Dabi@Day120 - 四個月成長印記

無啦啦咁又踏入左四個月。今個月好似過得好快。
而最緊張既好消息係：我既yeast infection無啦啦響唔知咩樹既情況下好返左。

事緣係個次Dabi肚痾去睇醫生(大家有睇我blog應該記得)，諗住自己睇極lactation consultant都唔好返，睇下醫生都好喎！
點知佢話我無咩事不特止，仲支持我繼續埋身餵。
可以繼續埋身已經開心，點知無啦啦過多幾日，真係好返曬。
連個白點又無，又無塞，真係個人都鬆曬。

雖然厭奶仲未肯離開Dabi。佢依然係係咁食幾分鐘就唔食。有無食得咁快呀？但由於我埋身返，呢家真係堅唔知佢食幾多。奶樽已經放棄左，不過就會每日用黎比水佢飲。而且之前用Avent佢唔肯飲，響我轉黎轉去之下，我買左個Nuk既黃咀，仲要係大號，所以佢呢家每日都飲到1安水左右。等佢慢慢習慣下都好。
不過買返黎既Avent樽，可能就要留比下一個BB啦！
片片，其實仍然唔夠濕，重量就更加唔會夠啦，不過好在屋企人成日都問我咁重黎仲乜，即係佢地都無反對我餵。只係我自己災難小姐上身，搞到自己唔開心居多。

食奶方面，佢原本5餐，但2月尾既時候，夜奶回歸左。
唉....我咁諗，可能佢想食多少少呢，佢肯食，我肯比。
但夜奶回歸，佢無食多餐，因為佢由3個鐘變成4個鐘一餐。
開心既係，出街唔駛趕頭趕命。但就都係擔心佢食唔夠。

便便方面，我估上次佢肚痾係因為我地試轉奶粉太急。一食返全人奶，就乜事都無。
仲係日日都有至少兩次既便便。
而每日中午岩岩訓醒個一覺，5日有4日都有便意。

訓覺豬方面，呢家已經唔駛行黎行去咁暗訓。一黎就係佢已經有滋滋，二黎就係佢已經太重，真係行唔郁。有時抱住佢，佢反而會掙扎，要放落床自己訓。
仍然都係12-1點去訓，想早少少都唔得。但次次放音樂，通常佢都響15分鐘內訓著。但我覺得夜奶回歸左之後，佢既睡眠質數差左。

佢呢家既schedule通常係：12點至1點訓，半夜起身食夜奶(時間好飄忽，有時5點幾，有時7點幾)，之後餵完通常都訓返。再起身個一覺，就通常唔會再訓，我就抱佢出廳，我食lunch，之後同佢玩一陣，有時呢個moment佢都會訓半個鐘。之後就沖涼，再食milk milk就訓呢一覺。我同佢通常會一齊訓，因為佢有我訓響佢隔離，佢會訓耐d。之後就去到夜晚10點左右，爸爸會幫佢做bb按摩，佢就會訓一陣，我地就去左撳錢。夜晚就再餵奶，餵到佢訓。

Tummy time唔多，但佢已經好有力，成個頭擰黎擰去完全無問題。
但仍然無意識想轉身。就連打側身都無。
開始識得笑出聲，係he he 嘻既笑聲，次次都tum屎人。

而媽媽餵人奶，見自己好返，就唯有諗，睇下佢出牙時食成點。
好多人話BB開始食固體就好好多。
我希望我可以繼續餵落去！