Dabi@Day181 - 六個月成長印記

沒有工人的日子，blog真係追唔切，其實今個月幫Dabi B影多左好多好多相，放心，工人希望響6月中返工。到時希望有機會後補4月既日記。
不過....
斷唔可以放低咁耐，希望寫最update既都能夠吧！

其實尚欠五個月既成長印記，一直Dabi響4個月時都無打側身既意欲。眼見其他BB都好似打側打側想轉身咁，我先同老公講，會唔會Dabi好遲先識架。
點知響4月頭，佢開始換片時想轉身，再響9/4無啦啦一早自己成功咁roll over到。

呢家換片簡直就係同佢鬥快鬥力鬥EQ，佢轉身真係可以9秒9。

今個月最大最大既轉變，我諗就係便便啦！
因為佢一踏入4月頭，佢無啦啦成3日無便便>之後兩日有>4日無>1日有>5日無...
好似玩野咁

明明之前係日日都幾次架嘛！
於是，媽媽太擔心之下，就梗係同佢去左睇醫生。
睇過兩個醫生，其中一個係佢出世既兒科醫生，一睇佢既磅數，就話佢唔夠重。
咁又係，5個幾月得個13磅，真係幾令人擔心既。
醫生話佢無便便好大可能性係.....佢食唔夠。
我諗呢一句對於奶媽黎講，真係好打擊架！

佢於是建議我由餵一餐糊仔改為兩餐，希望佢密食當三番。或者係補奶粉～
經我同老公商量後，我地怕佢消化唔到咁多固體，終於我地響佢5個半月開始左補奶粉大計。由一餐，慢慢兩餐，到呢家三餐奶粉lu！
加埋我比佢既糊仔由純米糊到呢家有加生果蓉，果然，呢期日日有便便。
咁我有無好傷心？我又無喎，反而我輕鬆左好多，一定知佢食幾多，又見到佢有poopoo，真係成個人都安樂曬！
黎緊我都諗住已經餵到6個月，呢家死泵爛泵先得個2安，我都諗住差唔多收工lu。
世衛話建議餵母乳到6個月嘛，哈哈哈..安樂地收工。

食奶方面，由於佢已經轉左半奶粉，呢家一日只係早晚食人奶，中間三餐都係奶粉，每餐150ml，朝早個餐為求方便，仍然係埋身食。知佢食唔夠架啦，不過佢又訓得返，咪由佢下一餐先食奶粉。夜晚個餐人奶都係靠之前泵落儲起，一日夠一餐咁囉，食到6安架。
而每日就夜晚個餐比糊仔/粥仔佢食，大約兩安！今個月試得多囉，開頭食糊仔食得好地地，幾個星期後無啦啦唔食喎。咪煲粥囉，仲開始加南瓜、瘦肉、菜等比佢試，全部都mi實個口唔食，吹脹！
之後因為我有時下午會比佢食生果蓉，見佢食蕉好好，咪試下加返落米糊比佢食，佢又同我清曬兩安，真係比佢激屎！其他無論apple定個個小朋友都喜愛既南瓜都唔食，我都唔知點算好？日日食蕉都唔係辦法？
呢個月開始，都間唔時會食下餅餅、生果蓉等，比佢試下味。

便便方面，上面講左，佢之前唔係好有便意，呢家食完蕉糊之後，就日日都有poopoo，有時開心起黎，一日兩次都有架。
不過食左奶粉之後，明顯濕片多左好多，次次都有勁重片(亞媽，即係我食唔夠囉！)

訓覺豬方面，夜晚個覺唔駛抱住暗訓，放落床仔，聽下音樂，15分鐘內就會KO。
每日呢家訓覺既schedule都好定。同埋佢開始眼訓會捽眼～
00:15-8:00>14:00-15:00>16:45-18:30>21:00-21:30
日日都訓到12個鐘plus，出街另計啦！嘻嘻！

我仲記得之前上產前講座，話你好快就會pick up到bb既schedule。
我一直都覺得自己pick up唔到架，連佢喊乜我都唔識分。
直至呢個月，講真，我先完完全全咁掌握到呢個小朋友既每日活動。
我已經係全職咁湊佢，都要5個幾月時間，雖然，呢家我了解到呢個人仔，我真係覺得超級開心架！

玩玩方面，佢呢家叻左好多，又識轉身又盛，基本上比乜佢都放入口咬一餐架啦！
亦都好叻撩人玩，又會咭咭聲笑出黎，點講都係一隻識氹人既豬仔。

=========================================
Dabi B，可以見証住你每天的成長，我真係覺得無比既榮幸同開心。
但願你響呢個屋企繼續快快樂樂，健健康康咁成長。
愛你的媽咪上