試褂篇@上海街

今晚約左媽媽，未來奶奶同埋妹妹去試衫，見今日有時間，就不如約媽媽去試褂。咁岩哥哥今日有迪捷約左去玩，岩曬，我怕佢悶，於是就同媽媽出左旺角上海街掃啦～點知未來奶奶都得閒，就搵埋佢出黎玩啦！

上海街我搵過total有4間褂店，各有各好，仲有網上地圖話比您知響邊：
褂店地圖

我地先有美華開始行起，個度個老細真係唔係幾好禮貌，但個老闆娘真確實真係好人，不過因為無得影相，所以我地試完就走左....

之後就去錦發，由於自己之前都做過小小豬料搜集，知道呢間係黑店之一，所以自己都小心D.....
其實佢呢度既褂唔錯架，不過講講下佢就攞左件頭褂出黎（一如Tintin所講既劇情），就話點新點好，又話自己未開市，叫我比幾十蚊落訂，送乜送乜等等...
但頭褂都有咁平？我唔想比佢食幾家茶禮，自己最尾又唔係頭褂，所以又走左～

其實我自己幾ok呢件大五福架～

會合埋未來奶奶之後，就出發到永隆，個亞姐好鬼好人屎，乜都比我地影，影幾多都唔話，仲好似好老實咁，呢度試褂同落訂既人都好似比上兩間多....

呢件大五福就好似誇左少少....

呢件波浪腳（又叫蓮花腳），波浪既就叫唔好揀，話會婚姻有波折，但叫蓮花腳就話會年生貴子...我地仲處於決定唔到，因為我覺得佢唔係好夠誇....（估唔到我受到）

佢比左呢一件我，其實個一刻，我都已經乜都唔記得曬，件件都係差唔多，但睇返相，好似呢件大睇ｄ，價錢比之前個件貴，咁即係多針線ｄ啦～
就係咁，我就揀左呢件啦～大家覺得點呀？

返到去，比哥哥睇，佢話梗係揀大五福，超多金線個件啦（=.="），佢仲話著馬褂都好喎，比我估中左^^

原來今日先知褂係要媽媽比＄架喎～
多謝媽媽～