收獲@大減價下既雞鴨店

踏入第30周啦，3字頭好似係響到提醒我，已經唔再係輕輕鬆鬆，呢家行步路都好似好易攰咁....

8月其實好多好多地方都做緊sale，以前我只係會行女人野，呢家女人野已經唔多想行，反而成日走左去行BB野，變左啦我！

今日係老公既Master course開學前最後一日，今朝返工已經同佢講，今晚同佢好好食一餐慶祝。
開學禮，我地去左食BLT Burger，老公一向都幾鍾意食唔同地方既burger，所以今晚同佢出尖沙咀，佢揀左呢一間大家都想試好耐既，都唔錯。

我地第一次食，唔識，叫左兩個Burger Combo，又有薯條，又有Cole Slaw，仲有杯野飲，最緊要係，個包好大個....
老公食到係飲多杯水都飲唔落咁飽，佢仲以為我只係食到一半，結果，我都KO左3/4個Burger，之後先話比老公知，好似有少少飽啦，都係唔食啦！
望住隔離枱，佢地原來會叫一個Combo set加一個Cesar Salad咁樣，係喎，好似岩分量少少。

之後我地就去左雞鴨店行，明明九月仲見到佢有Sale，點都想入去行多轉(明明之前已經響沙田行左幾次都無收獲)。
點知，今日就見到好抵既包被，原價差唔多$300，呢家$110就有交易，嘩，半價有多呀！
個款同個料仲要好唔錯，只係無新貨，已經全部都係last one，我見係雞鴨店，出面買好少少料都唔會係呢個價啦，所以同老公即刻執左3條比Dabi。

老公仲買左個玩具比DaBi添，佢話就算亞囝未玩到住，佢可以攞住玩比亞囝睇喎！
不過又真係幾靚，仲要咁平，點可以忍得手唔買～

滿載而歸咁諗住返屋企，cup泊車之際，亞姐話我地可以有5小時免費泊車喎，拿拿聲話去行多陣。
點知，舖頭都慢慢咁閂門，咁我地唯有走啦，望下隻錶以為好夜啦，原來只係九點半。

同場加映較早前買比DaBi既玩具，一個係掛床床既音樂牛牛，呢家日日都比佢聽架～
仲有兔兔加犀牛玩具，等佢可以攞住玩。

屋企已經越黎越多DaBi野，即係佢要出世既日子一日比一日近啦～～～

我同老公爸B都好期待你既來臨.....
乖囝，記得響媽咪肚入面繼續食食食，食到爸B生日之後，你就可以隨時出黎啦！