、嘔奶、及引發中耳炎

-設計以正壓輸送奶液，與母乳喂哺原理相同

-可避免因液體流入耳朵而引起中耳炎

-闊頸設計， 方便倒入奶粉及清洗

-葫蘆樽形，容易握緊，防止滑手

-附專用奶管刷1支

-德國及奧地利製造
其實響荷花聽個sales姐姐介紹，聽到話佢呢隻少d風，著實真係有諗過，講真，咁多個亞媽為你自己既仔女揀奶樽，都係唔係貪靚，而係想亞B食得好D，少D風～
但當我地睇到佢個條幼到唔幼既管，雖然佢跟埋隻幼刷，但個人覺得清潔上都幾麻煩。

奶樽四號 - Avent

-PES原料製造，不含雙酚A致癌毒素，可更安心使用

-排氣孔設計，防止寶寶吸入過多空氣，而引致脹痛不適

-英國製造
Avent其實一直都無諗過揀，應該咁講，一直我都諗住揀ChuChu母乳咀，直至我知道佢唔再返貨，我先去搵用咩好？其實Avent呢一隻又唔係母乳咀，著實我係有擔心Dabi食過唔再食人奶，但由於細佬B同妹豬都係用Avent，一直都無問題，妹豬仲用左4年之多，加上老公對英國品牌有信心過日本好多，買奶煲set裝又抵少少，所以最終我地都係揀左Avent。

希望Dabi健健康康，乖乖成長啦！